സെപ്തംബര്‍ മുതല്‍ മാരുതി സുസുക്കി കാറുകളുടെ വില ഉയരും

അടുത്ത് തന്നെ ഒരു കാര്‍ വാങ്ങിക്കുവാന്‍ നിങ്ങള്‍ക്ക് പ്ലാന്‍ ഉണ്ടെങ്കില്‍ അല്‍പ്പം നിരാശാജനകമായ ഒരു വാര്‍ത്തയാണ് ഇനി പറയുവാന്‍ പോകുന്നത് രാജ്യത്തെ ഏറ്റവും വലിയ കാര്‍ നിര്‍മാതാക്കളായ മാരുതി സുസുക്കി തങ്ങളുടെ കാര്‍ മോഡലുകളുടെ വില വീണ്ടും ഉയര്‍ത്തുവാനുള്ള തീരുമാനം കൈക്കൊണ്ടു കഴിഞ്ഞു. അതിനാല്‍ തന്നെ സെപ്തംബര്‍ മാസം മുതല്‍ കാര്‍ വാങ്ങിക്കുന്നതിനായി നിങ്ങള്‍ കൂടുതല്‍ തുക ചിലവഴിക്കേണ്ടതായി വരും.

കഴിഞ്ഞ ഒരു വര്‍ഷത്തിനുള്ളില്‍ കാറുകളുടെ നിര്‍മാണച്ചിലവ് വളരെയധികം മുകളിലേക്ക് ഉയര്‍ന്നുവെന്ന് മാരുതി പുറത്തിറക്കിയിരിക്കുന്ന ഔദ്യോഗിക പ്രസ്താവനയില്‍ വ്യക്തമാക്കി. നിര്‍മാണച്ചിലവിലെ ഈ കുതിച്ചു ചാട്ടത്തിന്റെ ഒരു വിഹിതമാണ് വില വര്‍ധനയെന്ന രീതിയില്‍ ഉപയോക്താക്കളുമായി കമ്പനി പങ്കുവയ്ക്കുന്നത്.

എന്നാല്‍ എത്ര തുകയായിരിക്കും കാര്‍ മോഡലുകള്‍ വിലയില്‍ വര്‍ധനവ് വരുത്തുക എന്ന കാര്യം മാരുതി ഇതുവരെ വ്യക്തമാക്കിയിട്ടില്ല. കഴിഞ്ഞ മാസം, അതായത് ജൂലൈയിലും സിഎന്‍ജി കാറുകളുടെ വില വര്‍ധിപ്പിക്കുന്നത് സംബന്ധിച്ച് കമ്പനി പ്രഖ്യാപനം നടത്തിയിരുന്നു. സ്വിഫ്റ്റ് മോഡല്‍ കാറിന്റെയും മറ്റെല്ലാ സിഎന്‍ജി മോഡലുകളുടേയും വില മാരുതി ജൂലൈ മാസത്തില്‍ വര്‍ധിപ്പിക്കുകയും ചെയ്തിരുന്നു.

നിര്‍മാണച്ചിലവിലുണ്ടായ വര്‍ധനവ് തന്നെയാണ് ജൂലൈ മാസത്തില്‍ സിഎന്‍ജി മോഡല്‍ കാറുകളുടെ വില വര്‍ധിപ്പിച്ചപ്പോഴും മാരുതി സുസുക്കി കാരണമായി പറഞ്ഞത്. 15,000 രൂപ വരെയാണ് ഇത്തരം മോഡലുകളുടെ വില കഴിഞ്ഞ മാസം കമ്പനി ഉയര്‍ത്തിയത്. നേരത്തേ, കഴിഞ്ഞ ഏപ്രില്‍ മാസത്തിലും നിര്‍മാണ ചിലവുകളിലെ വര്‍ധനവ് ചൂണ്ടിക്കാട്ടി മാരുതി തങ്ങളുടെ പല മോഡല്‍ കാറുകളുടേയും വില ഉയര്‍ത്തിയിരുന്നു. അതിന് മുമ്പായി ജനുവരി മാസത്തിലും അസംസ്‌കൃത വസ്തുക്കളുടെ വില വര്‍ധനവും നിര്‍മാണ ചിലവിലെ വര്‍ധനവും കാരണമായി പറഞ്ഞുകൊണ്ട് ചില മോഡല്‍ കാറുകളുടെ വിലയില്‍ മാരുതി വര്‍ധനവ് വരുത്തിയിരുന്നു. വിവിധ മോഡലുകള്‍ക്ക് 34,000 രൂപ വരെയാണ് വിലയില്‍ വര്‍ധനവുണ്ടായത്.

