ശമ്പളം 30,000 ആണോ? റിട്ടയർമെന്റ് സമ്പാദ്യമായി 2.93 കോടി നേടാം, ഇങ്ങനെ നിക്ഷേപിക്കൂ

നിക്ഷേപങ്ങൾ എപ്പോഴും ജീവിതത്തിന് സുരക്ഷിതത്വം നൽകുന്നവയാണ്. റിട്ടയർമെന്റ് ജീവിതത്തിൽ ഇത്തരം നിക്ഷേപങ്ങൾ വലിയ രീതിയിൽ ഗുണം ചെയ്യും. അതിനായി, നേരത്തെ തന്നെ നിക്ഷേപിച്ച് തുടങ്ങണം. എന്നാൽ, ശമ്പളത്തിൽനിന്ന് മിച്ചം പിടിച്ച് നിക്ഷേം നടത്താൻ സാധിക്കുന്നില്ലെന്ന് പരാതിപ്പെടുന്നവരാണ് ഏറെയും. അതൊരിക്കലും ശരിയല്ല. അച്ചടക്കവും തന്ത്രപരവുമായ പ്ലാൻ ഉപയോഗിച്ച് ആർക്കും നിക്ഷേപിക്കാനും ഭാവിയിൽ നല്ലൊരു സമ്പാദ്യം നേടിയെടുക്കാനും കഴിയും.

റിട്ടയർമെന്റ് സമയത്തെ ഫണ്ടിനായി ശമ്പളത്തിന്റെ ഒരു ഭാഗം നിക്ഷേപിക്കാൻ ആഗ്രഹിക്കുന്നുവെങ്കിൽ, ചെറിയ തുക കൊണ്ട് പോലും വലിയ മൂലധനം നിർമ്മിക്കാൻ നിങ്ങളെ സഹായിക്കുന്ന നിരവധി നിക്ഷേപ ഓപ്ഷനുകൾ ലഭ്യമാണ്. ഏറ്റവും ജനപ്രിയവും ഫലപ്രദവുമായ ഓപ്ഷനുകളിലൊന്നാണ് മ്യൂച്വൽ ഫണ്ട് എസ്ഐപി (സിസ്റ്റമാറ്റിക് ഇൻവെസ്റ്റ്‌മെന്റ് പ്ലാൻ). ശമ്പളത്തിന്റെ ഒരു ഭാഗം എസ്ഐപിയിൽ നിക്ഷേപിക്കുന്നതിലൂടെ കാലക്രമേണ കോടീശ്വരരാകാം.

30,000 രൂപ വരുമാനത്തിൽനിന്ന് 2.93 കോടി എങ്ങനെ സമ്പാദിക്കാം?

പ്രതിമാസം 30,000 രൂപ സമ്പാദിക്കുന്നുണ്ടെങ്കിൽ, അതിൽ കുറച്ച് തുക നിക്ഷേപത്തിനായി മാറ്റിവയ്ക്കണം. ഭാവിക്കായി പണം മാറ്റിവയ്ക്കാൻ 70:15:15 എന്ന നിയമം പ്രയോജനകരമാണ്. ഈ ഫോർമുല അനുസരിച്ച്, ശമ്പളത്തിന്റെ 70 ശതമാനം ദൈനംദിന ജീവിതച്ചെലവുകൾക്കായി നീക്കിവയ്ക്കണം. 15 ശതമാനം എമർജൻസി ഫണ്ടിനായി നീക്കിവയ്ക്കണം, ബാക്കി 15 ശതമാനം ഓരോ മാസവും എസ്ഐപിയിൽ നിക്ഷേപിക്കണം.

നിങ്ങൾ പ്രതിമാസം 30,000 രൂപ സമ്പാദിക്കുന്നുവെന്ന് കരുതുക. ജീവിതച്ചെലവിനായി 70% മാറ്റിവയ്ക്കുക. ഈ തുക 21,000 രൂപയാണ്. ജീവിതത്തിലെ എല്ലാ അവശ്യ ചെലവുകളും വഹിക്കാൻ ഈ തുക ഉപയോഗിക്കണം. എമർജൻസി ഫണ്ടിനായി 15%. അതായത് ഒരു എമർജൻസി ഫണ്ടിനായി ഓരോ മാസവും 4,500 രൂപ നീക്കിവെക്കുക. പ്രതിസന്ധി ഘട്ടങ്ങളിലും ഈ തുക നിക്ഷേപിക്കുന്നുവെന്ന് ഉറപ്പാക്കുക. എസ്ഐപി നിക്ഷേപങ്ങൾക്ക് 15%. ബാക്കി 4,500 രൂപ ഓരോ മാസവും എസ്ഐപിയിൽ നിക്ഷേപിക്കുക.

35 വർഷത്തേക്ക് എല്ലാ മാസവും 4,500 രൂപ നിക്ഷേപിക്കുകയാണെങ്കിൽ, മൊത്തം 18,90,000 രൂപ നിക്ഷേപിക്കപ്പെടും. 12 ശതമാനം പലിശ കണക്കാക്കിയാൽ 35 വർഷത്തിനുള്ളിൽ ഏകദേശം 2,73,38,711 രൂപ മൂലധന നേട്ടം പ്രതീക്ഷിക്കാം. 12 ശതമാനം റിട്ടേണിൽ നിക്ഷേപം 35 വർഷത്തിനുള്ളിൽ ഏകദേശം 2,92,28,711 രൂപയായി വളരും.

എസ്ഐപി വിപണിയുമായി ബന്ധപ്പെട്ട സ്കീമാണെന്ന് അറിയുക. അതിനാൽ റിട്ടേണുകൾക്ക് ഉറപ്പില്ല. മുകളിൽ സൂചിപ്പിച്ച 12 ശതമാനം റിട്ടേൺ ഒരു എസ്റ്റിമേറ്റ് ആണ്, വിപണി സാഹചര്യങ്ങളെ ആശ്രയിച്ച് ഇതിൽ വ്യത്യാസം വരാം. ഉദാഹരണത്തിന്, നിങ്ങളുടെ നിക്ഷേപങ്ങൾക്ക് 14 ശതമാനം റിട്ടേൺ നൽകുന്നുവെങ്കിൽ, 35 വർഷത്തിന് ശേഷം നിങ്ങളുടെ ആകെ തുക 5,05,46,187 രൂപയായി ഉയരാം.

വിപണി അപകടസാധ്യതകൾ നിലനിൽക്കുന്നുവെങ്കിലും എസ്ഐപി പലപ്പോഴും സമ്പത്ത് സൃഷ്ടിക്കുന്നതിനുള്ള നല്ലൊരു ഓപ്ഷനായി കണക്കാക്കപ്പെടുന്നു. എങ്കിലും, എസ്ഐപിയിൽ നിക്ഷേപിക്കുന്നതിന്റെ അപകടസാധ്യതകൾ മനസ്സിൽ വയ്ക്കുകയും അതിനനുസരിച്ച് പ്ലാൻ ചെയ്യുകയും ചെയ്യുക.