5 വർഷത്തേക്ക് പ്രീമിയം അടച്ചാൽ ജീവിതകാലം മുഴുവൻ വരുമാനം നേടാം: എൽഐസിയുടെ കിടിലൻ സ്കീം

ജോലിയിൽനിന്ന് വിരമിച്ചതിന് ശേഷമുള്ള ജീവിതം സാമ്പത്തികമായി സുരക്ഷിതമാക്കാൻ സഹായിക്കുന്ന ഒരു മികച്ച പദ്ധതിയാണ് എൽഐസി ജീവൻ ഉത്സവ്. ഓഹരി വിപണിയുടെ ചാഞ്ചാട്ടങ്ങൾ ബാധിക്കാത്ത, ആജീവനാന്തം സ്ഥിരമായ വരുമാനം ഉറപ്പാക്കുന്ന ഒരു പോളിസിയാണ് ഇത്. അതിനാൽ റിട്ടയർമെന്റ് കാലം ടെൻഷനില്ലാതെ ജീവിക്കാൻ ഈ പ്ലാനിലൂടെ സാധിക്കും. ജോലിയിൽ വരുമാനം ലഭിക്കുമ്പോളും ആജീവനാന്തം സുരക്ഷിതമായി ജീവിക്കാനുള്ള വകയൊന്നും പലർക്കും ഉണ്ടാവില്ല. അത്തരം ആളുകൾക്ക് ഈ പദ്ധതി ഒരു മികച്ച അനുഭവം നൽകുന്നു.

പോളിസിയുടെ പ്രധാന സവിശേഷതകൾ

സ്ഥിര വരുമാനം: ജീവിതാവസാനം വരെ ഉറപ്പായ ഒരു സ്ഥിര വരുമാനം ഈ പോളിസിയിലൂടെ ലഭിക്കും.

ഇൻഷുറൻസ് പരിരക്ഷ: ജീവൻ ഉത്സവത്തിലൂടെ ലൈഫ് ഇൻഷുറൻസ് പരിരക്ഷയും ഉറപ്പാക്കാം.

പലിശ: 5.5% പലിശ നിരക്കിൽ പോളിസി ലോണും ഈ സ്കീമിലൂടെ ലഭ്യമാക്കാം.

പ്രായം : ജനിച്ച് 90 ദിവസം മുതൽ 65 വയസ്സ് വരെയുള്ള വ്യക്തികൾക്ക് ഈ പോളിസി ലഭ്യമാണ്.

കാലാവധി: നിങ്ങളുടെ ആവശ്യങ്ങൾക്ക് അനുയോജ്യമായ ഒരു പ്രീമിയം പേയ്‌മെന്റ് കാലാവധി തിരഞ്ഞെടുക്കാം. 5 മുതൽ 16 വർഷം വരെയാണ് ഈ കാലാവധിയുടെ ദൈർഘ്യം.

ആജീവനാന്ത ​ഗ്യാരണ്ടി

ഈ പോളിസിയുടെ മറ്റു പ്രത്യേകതകളെ കുറിച്ച് ഉദാഹരണ സഹിതം പറയാം. അതായത്, നിങ്ങൾ 5 ലക്ഷം രൂപ സം അഷ്വേർഡുള്ള 5 വർഷത്തെ പ്രീമിയം കാലാവധിയുമുള്ള ഒരു പോളിസി തിരഞ്ഞെടുക്കുകയാണെങ്കിൽ, ഈ കാലാവധിക്ക് നിങ്ങളുടെ വാർഷിക പ്രീമിയം ഏകദേശം 1.16 ലക്ഷം രൂപയായിരിക്കും. എന്നാൽ ഇതിനു ശേഷം 5 വർഷത്തെ കാത്തിരിപ്പ് കാലയളവ് കൂടെയുണ്ട്. അതായത് പോളിസി ആരംഭിച്ച് 10 വർഷത്തിനുള്ളിലാണ് നിങ്ങൾക്ക് പോളിസിയുടെ ആനുകൂല്യങ്ങൾ ലഭിച്ചു തുടങ്ങുന്നത്.

