ബാങ്ക് എഫ്ഡിയേക്കാൾ പലിശ നേടാം, പണം വളർത്താനുള്ള വഴി ഇതാണ്, നിക്ഷേപം സ്ത്രീകളുടെ പേരിൽ

ഭാവി ജീവിതം സാമ്പത്തികമായി സുരക്ഷിതമാക്കാനുള്ള ഏറ്റവും മികച്ച മാർഗം നിക്ഷേപമാണ്. വിപണിയിൽ നിരവധി ചെറുകിട നിക്ഷേപ പദ്ധതികൾ കാണാം. ഉറപ്പായ വരുമാനം, സുരക്ഷ എന്നതിനപ്പുറം നിരവധി ആനുകൂല്യങ്ങളും ചെറുകിട നിക്ഷേപ പദ്ധതികൾ വാഗ്ധാനം ചെയ്യുന്നുണ്ട്. നിരവധി നിക്ഷേപ പദ്ധതികളുള്ളത് കൊണ്ടു തന്നെ ഏറ്റവും അനുയോജ്യമായവ തന്നെ തിരഞ്ഞെടുക്കാൻ പ്രത്യേകം ശ്രദ്ധിക്കണം.

സ്ത്രീകളിലെ സാമ്പാദ്യ ശീലം വളർത്തിയെടുക്കുക എന്ന ലക്ഷ്യത്തോടെ കേന്ദ്രസർക്കാർ ആവിഷ്ക്കരിച്ച നിക്ഷേപ പദ്ധതിയാണ് മഹിളാ സമ്മാൻ സേവിംഗ്സ് സർട്ടിഫിക്കറ്റ്. പദ്ധതിയുടെ വിശദാംശങ്ങൾ നോക്കാം

പരമാവധി 2 ലക്ഷം

സ്ത്രീകളുടേയും പെണ്‍കുട്ടികളുടേയും പേരില്‍ മഹിളാ സമ്മാൻ സേവിംഗ്സ് സർട്ടിഫിക്കറ്റ് അക്കൗണ്ട് എടുക്കാം. രണ്ട് വർഷമാണ് നിക്ഷേപ കാലാവധി. അതുപൊലെ രണ്ട് ലക്ഷം രൂപയാണ് പരമാവധി നിക്ഷേപ തുക.

എഫ്ഡിയേക്കാൾ ഉയർന്ന പലിശ

പ്രതിവർഷം 7.50 ശതമാനം പലിശയാണ് മഹിളാ സമ്മാൻ സേവിംഗ്സ് സർട്ടിഫിക്കറ്റ് നിക്ഷേപത്തിന് ലഭിക്കുക. രാജ്യത്തെ ബാങ്കുകൾ 2 വർഷത്തെ സ്ഥിര നിക്ഷേപത്തിന് നൽകുന്ന പലിശ നിരക്കിനേക്കാൾ ഉയർന്ന പലിശയാണ് മഹിളാ സമ്മാൻ സേവിംഗ്സ് സർട്ടിഫിക്കറ്റിലൂടെ ലഭിക്കുന്നത് എന്ന് സാരം.

നേരത്തെ പിൻവലിക്കാം

നിക്ഷേപം ആരംഭിച്ച് 1 വര്‍ഷം പൂര്‍ത്തിയായാല്‍ 40 ശതമാനം തുക പിന്‍വലിക്കാന്‍ സാധിക്കും. കാലാവധിക്ക് മുന്‍പ് നിക്ഷേപം പിന്‍വലിച്ചാല്‍ പലിശ 2 ശതമാനം കുറച്ചാണ് അനുവദിക്കുക. അക്കൗണ്ട് ഉടമ മരണപ്പെട്ടാലോ ഗുരുതര രോഗം ബാധിച്ചാലോ രക്ഷിതാവിന്‍റെ മരണം എന്നീ ഘട്ടങ്ങളില്‍ പിഴയില്ലാതെ നിക്ഷേപം പിന്‍വലിക്കാം. നിക്ഷേപം ആരംഭിച്ച് 6 മാസത്തിനകം പിഴയില്ലാതെ പണം പിന്‍വലിക്കാം.

എങ്ങനെ പദ്ധതിയിൽ ചേരാം..?

