ശനിയും ഞായറും പോക്കറ്റ് കാലിയാകാതെ ഷോപ്പ് ചെയ്യാം: ആജീവനാന്ത സൗജന്യ ക്രെഡിറ്റ് കാർഡുമായി ഫെഡറൽ ബാങ്ക്

വാരാന്ത്യ ചെലവുകൾക്കായി ഒരു ക്രെഡിറ്റ് കാർഡ് ആവശ്യമുണ്ടോ? ജോലിയിൽ നിന്നും ഇടവേള ലഭിക്കുന്ന ശനി, ഞായർ തിയ്യതികളിൽ പോക്കറ്റ് കാലിയാവാതെ പർച്ചേസ് ചെയ്യാൻ ആ​ഗ്രഹിക്കുന്നവർക്കായി പുതിയ ക്രെഡിറ്റ് കാർഡ് പുറത്തിറക്കിയിരിക്കുകയാണ് ഫെഡറൽ ബാങ്ക്. അതെ ഫെഡറൽ ബാങ്ക് Fi.Money യുമായി സഹകരിച്ച് മാഗ്നിഫൈ Fi-ഫെഡറൽ ക്രെഡിറ്റ് കാർഡ് എന്ന പേരിൽ ഒരു കോ-ബ്രാൻഡഡ് കാർഡ് അവതരിപ്പിച്ചിരിക്കുന്നു.

വാരാന്ത്യങ്ങളിൽ ആമസോൺ, സൊമാറ്റോ, സെപ്‌റ്റോ, ബുക്ക്‌മൈഷോ തുടങ്ങിയ പ്ലാറ്റ്‌ഫോമുകളിൽ ഓൺലൈൻ ഷോപ്പിംഗ് ചെയ്യുന്നവരെ ലക്ഷ്യമിട്ടാണ് ഈ കാർഡ് രൂപകൽപ്പന ചെയ്തിരിക്കുന്നത്. ഈ കാർഡുകളെ ഓഫറുകളെ കുറിച്ചും, മറ്റു പ്രത്യേകതകളും അറിയാം;

റിവാർഡും ക്യാഷ്ബാക്കും

ശനി, ഞായർ തിയ്യതികളിൽ ഈ കാർഡിലൂടെ 100 രൂപ ചെലവഴിച്ചാൽ നിങ്ങൾക്ക് 5 രൂപ വിലമതിക്കുന്ന 20 Fi-പോയിന്റുകൾ ലഭിക്കും. അതായത് 5 ശതമാനം ക്യാഷ്ബാക്ക് ലഭിക്കുന്നു. ഇത്തരത്തിൽ പ്രതിമാസം 2,000 റിവാർഡ് പോയിന്റുകൾ വരെ കാർഡ് ഉടമകൾക്ക് നേടാൻ സാധിക്കും. ഇത് വാരാന്ത്യ ചെലവുകളിൽ 500 രൂപ ക്യാഷ്ബാക്കിന് തുല്യമാണ്.

തിങ്കൾ മുതൽ വെള്ളി വരെ ഈ കാർഡ് ഉപയോ​ഗിച്ച് നിങ്ങൾ 100 രൂപ ചെലവഴിച്ചാൽ, 0.5 രൂപ വിലമതിക്കുന്ന 2 Fi-പോയിന്റുകളാണ് ലഭിക്കുക.

ശനിയും, ഞായറും ആമസോൺ, ബുക്ക് മൈഷോ, സെപ്‌റ്റോ, സൊമാറ്റോ എന്നീ പ്ലാറ്റ്ഫോമുകളിൽ 500 രൂപക്ക് മുകളിൽ ചിലവഴിച്ചാൽ 20 ശതമാനം കിഴിവുണ്ട്. അതായത് പ്രതിമാസം ഓരോ ബ്രാൻഡിൻ്റെ ഇടപാടുകൾക്കും 100 രൂപ വരെ ലഭിക്കും.

ഫൈ-പോയിന്റുകൾ

റിവാർഡുകൾ ഫൈ-പോയിന്റുകളായിട്ടാണ് ക്രെഡിറ്റ് ചെയ്യപ്പെടുന്നത്. 4 ഫൈ-പോയിന്റുകൾ എന്നാൽ 1 രൂപയാണ്, ഈ അടിസ്ഥാനത്തിലാണ് കണക്കാക്കുക. എയർ മൈലുകൾ, ഫ്ലൈറ്റ് ഡിസ്കൗണ്ടുകൾ, കാർഡ് ബിൽ പേയ്‌മെന്റുകൾ അല്ലെങ്കിൽ 50% വരെ കിഴിവുള്ള ഗിഫ്റ്റ് വൗച്ചറുകൾ എന്നിവയ്ക്കായി ഫൈ-പോയിന്റുകൾ റിഡീം ചെയ്യാം.