പത്ത് വർഷത്തിനു ശേഷം പതിനൊന്നാം വർഷം മുതൽ സം അഷ്വേർഡിന്റെ 10% വാർഷിക പേഔട്ട് നിങ്ങൾക്ക് ലഭിക്കാൻ തുടങ്ങും. അതായത്, എല്ലാ വർഷവും 50,000 രൂപ വീതം ആജീവനാന്തം നിങ്ങൾക്ക് പണം ലഭിക്കുന്നു. ഈ തുക എല്ലാ വർഷവും കൃത്യമായി ലഭിക്കുന്നു.

പണം പിൻവലിക്കാതെ നിക്ഷേപം വളർത്താം

നിങ്ങൾക്ക് ലഭിക്കുന്ന വാർഷിക പേഔട്ട് പിൻവലിക്കണമെന്ന് നിർബന്ധമില്ല. ഈ തുക നിങ്ങൾക്ക് വളർത്തണമെന്നാണ് ആ​ഗ്രഹമെങ്കിൽ പണം പിൻവലിതക്കാതെ എൽഐസിയിൽ തന്നെ നിലനിർത്താം. അത് പ്രതിവർഷം 5.5% നിരക്കിൽ കൂട്ടുപലിശയുടെ നേട്ടത്തോടെ നിക്ഷേപം വളർത്താൻ അനുവദിക്കുന്നു. പോളിസി ഉടമ ഈ കാലയളവിൽ മരണപ്പെട്ടാൽ ബാധകമായ മറ്റ് ആനുകൂല്യങ്ങൾക്കൊപ്പം നോമിനിക്ക് സം അഷ്വേർഡ് ലഭിക്കും.

സാമ്പത്തിക സുരക്ഷ

ജീവൻ ഉത്സവ് താരതമ്യേന കുറഞ്ഞ വാർഷിക പ്രീമിയത്തിൽ ആജീവനാന്ത ഉറപ്പുള്ള വരുമാനം തരുന്ന ഒരു മികച്ച പോളിസിയാണ്. നിങ്ങളുടെ ഭാവി സുരക്ഷിതമാക്കുന്നതിനും റിട്ടയർമെൻ്റ് ജീവിതം ആസ്വദിക്കുന്നതിനും ഈ സ്കീം നിങ്ങളെ സഹായിക്കും. പോളിസിയുടെ നേട്ടം ജീവിതകാലം മുഴുവൻ ലഭിക്കുന്നു എന്നതാണ് മറ്റു സ്കീമുകളിൽ നിന്നും ജീവൻ ഉത്സവിനെ വ്യത്യസ്തമാക്കുന്നത്.

അറിയിപ്പ്: ഇവിടെ പ്രകടിപ്പിച്ചിട്ടുള്ള അഭിപ്രായങ്ങളും നിർദ്ദേശങ്ങളും വ്യക്തിഗത വിശകലന വിദഗ്ദ്ധരുടെയോ സ്ഥാപനങ്ങളുടെയോ മാത്രം കാഴ്ചപ്പാടുകളാണ്. ഇത് Goodreturns.in-ന്റെയോ Greenium Information Technologies Private Limited-ന്റെയോ നിലപാടുകളെ പ്രതിഫലിക്കുന്നില്ല. ഈ ഉള്ളടക്കത്തിന്റെ കൃത്യത, പൂർണ്ണത, അല്ലെങ്കിൽ വിശ്വാസ്യത എന്നിവയ്ക്ക് ഞങ്ങൾ യാതൊരു ഉറപ്പും നൽകുന്നില്ല, മാത്രമല്ല അതിന് ഉത്തരവാദിത്തം ഏറ്റെടുക്കുന്നുമില്ല.

ഞങ്ങൾ ഏതെങ്കിലും തരത്തിലുള്ള നിക്ഷേപ ഉപദേശങ്ങൾ നൽകുകയോ, ഓഹരികൾ വാങ്ങാനോ വിൽക്കാനോ ശുപാർശ ചെയ്യുകയോ ചെയ്യുന്നില്ല. ഈ വിവരങ്ങൾ വിജ്ഞാനപ്രദമായ ആവശ്യങ്ങൾക്ക് മാത്രമുള്ളതാണ്. അതിനാൽ, ഏതെങ്കിലും നിക്ഷേപ തീരുമാനങ്ങൾ എടുക്കുന്നതിന് മുൻപ്, ലൈസൻസുള്ള ഒരു സാമ്പത്തിക ഉപദേഷ്ടകനുമായി കൂടിയാലോചിക്കുന്നത് നിർബന്ധമാണ്.