ദേശീയ കർഷക ദിനം: കർഷകർക്കായി ഇതാ 10 മികച്ച സർക്കാർ പദ്ധതികൾ; ആനുകൂല്യങ്ങൾ ഇനി വിരൽത്തുമ്പിൽ!

ഇന്ത്യയുടെ സമ്പദ്‌വ്യവസ്ഥയുടെ നട്ടെല്ലായ കാർഷിക മേഖലയ്ക്കും കർഷകർക്കും രാജ്യം വലിയ പ്രാധാന്യമാണ് നൽകി വരുന്നത്. രാജ്യത്തിൻ്റെ സമഗ്രമായ വളർച്ചയിൽ കർഷകർ നൽകുന്ന സംഭാവനകൾ ചെറുതല്ല. ഈ കഠിനാധ്വാനത്തെ സ്മരിക്കുന്നതിനായി എല്ലാ വർഷവും ഡിസംബർ 23 'ദേശീയ കർഷക ദിനമായി' ആചരിക്കുന്നു.

കർഷകരുടെ ഉന്നമനത്തിനായി ജീവിതം സമർപ്പിക്കുകയും അവരുടെ അവകാശങ്ങൾക്കായി പരിശ്രമിക്കുകയും ചെയ്ത ഇന്ത്യയുടെ അഞ്ചാമത് പ്രധാനമന്ത്രി ചൗധരി ചരൺ സിങ്ങിന്റെ ജന്മദിനമാണ് ദേശീയ കർഷക ദിനമായി ആചരിക്കുന്നത്. അദ്ദേഹത്തോടുള്ള ആദരസൂചകമായി 2001-ലാണ് കേന്ദ്ര സർക്കാർ ഈ ദിവസം കർഷക ദിനമായി ഔദ്യോഗികമായി പ്രഖ്യാപിച്ചത്.

കാർഷിക മേഖലയുടെ വികസനത്തിനും കർഷകരുടെ ക്ഷേമം ഉറപ്പാക്കുന്നതിനുമായി നിലവിൽ രാജ്യത്ത് നിരവധി പദ്ധതികൾ നടപ്പിലാക്കി വരുന്നുണ്ട്. അവയിൽ പ്രധാനപ്പെട്ട 10 സർക്കാർ പദ്ധതികൾ താഴെ നൽകുന്നു:

1) പ്രധാനമന്ത്രി കിസാൻ സമ്മാൻ നിധി യോജന (PM- KISAN)

എല്ലാ ഭൂവുടമകളായ കർഷക കുടുംബങ്ങൾക്കും പ്രതിവർഷം 6,000 രൂപ ധനസഹായം നൽകുന്ന പദ്ധതിയാണ്. കർഷകരുടെ അക്കൗണ്ടുകളിലേക്ക് ഓരോ നാല് മാസത്തിലും 2,000 രൂപ വീതമുള്ള മൂന്ന് തുല്യ ഗഡുക്കളായിട്ടാണ് തുക ലഭിക്കുന്നത്.

2) പ്രധാനമന്ത്രി ഫസൽ ബീമാ യോജന (PMFBY)

പ്രകൃതിദുരന്തങ്ങൾ, കീടങ്ങൾ, രോഗങ്ങൾ തുടങ്ങി കൃഷിയെ നശിപ്പിക്കുന്ന തരത്തിലേക്ക് നാശനഷ്ടങ്ങൾ ഉണ്ടാവുന്നതിൽ നിന്നും കർഷകന് പരിരക്ഷ നൽകുന്ന ഒരു വിള ഇൻഷുറൻസ് പദ്ധതിയാണ് ഇത്. ഈ സ്കീമിൽ കുറഞ്ഞ പ്രീമിയം മാത്രമാണ് ഈടാക്കുന്നത്.

3) കിസാൻ ക്രെഡിറ്റ് കാർഡ് പദ്ധതി (KCC)

സബ്‌സിഡി നിരക്കിൽ കർഷകർക്ക് ഹ്രസ്വകാല വായ്പ വാ​ഗ്ദാനം ചെയ്യുന്ന സർക്കാർ പദ്ധതിയാണിത്. കർഷകർക്ക് 4% പലിശ നിരക്കിൽ 3 ലക്ഷം രൂപ വരെ വായ്പകൾ ലഭിക്കും. കാർഷിക ഉൽപ്പന്നങ്ങൾ വാങ്ങുന്നതിനും മറ്റുമാണ് ഈ വായ്പാ പദ്ധതി.