പ്രധാന ചാർജുകൾ

മാഗ്നിഫൈ ഫൈ-ഫെഡറൽ ക്രെഡിറ്റ് കാർഡിന് ജോയിനിം​ഗ് ഫീസോ വാർഷിക ഫീസോ ഇല്ല. പക്ഷേ പ്രതിമാസം 3.75% ഫിനാൻസ് ചാർജ് ഈടാക്കുന്നുണ്ട്. മാത്രമല്ല സ്റ്റേറ്റ്മെന്റ് ബാലൻസിന്റെ അടിസ്ഥാനത്തിൽ വൈകിയ പേയ്‌മെന്റുകൾക്ക് 2,000 രൂപ വരെ പിഴ ഈടാക്കും. ഫോറെക്സ് ഇടപാടുകൾക്ക് 3.50 ശതമാനമാണ് മാർക്ക്അപ്പ് ഫീസ്.

ഈ കാർഡ് വാങ്ങുന്നോ?

ശനി, ഞായർ ദിവസങ്ങളിൽ പർച്ചേസ് ചെയ്യുന്നവർക്ക് ഇതുപോലൊരു ആജീവനാന്ത സൗജന്യ ക്രെഡിറ്റ് കാർഡ് നല്ലതാണ്. എല്ലാ ആഴ്ചയും റിവാർഡ് പോയിൻ്റും ക്യാഷ്ബാക്കും സ്വന്തമാക്കാം.

എന്നാൽ ദൈനംദിന ആവശ്യങ്ങൾക്ക് കാർഡ് ഉപയോ​ഗിക്കുവാൻ സാധിക്കില്ല എന്നത് വലിയൊരു പോരായ്മയാണ്. അതായത് ഇൻഷുറൻസ്, വാടക, യൂട്ടിലിറ്റികൾ, വാലറ്റുകൾ, സർക്കാർ ഇടപാടുകൾ തുടങ്ങിയ ആവശ്യങ്ങളൊന്നും ഈ കാർഡിൽ ഉൾക്കൊള്ളുന്നില്ല. ഇത് സാധാരണക്കാരുടെ ഉപയോ​ഗം കുറക്കുന്നതിന് കാരണമാവുന്നു.

നിങ്ങൾ ശനി, ഞായർ ദിവസങ്ങളിലാണ് കൂടുതലും പർച്ചേസ് ചെയ്യുന്നതെങ്കിൽ, വാർഷിക ഫീസ് ആവശ്യമെങ്കിൽ ഈ കാർഡിന് അപേക്ഷിക്കാം. പക്ഷേ ദൈനംദിന ആവശ്യങ്ങൾക്കും, ഉയർന്ന നേട്ടങ്ങൾ ആ​ഗ്രഹിക്കുന്നവർക്കും ഈ കാർഡ് ഉപകാരപ്രദമാവില്ല.

അറിയിപ്പ്: ഇവിടെ പ്രകടിപ്പിച്ചിട്ടുള്ള അഭിപ്രായങ്ങളും നിർദ്ദേശങ്ങളും വ്യക്തിഗത വിശകലന വിദഗ്ദ്ധരുടെയോ സ്ഥാപനങ്ങളുടെയോ മാത്രം കാഴ്ചപ്പാടുകളാണ്. ഇത് Goodreturns.in-ന്റെയോ Greenium Information Technologies Private Limited-ന്റെയോ നിലപാടുകളെ പ്രതിഫലിക്കുന്നില്ല. ഈ ഉള്ളടക്കത്തിന്റെ കൃത്യത, പൂർണ്ണത, അല്ലെങ്കിൽ വിശ്വാസ്യത എന്നിവയ്ക്ക് ഞങ്ങൾ യാതൊരു ഉറപ്പും നൽകുന്നില്ല, മാത്രമല്ല അതിന് ഉത്തരവാദിത്തം ഏറ്റെടുക്കുന്നുമില്ല.

ഞങ്ങൾ ഏതെങ്കിലും തരത്തിലുള്ള നിക്ഷേപ ഉപദേശങ്ങൾ നൽകുകയോ, ഓഹരികൾ വാങ്ങാനോ വിൽക്കാനോ ശുപാർശ ചെയ്യുകയോ ചെയ്യുന്നില്ല. ഈ വിവരങ്ങൾ വിജ്ഞാനപ്രദമായ ആവശ്യങ്ങൾക്ക് മാത്രമുള്ളതാണ്. അതിനാൽ, ഏതെങ്കിലും നിക്ഷേപ തീരുമാനങ്ങൾ എടുക്കുന്നതിന് മുൻപ്, ലൈസൻസുള്ള ഒരു സാമ്പത്തിക ഉപദേഷ്ടകനുമായി കൂടിയാലോചിക്കുന്നത് നിർബന്ധമാണ്.