2025 മാര്‍ച്ച് 31-ന് മുന്‍പ് മഹിള സമ്മാൻ സേവിം​ഗ്സ് സർട്ടിഫിക്കറ്റിൽ അക്കൗണ്ടെടുക്കണം. അടുത്തുള്ള പോസ്റ്റ് ഓഫീസ് വഴിയോ ബാങ്ക് വഴിയോ പദ്ധതിയില്‍ ചേരാം. അതായത് എസ്ബിഐ, ബാങ്ക് ഓഫ് ബറോഡ, കാനറ ബാങ്ക്, സെൻട്രൽ ബാങ്ക് ഓഫ് ഇന്ത്യ എന്നിവയിലെല്ലാം അക്കൗണ്ട് തുറക്കാൻ ആകും. എല്ലാ പ്രമുഖ സ്വകാര്യ ബാങ്കുകളിലും പദ്ധതിക്ക് കീഴിൽ അക്കൗണ്ട് തുറക്കാം.

ബാങ്കുകളിലോ പോസ്റ്റ് ഓഫീസുകളിലോ ചെന്ന് മഹിളാ സമ്മാൻ സേവിംഗ്സ് സർട്ടിഫിക്കറ്റിനുള്ള അപേക്ഷാ ഫോം പൂരിപ്പിച്ച് നൽകുക. പേര്, വിലാസം, പാൻ നമ്പർ എന്നിവയുൾപ്പെടെയുള്ള വിവരങ്ങൾ നൽകേണ്ടി വരും. അപേക്ഷാ ഫോമിനൊപ്പം, ആധാർ കാർഡും പാൻ കാർഡും പോലുള്ള കെവൈസി രേഖകളും നൽകണം. നിക്ഷേപം നടത്തിയതിന് ശേഷം ഒരു സർട്ടിഫിക്കറ്റ് ലഭിക്കും. ഇത് സുരക്ഷിതമായി സൂക്ഷിക്കണം.

മഹിളാ സമ്മാന് സേവിംഗ്സ് സർട്ടിഫിക്കറ്റ് - കാൽക്കുലേറ്റർ

മഹിളാ സമ്മാന് സേവിംഗ്സ് സർട്ടിഫിക്കറ്റിൽ 50,000 രൂപ നിക്ഷേപിച്ചാൽ രണ്ട് വർഷത്തിനുള്ളിൽ ആകെ ലഭിക്കുന്ന പലിശ എന്നത് 8,011 രൂപയായിരിക്കും. അതായത് കാലാവധി പൂർത്തിയാകുമ്പോൾ നിക്ഷേപകന് 58,011 രൂപ ലഭിക്കും.

നിക്ഷേപിക്കുന്ന തുക 1 ലക്ഷമാണെങ്കിലോ...7.5 ശതമാനം പലിശ കണക്കാക്കിയാൽ രണ്ട് വർഷം കൊണ്ട് പലിശയിനത്തിൽ മാത്രം 16,022 രൂപ നേടാൻ സാധിക്കു. അതായത് കാലാവധി പൂർത്തിയാകുമ്പോൾ ലഭിക്കുന്ന തുക എന്നത് 1,16,022 രൂപയായിരിക്കും.

ഇനി നിങ്ങൾ 1.5 ലക്ഷം രൂപയാണ് നിക്ഷേപിക്കുന്നത് എന്ന് കരുതുക. അങ്ങനെയെങ്കിൽ നിങ്ങൾക്ക് പലിശയിനത്തിൽ 24,033 രൂപ പലിശയിനത്തിൽ മാത്രം നേടാം.

മഹിളാ സമ്മാന് സേവിംഗ്സ് സർട്ടിഫിക്കറ്റിൽ ഏറ്റവും ഉയർന്ന തുകയായ 2 ലക്ഷം രൂപ നിക്ഷേപിച്ചാൽ 32,044 രൂപ പലിശയായി ലഭിക്കും. അതായത് 2 വർഷം കഴിയുമ്പോൾ ആകെ 2,32,044 രൂപ നേടാൻ സാധിക്കും.

ചുരുങ്ങിയ സമയത്തിനുള്ളിൽ പലിശയിനത്തിൽ മാത്രം ഉയർന്ന തുക കണ്ടെത്താം എന്നതാണ് മഹിളാ സമ്മാന് സേവിംഗ്സ് സർട്ടിഫിക്കറ്റിന്‍റെ ഏറ്റവും മികച്ച ഗുണം. കേന്ദ്ര സർക്കാർ പദ്ധതിയായത് കൊണ്ടു തന്നെ നിക്ഷേപം സുരക്ഷിതവുമായിരിക്കും.