ഇനി എളുപ്പത്തിൽ ക്ലെയിം ചെയ്യാം; വെറും മണിക്കൂറുകൾ കൊണ്ട് യു.പി.ഐ വഴി ഇ.പി.എഫ് പിൻവലിക്കാം....

ഇ.പി.എഫ് പിൻവലിക്കുന്നത് പ്രയാസകരമാണോ? എന്നാൽ ഇനി പേടിക്കേണ്ട, പണം പിൻവലിക്കുന്നത് കൂടുതൽ എളുപ്പമാക്കുന്നതിന് യു.പി.ഐ വഴി എംപ്ലോയീസ് പ്രൊവിഡന്റ് ഫണ്ട് (ഇപിഎഫ്) ക്ലെയിം സെറ്റിൽമെന്റ് ഓപ്ഷൻ അവതരിപ്പിക്കുന്നതിനെക്കുറിച്ച് സർക്കാർ പരിഗണിക്കുന്നു. പലപ്പോഴും ഇ.പി.എഫ് ക്ലെയിം നിരസിക്കുന്നത് ഇ.പി.എഫ് അം​ഗങ്ങൾക്ക് വളരെ ബുദ്ധിമുട്ടാണ്. 2024 ൽ പുറത്തിറങ്ങിയ ഇപിഎഫ് വാർഷിക റിപ്പോർട്ട് അനുസരിച്ച്, 2023 ൽ മൂന്ന് ഇപിഎഫ് അന്തിമ സെറ്റിൽമെന്റ് ക്ലെയിമുകളിൽ ഒന്ന് നിരസിക്കപ്പെട്ടു.

ഈ പ്രശ്നങ്ങൾക്ക് അവസാനം കൊണ്ടു വരാൻ വേണ്ടിയാണ് യു.പി.ഐ അല്ലെങ്കിൽ എ.ടി.എം വഴി ഇ.പി.എഫ് പിൻവലിക്കൽ സൗകര്യം ഏർപ്പെടുത്തുന്നത് സാമ്പത്തിക നേട്ടം വേഗത്തിലും എളുപ്പത്തിലും ഉറപ്പാക്കും. എന്നാൽ ഈ സൗകര്യം എപ്പോൾ മുതൽ ലഭിക്കും? അതിന്റെ പ്രധാന നേട്ടങ്ങൾ എന്തൊക്കെയാണ്? യു.പി.ഐ, എ.ടി.എം കാർഡുകൾ വഴി ഇ.പി.എഫ് തുക പിൻവലിക്കലിനെക്കുറിച്ചുള്ള എല്ലാ വിവരങ്ങളും അറിയാം...

യു.പി.ഐ വഴി ഇപിഎഫ് തുക എങ്ങനെ പിൻവലിക്കും?

​ഗൂ​ഗിൾ പേ, ഫോൺപേ, പേടിഎം തുടങ്ങിയ യു.പി.ഐ പ്ലാറ്റ്‌ഫോമുകൾ വഴി ഇ.പി.എഫ് അംഗങ്ങൾക്ക് അവരുടെ സമ്പാദ്യം പിൻവലിക്കാം. ഫിനാൻഷ്യൽ എക്‌സ്പ്രസിന്റെ റിപ്പോർട്ട് അനുസരിച്ച്, പുതിയ ഫീച്ചർ അവതരിപ്പിക്കുന്നതിനായി ഇ.പി.എഫ്.ഒ നാഷണൽ പേയ്‌മെന്റ് കോർപ്പറേഷൻ ഓഫ് ഇന്ത്യയുമായി ( എൻ.പി.സി.ഐ ) ചർച്ചകൾ നടത്തിവരികയാണ്.

സർക്കാരിന്റെ ഇ.പി.എഫ്.ഒ 3.0 സംരംഭത്തിന്റെ ഭാഗമായി ഇ.പി.എഫ് അംഗങ്ങൾക്ക് എ.ടി.എമ്മുകൾ വഴി അവരുടെ സംഭാവനകൾ ആക്‌സസ് ചെയ്യാൻ കഴിയുമെന്ന് ലേബർ സെക്രട്ടറി സുമിത ദാവ്‌റ നേരത്തെ എ.എൻ.ഐയോട് പറഞ്ഞിരുന്നു. ഇ.പി.എഫ്.ഒ വരിക്കാർക്ക് എ.ടി.എമ്മുകളിൽ നിന്ന് നേരിട്ട് പ്രൊവിഡന്റ് ഫണ്ട് പിൻവലിക്കാനും സാധിക്കും.

Take a Poll

യു.പി.ഐ വഴിയുള്ള ഇ.പി.എഫ് പിൻവലിക്കൽ എപ്പോൾ നടപ്പിലാക്കും?