ഈ മാസം വീണ്ടും നെക്‌സോണ്‍ ഇവി എസ്‌യുവി മോഡല്‍ കാറിന്റെ വില ടാറ്റ മോട്ടോര്‍ഴ്‌സ് വര്‍ധിപ്പിച്ചു. ഈ വര്‍ഷം ഇത് മൂന്നാമത്തെ തവണയാണ് ടാറ്റ മോട്ടോഴ്‌സ് തങ്ങളുടെ ഇലക്ട്രിക് എസ്യുവിയുടെ വില വര്‍ധിപ്പിച്ചിരിക്കുന്നത്. ഇത്തവണ മുന്‍നിര ലക്വുറി മോഡലുകളായ ടാറ്റ നെക്‌സണ്‍ ഇലക്ട്രിക് വെഹിക്കള്‍ ടാറ്റ നെക്‌സണ്‍ ഇവി എക്്‌സ് സെഡ് പ്ലസ്, നെക്‌സണ്‍ ഇവി എക്‌സ് സെഡ് പ്ലസ് ലക്്‌സ് എന്നീ മോഡലുകളുടെ വില 9,000 രൂപ വരെയാണ് ഉയര്‍ത്തിയിരിക്കുന്നത്.

ജൂലൈ മാസത്തില്‍ മഹീന്ദ്ര തങ്ങളുടെ വിവിധ മോഡലുകളുടെ വില ഉയര്‍ത്തിയിരുന്നു. ഈ വര്‍ഷത്തെ കമ്പനിയുടെ മൂന്നാമത്തെ വില വര്‍ധനവാണിത്. നേരത്തേ ഈ വര്‍ഷം ജനുവരിയിലും പിന്നീട് മെയ് മാസത്തിലും കമ്പനി വാഹന വിലയില്‍ വര്‍ധനവ് വരുത്തിയിരുന്നു. മഹീന്ദ്ര ഥാര്‍ മോഡിലിന് ഏകദേശം 1 ലക്ഷം രൂപയുടെ വര്‍ധനവാണ് ഉണ്ടായിരിക്കുന്നത്.

അതേ സമയം ആഗോളതലത്തില്‍ തന്നെ ഓട്ടോമൊബൈല്‍ മേഖല അതിന്റെ ഏറ്റവും പ്രതിസന്ധികള്‍ നിറഞ്ഞ കാലത്തിലൂടെയാണ് കടന്നുപോയിക്കൊണ്ടിരിക്കുന്നത്. കോവിഡ് 19 മഹാമാരിയും, ചിപ്പ് ദൗര്‍ലഭ്യവും ആ തിരിച്ചടിയ്ക്ക് ആക്കം കൂട്ടുകയും ചെയ്തു. ഇന്ത്യയിലെ ഏറ്റവും വലിയ കാര്‍ നിര്‍മാതാക്കളായ മാരുതി സുസുക്കിയും ഈ പ്രതിസന്ധികളില്‍ നിന്നും മുക്തമല്ല.

ആദ്യ ഘട്ടത്തില്‍ ചിപ്പ് ദൗര്‍ലഭ്യം കൈകാര്യം ചെയ്യുവാന്‍ മാരുതി സുസുക്കിയ്ക്ക് സാധിച്ചിരുന്നു. എന്നാല്‍ സാഹചര്യം മാറ്റമില്ലാതെ തുടരുന്നതിനാല്‍ ഇപ്പോള്‍ പ്രതിസന്ധി രൂക്ഷമായിക്കൊണ്ടിരിക്കുകയാണ്. എന്തൊക്കെ കാരണങ്ങള്‍ കൊണ്ടാണ് മാരുതിയുടെ വില്‍പ്പന താഴേക്ക് പോകുന്നത് എന്ന് നമുക്കിവിടെ ഒന്ന് പരിശോധിക്കാം.

ചിപ്പ് ദൗര്‍ലഭ്യം കാരണം മാരുതി തങ്ങളുടെ നിര്‍മാണ ശേഷി കുറയ്ക്കുന്ന നടപടികളെക്കുറിച്ച് ആലോചിച്ചിരുന്നു. ഈ വര്‍ഷം ഉത്പാദ പദ്ധതിയുടെ 5 ശതമാനം ചുരുക്കുവാനായിരുന്നു കമ്പനി പദ്ധതി തയ്യാറാക്കിയത്. അത് ഏകദേശം 70,000 മുതല്‍ 80,000 വരെ വാഹനങ്ങള്‍ വരും. എന്നാല്‍ ഇപ്പോള്‍ അതിനേക്കാള്‍ ഏറെ ഉയര്‍ന്ന വെട്ടിച്ചുരുക്കലാണ് മാരുതി ഇപ്പോള്‍ അഭിമുഖീകരിച്ചു കൊണ്ടിരിക്കുന്നത്.

ആഗസ്ത് മാസത്തില്‍ മാത്രം 30 മുതല്‍ 40 ശതമാനം വരെ കുറവാണ് മാരുതിയുടെ ഉത്പാദനത്തില്‍ ഉണ്ടായിരിക്കുന്നത്. ആഗസ്ത് മാസത്തിലെ ഉത്പാദന ശേഷിയില്‍ നിന്നും 50,000 മുതല്‍ 60,000 കാറുകളുടെ കുറവാണിത്. ഒറ്റ മാസത്തില്‍ തന്നെ നിര്‍മാണത്തില്‍ ഇത്രയധികം കാറുകളുടെ നഷ്ടമാണ് മാരുതിയ്ക്ക് ഉണ്ടായിരിക്കുന്നത്