ഐസിഐസിഐ ബാങ്ക് മിനിമം ബാലൻസ് പരിധി ഉയർത്തി, ഇനി അക്കൗണ്ടിൽ എത്ര രൂപ വരെ നിലനിർത്തണം?

ഐസിഐസിഐ ബാങ്ക് അതിൻ്റെ സേവിം​ഗ്സ് അക്കൗണ്ടുകളിൽ പുതിയ മാറ്റങ്ങൾ അവതരിപ്പിക്കുന്നു. പ്രതിമാസ ശരാശരി ബാലൻസിലാണ് പരിഷ്കരണം വരുന്നത്. സാമ്പത്തിക ശേഷി കൂടുതലുള്ള ഉപയോക്താക്കളെ കൂടുതൽ ആകർഷിക്കുന്നതിനും, അത്തരം നിക്ഷേപകരിൽ ശ്രദ്ധ കേന്ദ്രീകരിക്കുന്നതിനും വേണ്ടിയാണ് ഈ നീക്കം. അതായത് മെട്രോ, നഗര പ്രദേശങ്ങളിലെ സാധാരണ സേവിംഗ്സ് അക്കൗണ്ടുകൾക്കുള്ള ഏറ്റവും കുറഞ്ഞ പ്രതിമാസ ശരാശരി ബാലൻസ് (MAB) 50,000 രൂപയായി വർദ്ധിപ്പിക്കുകയാണ് ഐസിഐസിഐ ബാങ്ക്.

2025 ആ​ഗസ്റ്റ് 1 മുതൽ ഈ പരിഷ്കാരം പ്രാബല്യത്തിൽ വന്നു. 2015ന് ശേഷമുള്ള ആദ്യ പുനഃക്രമീകരണമാണിത്. അതായത് ഇതിനു മുന്നേ വരെ 10,000 രൂപയായിരുന്നു പ്രതിമാസ ശരാശരി ബാലൻസ്. ഈ ആ​ഗസ്റ്റ് 1 മുതൽ പുതിയ പരിധി പ്രാബല്യത്തിൽ വന്നതിനാൽ എല്ലാ പുതിയ അക്കൗണ്ടുകൾക്കും ഇത് ബാധകമാണ്. ഐസിഐസിഐ ബാങ്കിൽ സാലറി അക്കൗണ്ടുള്ളവർക്ക് ഈ നിയമങ്ങൾ ബാധകമല്ല.

മറ്റു പരിഷ്കരണങ്ങൾ

മെട്രോ, നഗര പ്രദേശങ്ങളിലെ സേവിം​ഗ്സ് അക്കൗണ്ടുകൾക്ക് മാത്രമല്ല, മറ്റു പ്രദേശങ്ങളിലും മാറ്റങ്ങൾ പ്രാബല്യത്തിൽ വന്നു. അതായത് സെമി അർബൻ പ്രദേശങ്ങൾക്കുള്ള പുതിയ പ്രതിമാസ ശരാശരി ബാലൻസ് 25,000 രൂപയാണ്. എന്നാൽ ഗ്രാമീണ അക്കൗണ്ടുകൾക്ക് ഇത് 10,000 രൂപയാണ്. ഒരുപക്ഷേ പ്രതിമാസ ശരാശരി ബാലൻസ് പരിധി പാലിക്കുന്നതിൽ നിങ്ങൾ പരാജയപ്പെട്ടാൽ 6 ശതമാനം അല്ലെങ്കിൽ 500 രൂപ എന്ന കണക്കിൽ പിഴ ഈടാക്കും. എന്നാൽ പെൻഷൻകാർ ഈ ചാർജുകൾ നൽകേണ്ടി വരില്ല എന്നത് ആശ്വാസകരമായ കാര്യമാണ്.