4) പ്രധാനമന്ത്രി കൃഷി സിഞ്ചായീ യോജന (PMKSY)

ജലസേചന സൗകര്യങ്ങൾ വർദ്ധിപ്പിക്കുന്നതിനും മറ്റുമായി കർഷകർക്ക് സഹായം ഉറപ്പാക്കുന്ന പദ്ധതിയാണിത്. ഡ്രിപ്പ്, സ്പ്രിംഗ്ലർ ഇറിഗേഷൻ പോലുള്ള സൂക്ഷ്മ ജലസേചന സംവിധാനങ്ങൾക്ക് ഈ പദ്ധതി സബ്‌സിഡികൾ നൽകുന്നു.

5) ഇ-നാഷണൽ അഗ്രികൾച്ചർ മാർക്കറ്റ്

കർഷകർക്ക് തങ്ങളുടെ ഉൽപ്പന്നങ്ങൾ ഓൺലൈനായി വിപണനം ചെയ്യാൻ സഹായിക്കുന്ന ഏകീകൃത കാർഷിക വിപണിയാണിത്.

6) സോയിൽ ഹെൽത്ത് കാർഡ് (SHC) പദ്ധതി

മണ്ണിൻ്റെ ഗുണനിലവാരം പരിശോധിച്ച് അതിനനുസരിച്ചുള്ള വളപ്രയോഗം നിർദ്ദേശിക്കുന്ന പദ്ധതിയാണിത്. വളങ്ങളുടെ വിവേചനരഹിതമായ ഉപയോഗം കുറയ്ക്കുന്നതിനും മണ്ണിന്റെ ഫലഭൂയിഷ്ഠത മെച്ചപ്പെടുത്തുന്നതിനും ഈ പദ്ധതി ലക്ഷ്യമിടുന്നു.

7) പരമ്പരാഗത കൃഷി വികാസ് യോജന

ജൈവകൃഷി പ്രോത്സാഹിപ്പിക്കുന്ന കേന്ദ്ര പദ്ധതിയാണിത്. ഈ സ്കീം പ്രകാരം സംസ്ഥാനങ്ങൾക്ക് ഹെക്ടറിന് 31,500 രൂപ സാമ്പത്തിക സഹായം നൽകുന്നു, കൂടാതെ 15,000 രൂപ നേരിട്ട് കർഷകർക്ക് പ്രോത്സാഹനമായി നൽകുന്നു.

8) അഗ്രികൾച്ചർ ഇൻഫ്രാസ്ട്രക്ചർ ഫണ്ട് (AIF)

വിളവെടുപ്പിന് ശേഷമുള്ള സംഭരണം, സംസ്കരണം എന്നിവയ്ക്കുള്ള അടിസ്ഥാന സൗകര്യങ്ങൾ ഒരുക്കുന്നതിന് സാമ്പത്തിക സഹായം നൽകുന്ന പദ്ധതിയാണിത്. 2 കോടി രൂപ വരെയുള്ള വായ്പകൾക്ക് ഈ ഫണ്ട് 3% പലിശ സബ്‌വെൻഷൻ വാഗ്ദാനം ചെയ്യുന്നു.

9) പിഎം-കുസും പദ്ധതി

കർഷകർക്ക് സൗരോർജ്ജ പമ്പുകൾ സ്ഥാപിക്കുന്നതിനും അതുവഴി കാർഷിക ചിലവ് കുറയ്ക്കുന്നതിനും സഹായിക്കുന്ന കേന്ദ്ര പദ്ധതിയാണിത്. ഈ പദ്ധതിയിലൂടെ കർഷകർക്ക് 30% മുതൽ 50% വരെ സബ്‌സിഡികൾ ലഭിക്കുകയും മിച്ചമുള്ള വൈദ്യുതി പ്രാദേശിക ഡിസ്‌കോമുകൾക്ക് തിരികെ വിൽക്കുകയും ചെയ്യാം.

10) പ്രധാനമന്ത്രി കിസാൻ മാൻ-ധൻ യോജന (PM-KMY)

ചെറുകിട-നാമമാത്ര കർഷകർക്ക് 60 വയസ്സിന് ശേഷം പ്രതിമാസം 3,000 രൂപ പെൻഷൻ ഉറപ്പാക്കുന്ന പദ്ധതിയാണിത്.

ഈ 10 പദ്ധതികളും കാർഷിക മേഖലയിലുള്ളവർക്ക് അപേക്ഷിക്കാം. വ്യത്യസ്ത ആവശ്യങ്ങൾക്കാണ് ഈ ഓരോ പദ്ധതികളും സഹായകരമാവുന്നത്. സർക്കാർ എപ്പോഴും രാജ്യത്തിൻ്റെ കാർഷിക മേഖലയുടെ വളർച്ചക്കായി പ്രവർത്തിക്കുന്നു.