ഈ വർഷം മെയ് അല്ലെങ്കിൽ ജൂൺ മാസത്തോടെ യു.പി.ഐ വഴിയുള്ള ഇ.പി.എഫ് പിൻവലിക്കൽ നടപ്പിലാക്കുമെന്നാണ് റിപ്പോർട്ടുകൾ വ്യക്തമാക്കുന്നത്. അതേ സമയം ഇ.പി.എഫ്.ഒ 3.0 പുറത്തിറക്കാനും സർക്കാർ പദ്ധതിയിടുന്നതായി റിപ്പോർട്ടുണ്ട്. 2025 ജൂണോടെ ഇ.പി.എഫ്.ഒ വരിക്കാർക്ക് എ.ടി.എം കാർഡിനായുള്ള പുതിയ മൊബൈൽ ആപ്ലിക്കേഷൻ ആരംഭിക്കുമെന്ന് കേന്ദ്രമന്ത്രി മൻസുഖ് മാണ്ഡവ്യ ജനുവരിയിൽ പറഞ്ഞിരുന്നു.

യു.പി.ഐ വഴിയുള്ള ഫണ്ട് പിൻവലിക്കുന്നതിൻ്റെ ഗുണങ്ങൾ എന്തെല്ലാം?

യു.പി.ഐ വഴിയുള്ള ഇ.പി.എഫ് തുക പിൻവലിക്കുന്നത് ഇ.പി.എഫ്.ഒ അംഗങ്ങളുടെ സമ്പാദ്യം എളുപ്പത്തിൽ ആക്‌സസ് ചെയ്യാൻ സഹായിക്കും. ഏറ്റവും എളുപ്പത്തിൽ ഉപയോ​ഗിക്കാൻ സാധിക്കുന്ന മാർ​ഗമാണ് യു.പി.ഐ. ഈ സൗകര്യം എത്തുന്നതോടെ നിങ്ങൾക്ക് മണിക്കൂറുകൾക്കുള്ളിലോ അല്ലെങ്കിൽ മിനിറ്റുകൾക്കുള്ളിലോ ഫണ്ട് പിൻവലിക്കാൻ സാധിക്കും. നിലവിൽ 2-3 ദിവസം കൊണ്ടാണ് ഇ.പി.എഫ് പിൻവലിക്കുന്നത്.

യുപിഐ വഴിയുള്ള ഇ.പി.എഫ് പിൻവലിക്കൽ പ്രക്രിയ ക്ലെയിം നിരസിക്കാനുള്ള സാധ്യത ഇല്ലാതാക്കുകയും ഇടപാടുകളുടെ സുതാര്യത വർദ്ധിപ്പിക്കുകയും ചെയ്യും.

ഓൺലൈൻ വഴി ഇ.പി.എഫ് ക്ലെയിം നടത്തുന്നതിനുള്ള നിലവിലെ പ്രക്രിയ എന്താണ്?

യു.പി.ഐ അല്ലെങ്കിൽ എ.ടി.എം വഴിയുള്ള ഇ.പി.എഫ് പിൻവലിക്കൽ ഇതുവരെയും ആരംഭിച്ചിട്ടില്ല. അതിനാൽ നിലവിൽ ഇ.പി.എഫ്.ഒ വെബ്സൈറ്റ് വഴിയാണ് ഫണ്ട് ക്ലെയിം ചെയ്യാൻ സാധിക്കുകയുള്ളൂ. ആ പ്രക്രിയയെ കുറിച്ച് വിശദമായി അറിയാം.

• ആദ്യം ഇ.പി.എഫ്.ഒ ​​പോർട്ടൽ സന്ദർശിക്കുക. അതിൽ നിങ്ങളുടെ UAN ഉം പാസ്‌വേഡും ഉപയോഗിച്ച് ലോഗിൻ ചെയ്യുക. ലോഗിൻ ചെയ്യുന്നതിന് ഇരുപത്തിനാല് മണിക്കൂർ മുമ്പ് നിങ്ങളുടെ UAN ആക്ടീവാണെന്ന് ഉറപ്പാക്കുക.

• ഹോം പേജിൽ ഓൺലൈൻ സർവീസസ് ടാബിൽ ക്ലിക്ക് ചെയ്യുക. തുടർന്ന് ഡ്രോപ്പ്ഡൗൺ മെനുവിൽ നിന്ന് ഓൺലൈൻ സർവീസസ് ടാബ് തിരഞ്ഞെടുക്കുക.

• ബാങ്ക് വിവരങ്ങൾ നൽകി 'പരിശോധിക്കുക' ക്ലിക്ക് ചെയ്യുക.

• നിങ്ങൾക്ക് ആവശ്യമുള്ള പിൻവലിക്കൽ ടൈപ്പ് തിരഞ്ഞെടുക്കുക.

• പി.എഫ് അഡ്വാൻസ് ഫോം ഉപയോഗിച്ച് നിങ്ങളുടെ അപേക്ഷ സമർപ്പിക്കുക. ഫോം 19 പി.എഫ് ഫൈനൽ സെറ്റിൽമെന്റിനുള്ളതാണ്, ഫോം 31 പി.എഫ് പിൻവലിക്കലിനുള്ളതാണ്.

• പരിശോധനയ്ക്കായി ആവശ്യമായ രേഖകൾ നൽകുക. നിങ്ങളുടെ UAN-മായി ലിങ്ക് ചെയ്‌തിരിക്കുന്ന ബാങ്ക് അക്കൗണ്ടിന്റെ വിവരങ്ങൾ നൽകിയിട്ടുണ്ടെന്ന് ഉറപ്പാക്കുക.