ഇതിനു പുറമേ, സേവിംഗ്സ് അക്കൗണ്ട് ഉടമകളുടെ പണമിടപാടുകൾക്ക് നിലവിലുള്ള നിയന്ത്രണങ്ങൾ ബാങ്ക് നിലനിർത്തുന്നു. അതായത്, ഐസിഐസിഐ ബാങ്ക് ശാഖകളിൽ നിന്ന് പ്രതിമാസം മൂന്ന് തവണ മാത്രം സൗജന്യമായി പണം നിക്ഷേപിക്കാനോ അല്ലെങ്കിൽ പിൻവലിക്കാനോ ഉപഭോക്താക്കൾക്ക് സാധിക്കും. നിക്ഷേപങ്ങളിലും പിൻവലിക്കലുകളിലും ഉൾപ്പെടെ, ഇവയ്ക്ക് പ്രതിമാസം ആകെ ഒരു ലക്ഷം രൂപയുടെ മൂല്യപരിധി ബാധകമാണ്.

പിഴ ഈടാക്കും.

മുകളിൽ പറഞ്ഞ നിയന്ത്രണങ്ങൾ ഐസിഐസിഐ ബാങ്ക് സേവിം​ഗ്സ് അക്കൗണ്ട് ഉടമകൾ തീർച്ചയായും പാലിക്കണം. ഒരു പക്ഷേ ഒരു മൂന്നിൽ കൂടുതൽ ഇടപാടുകൾ നടത്തുകയോ, അല്ലെങ്കിൽ ആകെ ഒരു ലക്ഷം രൂപയിൽ കൂടുതൽ നിക്ഷേപം കവിയുകയോ ചെയ്താൽ അധിക പിഴ ഈടാക്കും. ഓരോ ഇടപാടിനും 150 രൂപ അല്ലെങ്കിൽ 1,000 രൂപയുടെ ഇടപാടിന് 3.50 രൂപ എന്ന കണക്കിലാണ് പിഴ ഈടാക്കുക. ഇതിൽ ഉയർന്ന തുക ഏതാണോ, അത് അധിക നിരക്കായി നൽകേണ്ടി വരും.

ഒരു മാസത്തിൽ തന്നെ നിങ്ങൾ പരിധിയിൽ കൂടുതൽ ഇടപാട് നടത്തുകയും, 1 ലക്ഷം രൂപയിൽ കൂടുതൽ പിൻവലിക്കുകയോ, നിക്ഷേപക്കുകയോ ചെയ്താൽ ഈ രണ്ട് ലംഘനത്തിനും ഒരുപോലെ പിഴ ഈടാക്കും. ഇത് വളരെ ഉയർന്ന ചാർജായിരിക്കും.

കൂടാതെ, അക്കൗണ്ട് ഉടമയല്ലാത്ത ഒരാൾ ഇടപാട് നടത്തുമ്പോൾ എല്ലാ സേവിംഗ്സ് അക്കൗണ്ടുകളും ഒരു ഇടപാടിന് 25,000 രൂപയായി പരിമിതപ്പെടുത്തിയിരിക്കുന്നു.

അറിയിപ്പ്:
മുകളില്‍ കൊടുത്തിരിക്കുന്ന ലേഖനം പഠനാവശ്യത്തിന് നൽകുന്നതാണ്. ഇതുമായി ബന്ധപ്പെട്ട് നിക്ഷേപ തീരുമാനങ്ങള്‍ എടുക്കും മുന്‍പ് സാമ്പത്തിക വിദഗ്ധന്റെ നിര്‍ദേശം തേടാം. ഓഹരി വിപണിയിലെ നിക്ഷേപം നഷ്ട സാധ്യതകള്‍ക്ക് വിധേയമാണ്. സ്വന്തം റിസ്‌കില്‍ മാത്രം നിക്ഷേപ തീരുമാനം കൈക്കൊള്ളുക. ലേഖനം വായിച്ചിട്ട് എടുക്കുന്ന തീരുമാനത്തിന്റെ അടിസ്ഥാനത്തില്‍ സംഭവിക്കുന്ന ലാഭനഷ്ടങ്ങള്‍ക്ക് ഗുഡ്റിട്ടേൺസ് മലയാളവും ലേഖകനും ഉത്തരവാദികളല്ല.