ഓണം അടിച്ച് പൊളിക്കാം, പണം കണ്ടെത്താൻ സ്വർണ വായ്പ, കുറഞ്ഞ പലിശയിൽ എളുപ്പം നേടാം

സ്വർണം എല്ലാവർക്കും ഇഷ്ടമാണ്. പ്രത്യേകിച്ച് സ്ത്രീകൾക്ക്. റെക്കോർഡ് വിലയിൽ സ്വർണവ്യാപാരം പുരോഗമിക്കുമ്പോഴും കേരളത്തിൽ സ്വർണാഭരണ വിൽപ്പന തകൃതിയായി പുരോഗമിക്കുകയാണ്. കേവലം ആഭരണം എന്നത് മാത്രമല്ല സ്വർണത്തിന്‍റെ ഉപയോഗം. അത്യാവശ്യ സമയങ്ങളിൽ പണം കണ്ടെത്താനും സ്വർണം ഉപകരിക്കും. എങ്ങനെ എന്നല്ലേ, സ്വർണപണയത്തിലൂടെ. വ്യക്തിഗത അല്ലെങ്കിൽ ബിസിനസ് ആവശ്യങ്ങൾക്കായി സ്വർണ്ണാഭരണങ്ങളോ നാണയങ്ങളോ പണയം വച്ചുകൊണ്ട് പണം കണ്ടെത്താൻ സാധിക്കും. സുരക്ഷിതമായ വായ്പയാണ് സ്വർണവായ്പ.

എത്ര പണം ലഭിക്കും..?

റിസർവ് ബാങ്ക് ഓഫ് ഇന്ത്യയുടെ കണക്കനുസരിച്ച്, സ്വർണ്ണ വായ്പകളുടെ ലോൺ ടു വാല്യൂ (LTV) അനുപാതം 75% ആണ്. പണയം വച്ച സ്വർണ്ണത്തിന്‍റെ മൂല്യത്തെ അടിസ്ഥാനമാക്കി ബാങ്കുകൾക്ക് നൽകാൻ കഴിയുന്ന പരമാവധി വായ്പ തുകയെയാണ് ഈ അനുപാതം സൂചിപ്പിക്കുന്നത്. അതായത് നിലവിലെ വില അനുസരിച്ച് ഒരുപവൻ സ്വർണം പണയം വെച്ചാൽ ഏകദേശം 56000 രൂപയോളം നേടാൻ കഴിയും. എന്നാൽ 90 ശതമാനം വരെ വായ്പ നൽകുന്ന ധനകാര്യ സ്ഥാപനങ്ങളുമുണ്ട്.

സ്വർണ്ണ വായ്പയുടെ സവിശേഷതകൾ

1. വേഗത്തിലുള്ള പണമിടപാടും കുറഞ്ഞ ഡോക്യുമെന്‍റേഷനും
2. 3 മാസം മുതൽ 3 വർഷം വരെയുള്ള ഹ്രസ്വ തിരിച്ചടവ് കാലാവധികൾ
3. വായ്പാ അംഗീകാരത്തെ ക്രെഡിറ്റ് സ്കോർ ബാധിക്കില്ല, പക്ഷേ പലിശ നിരക്കിനെ ബാധിച്ചേക്കാം.
4. വ്യക്തിഗത വായ്പയുമായി താരതമ്യപ്പെടുത്തുമ്പോൾ കുറഞ്ഞ പലിശ നിരക്ക്

പലിശ നിരക്ക്

ഇന്ത്യയിലെ സ്വർണ്ണ വായ്പ പലിശ നിരക്കുകൾ പ്രതിവർഷം 7.75% മുതൽ 29% വരെയാണ്. കടം വാങ്ങുന്നവർക്ക് പ്രതിമാസ തവണകളായോ അല്ലെങ്കിൽ വായ്പ നൽകുന്നയാളുടെ നിബന്ധനകൾക്കനുസരിച്ച് ഒറ്റത്തവണയായോ പലിശ തിരിച്ചടയ്ക്കാം. വിവിധ ബാങ്കുകൾ നൽകുന്ന പലിശ നിരക്കുകൾ നോക്കാം.

എസ്‌ബി‌ഐ: 8.55 ശതമാനം മുതൽ 10.25 ശതമാനം വരെയാണ് പലിശ നിരക്ക്

കാനറ ബാങ്ക്: 9.25 ശതമാനം വരെയാണ് പലിശ നിരക്ക്.

യൂണിയൻ ബാങ്ക് ഓഫ് ഇന്ത്യ: 8.7 മുതൽ 9.4 ശതമാനമാണ് പലിശ നിരക്ക്.

ഇന്ത്യൻ ഓവർസീസ് ബാങ്ക്: പലിശ നിരക്ക് 9.3 മുതൽ 10.25 വരെയാണ്.

പിഎൻബി: 8.35 മുതൽ 9.75 ശതമാനം വരെയാണ് പലിശ.

ബാങ്ക് ഓഫ് ബറോഡ: 7.75 മുതൽ 9.95 വരെയാണ് പലിശ നിരക്ക്.

എച്ച്ഡിഎഫ്സി ബാങ്ക്: 9.3 മുതൽ 17.86 ശതമാനമാണ് പലിശ നിരക്ക്.

ഫെഡറൽ ബാങ്ക്: പലിശ നിരക്ക് 9.99 മുതൽ 11.9 വരെ

സെൻട്രൽ ബാങ്ക് ഓഫ് ഇന്ത്യ: 7.9 മുതൽ 8.9 വരെയാണ് പലിശ നിരക്ക്.

ഐസിഐസിഐ ബാങ്ക്: പലിശ നിരക്ക് 9.15 ശതമാനം മുതൽ 16.75 വരെ

ആക്സിസ് ബാങ്ക്: 9.75 മുതൽ 19 ശതമാനം വരെയാണ് പലിശ നിരക്ക്.

പ്രോസസ്സിംഗ് ഫീ

സ്വർണപണയത്തിന് ബാങ്കുകൾ പ്രോസസ്സിംഗ് ഫീസ് ഈടാക്കാറുണ്ട്. വായ്പ എടുക്കുന്ന തുകയുടെ നിശ്ചിത ശതമാനമാണ് പ്രോസസ്സിംഗ് ഫീയായി ഈടാക്കുക.

സ്വർണം വാങ്ങിയാൽ കീശ കീറും

ഗ്രാമിന് 9445 രൂപയും പവന് 75,560 രൂപയുമാണ് നിലവിലെ സ്വർണവില. പണിക്കൂലി, ജിഎസ്ടി, ഹോൾമാർക്ക് ചാർജ് എന്നിവയാണ് സ്വർണാഭരണ വിലയിൽ ചേർക്കുന്നത്. അങ്ങനെയെങ്കിൽ 5% പണിക്കൂലി, 3% ജി.എസ്.ടി, ഹോൾമാർക്ക് ചാർജ് (53.10 രൂപ) എന്നിവ ചേരുമ്പോൾ ഇന്ന് ഒരു പവൻ ആഭരണം വാങ്ങാൻ ഏകദേശം 81,760 രൂപ നൽകേണ്ടി വരും.