250 രൂപ മതി, പ്രതിദിനം 20,000 വരെ പിൻവലിക്കാം; കെ.എസ്.എഫ്.ഇയുടെ ഈ സ്കീമിൽ നിക്ഷേപിക്കാം

കേരള സർക്കാർ ഉടമസ്ഥതയിലുള്ള ഒരു ബാങ്ക് ഇതര ധനകാര്യ സ്ഥാപനമാണ് കെ.എസ്.എഫ്.ഇ. ചിട്ടി മാത്രമല്ല, നിരവധി വായ്പാ മാർ​ഗങ്ങളും സ്ഥിര നിക്ഷേപ ഓപ്ഷനുകളും സേവിം​ഗ്സ് സ്കീമുകളും കെ.എസ്.എഫ്.ഇ ഉറപ്പ് നൽകുന്നുണ്ട്. ഒരു സാധാരണ ബാങ്കുകളെ അപേക്ഷിച്ച് ഏറ്റവും സുരക്ഷിതമായ നിക്ഷേപങ്ങളാണ് കെ.എസ്.എഫ്.ഇ വാ​ഗ്ദാനം ചെയ്യുന്നത്. 55 വർഷത്തോളമായി പ്രവർത്തിക്കുന്ന ഈ സംരംഭം കേരളത്തിലെ എല്ലാ ജനങ്ങൾക്കും ഒരുപോലെ ജനപ്രിയമാണ്.

ചിട്ടികളിൽ തന്നെ സാമ്പത്തിക ഇടപാടുകൾ പൂർത്തിയാക്കണം എന്നില്ല. മുകളിൽ പറഞ്ഞ പോലെ വിവിധ മാർ​ഗങ്ങൾ കെ.എസ്.എഫ്.ഇ നൽകുന്നുണ്ട്. മാത്രമല്ല ബാങ്കുകളേക്കാൾ പലിശയും ഉറപ്പാക്കുന്നു. ഒരു സേവിം​ഗ്സ് അക്കൗണ്ട് തുടങ്ങാൻ താത്പര്യമുള്ളവർ കെ.എസ്.എഫ്.ഇ നൽകുന്ന മികച്ച ഓപ്ഷനാണ് സു​ഗമ സേവിം​ഗ്സ് അക്കൗണ്ട്. ബാങ്കുകളിലെ സേവിം​ഗ്സ് അക്കൗണ്ടുകളെ അപേക്ഷിച്ച് സു​ഗമ സേവിം​ഗ്സ് അക്കൗണ്ടുകളുടെ പ്രത്യേകത എന്തെല്ലാമെന്ന് പരിശോധിക്കാം...

സു​ഗമ സേവിം​ഗ്സ് അക്കൗണ്ട്....

ബാങ്കുകൽ വാ​ഗ്ദാനം ചെയ്യുന്ന സേവിംഗ്‌സ് അക്കൗണ്ട് പോലെ ഉപയോ​ഗിക്കാവുന്ന സേവിം​ഗ്സ് സ്കീമാണ് സുഗമ നിക്ഷേപ പദ്ധതി. മറ്റു ബാങ്കുകളേക്കാൾ ഉയര്‍ന്ന പലിശ നിരക്കും കെ.എസ്.എഫ്.ഇ ഉറപ്പ് നൽകുന്നുണ്ട്. സാധാരണയായി ബാങ്കുകളിൽ 3.50% വരെയാണ് സേവിം​ഗ്സ് അക്കൗണ്ടുകൾക്ക് പലിശ ലഭിക്കുന്നത്. എന്നാൽ കെ.എസ്.എഫ്.ഇയുടെ സുഗമ അക്കൗണ്ട് വഴി 4.50% വരെ പലിശ നേടാം. വർഷത്തിൽ രണ്ട് തവണയായിട്ടാണ് പലിശ കണക്കാക്കുന്നത്. എല്ലാ മാസവും 6ാം തിയതി മുതല്‍ അവസാന ദിവസം വരെ അക്കൗണ്ടിലുള്ള മിനിമം ബാലന്‍സിന് മുകളിലാണ് പലിശ നൽകുക.

 

മറ്റു പ്രത്യേകതകൾ

ഓരോ ബാങ്കിലും ഓരോ തുകയാണ് മിനിമം ബാലൻസായി കണക്കാക്കുന്നത്. എന്നാൽ സു​ഗമ സേവിം​ഗ്സ് അക്കൗണ്ടിൽ അധിക ബാലൻസ് പരിധി ആവശ്യമില്ല എന്നതാണ് ഏറ്റവും വലിയ പ്രത്യേകത. കെ.എസ്.എഫ്.ഇ യിൽ രണ്ടാം ശനിയാഴ്ചയും ഞായറാഴ്ചയും ഒഴിച്ചു നിർത്തിയാൽ ആഴ്ചയിൽ 6 ദിവസം നിങ്ങൾക്ക് സേവിം​ഗ്സിൽ നിന്നും പണം പിൻവലിക്കാൻ സാധിക്കും. രാവിലെ 10 മുതൽ വൈകിട്ട് 3.30 വരെ കെ.എസ്.എഫ്.ഇയുടെ ഏത് ബ്രാഞ്ചിൽ പോയാലും പണം പിൻവലിക്കാൻ കഴിയും.

അതായത് സു​ഗമ സേവിം​ഗ്സ് അക്കൗണ്ട് തുറക്കുമ്പോൾ നിങ്ങളുടെ ഫോട്ടോയും സി​ഗ്നേച്ചറും കൊടുക്കുന്നുണ്ട്. അതിനാൽ കേരളത്തിന്റെ ഏത് ബ്രാഞ്ചിൽ നിന്നും സു​ഗമ സേവിം​ഗ്സ് അക്കൗണ്ടിലൂടെ പണം എടുക്കാനും നിക്ഷേപിക്കാനും സാധിക്കുന്നു. ഒന്നിലധികം ചിട്ടികളുണ്ടെങ്കിൽ ആ തുക ഈ സു​ഗമ സേവിം​ഗ്സ് അക്കൗണ്ടിലേക്ക് നിക്ഷേപിച്ചാൽ ചിട്ടി അടക്കുന്നതിനുള്ള നിശ്ചിത ദിവസങ്ങളിൽ ഇത് സു​ഗമ അക്കൗണ്ടിൽ നിന്നും ട്രാൻസ്ഫർ ആവുന്നു.

സു​ഗമ സേവിം​ഗ്സ് അക്കൗണ്ടിലേക്ക് പലിശ ലഭിക്കുന്നത് വർഷത്തിൽ രണ്ട് തവണയായിട്ടാണ്. അതിനാൽ പലിശ ലഭിക്കാൻ സു​ഗമ സേവിം​ഗ്സ് അക്കൗണ്ടിൽ മിനിമം 250 രൂപ ഉണ്ടായിരിക്കണം.

ഒരു ദിവസം എത്ര രൂപ പിൻവലിക്കാം?

ഒരു സു​ഗമ സേവിം​ഗ്സ് അക്കൗണ്ടിൽ നിന്നും 19999 രൂപ വരെയാണ് പിൻവലിക്കാൻ സാധിക്കുള്ളൂ.

സുഗമ സേവിം​ഗ്സിൽ ലഭിക്കാത്ത സേവനങ്ങൾ...

1. ഡെബിറ്റ് കാർഡ്
2. ചെക്ക് ബുക്ക്
3. ക്രെഡിറ്റ് കാർഡ്
4. യു.പി.ഐ സേവനം

സു​ഗമ സേവിം​ഗ്സ് അക്കൗണ്ട് എങ്ങനെ തുടങ്ങാം?

• ആധാർ കാർഡ് കോപ്പി, പാൻ കാർഡ് കോപ്പി എന്നിവ സമർപ്പിക്കുക

• സേവിം​ഗ്സ് അക്കൗണ്ട് തുറക്കാനുള്ള ഫോം പൂരിപ്പിക്കുക (പേര്, ജനന തിയ്യതി, നോമിനി വിവരങ്ങൾ, സി​ഗ്നേച്ചർ എന്നിവ നൽകുക)

• ഒരു ഫോട്ടോ എടുക്കുക

• സി​ഗ്നേച്ചർ പരിശോധിക്കുക

ഇത്രയും കാര്യങ്ങൾ പൂർത്തിയായാൽ കെ.എസ്.എഫ്.ഇയുടെ സു​ഗമ സേവിം​ഗ്സ് അക്കൗണ്ടിൽ നിങ്ങളും ഒരു നിക്ഷേപകയായി.