സൗജന്യ ലോഞ്ച് ആക്സസും ഇൻഷൂറൻസും ലഭിക്കും; ഈ സേവിം​ഗ്സ് അക്കൗണ്ട് തുടങ്ങിയാലോ?

മുതിർന്ന പൗരൻമാർക്ക് വേണ്ടി നിലവിൽ നിരവധി സ്കീമുകൾ ഓരോ ബാങ്കുകളും വാ​ഗ്ദാനം ചെയ്യുന്നുണ്ട്. സാധാരണ പൗരൻമാരെ അപേക്ഷിച്ച് മുതിർന്ന പൗരൻമാർക്ക് ആനുകൂല്യങ്ങളും കൂടുതലാണ്. വിവിധ ബാങ്കുകൾ മുതിർന്ന പൗരൻമാർക്ക് വേണ്ടി പ്രത്യേക നിക്ഷേപ സ്കീമുകൾ അവതരിപ്പിച്ചിരുന്നു. ഇപ്പോൾ ഫെഡറൽ ബാങ്കും ഒരു പ്രത്യേക സേവിംഗ്സ് അക്കൗണ്ട് അവതരിപ്പിക്കുന്നു. എസ്റ്റീം സേവിം​ഗ്സ് അക്കൗണ്ട് എന്നാണ് പുതിയ പദ്ധതിയുടെ പേര്.

55 വയസും അതിനുമുകളിലും പ്രായമുള്ള വ്യക്തികൾക്കാണ് ഫെഡറൽ ബാങ്കിന്റെ ഈ പുതിയ അക്കൗണ്ടിന് അപേക്ഷിക്കാൻ അർഹതയുള്ളത്. മുതിർന്ന പൗരൻമാർക്ക് അവരുടെ സാമ്പത്തിക സുരക്ഷക്കായി ഒരു നിക്ഷേപം അത്യാവശ്യമാണ്. ഉയർന്ന റിട്ടേൺ നൽകുന്നതിനൊപ്പം മറ്റുള്ളവരെ ആശ്രയിക്കാതെ ജീവിക്കാനുള്ള സാമ്പത്തിക സ്വാതന്ത്രവുമാണ് മുതിർന്ന പൗരൻമാർക്ക് ലഭിക്കുന്നത്.

ഫെഡറൽ ബാങ്കിന്റെ പുതിയ സേവിം​ഗ്സ് അക്കൗണ്ടിലൂടെ നിരവധി ആനുകൂല്യങ്ങളാണ് ലഭിക്കുന്നത്. ഇൻഷൂറൻസ്, ലോഞ്ച് ആക്സസ് തുടങ്ങിയ നിരവധി നേട്ടങ്ങൾ ഇതിൽ ഉൾപ്പെടുന്നു. വെറുമൊരു സേവിംഗ്സ് അക്കൗണ്ട് എന്നതിലുപരി 55 വയസ്സിനു ശേഷം പ്രായമായവർക്കുള്ള എല്ലാ ആവശ്യകതകളും ഇതിലൂടെ നടപ്പിലാക്കാം. യോ​ഗ്യരായ ഉപഭോക്താക്കൾ ഈ അക്കൗണ്ടിൻ്റെ ആനുകൂല്യങ്ങളെ കുറിച്ച് അറിയാതെ പോവരുത്.

വിവിധ ആനുകൂല്യങ്ങൾ.......

സൗജന്യ ഇൻഷുറൻസ് പരിരക്ഷ: നിങ്ങൾക്ക് ഇൻഷുറൻസ് പരിരക്ഷ ലഭിക്കുന്നു. ഒപ്പം കോംപ്ലിമെൻ്ററി വാർഷിക ആരോഗ്യ പരിശോധന, ആശുപത്രിയിൽ ക്യാഷ് ഫെസിലിറ്റി, തുടങ്ങി നിരവധി സേവനങ്ങളാണ് ലഭിക്കുന്നത്.

യാത്രാ സൗകര്യം: ഓരോ പാദത്തിലും രണ്ട് സൗജന്യ എയർപോർട്ട് ലോഞ്ച് ആക്‌സസ് പാസുകളാണ് നിങ്ങളുടെ സേവിം​ഗ്സ് അക്കൗണ്ടിലൂടെ ലഭിക്കുന്നത്.

കുടുംബ ആനുകൂല്യങ്ങൾ: അക്കൗണ്ട് ഉടമകൾക്ക് അവരുടെ പങ്കാളിക്ക് വേണ്ടി ഒരു സീറോ ബാലൻസ് അക്കൗണ്ട് ആരംഭിക്കാം. ഒപ്പം അവരുടെ പേരക്കുട്ടികൾക്കായി രണ്ട് അധിക സീറോ ബാലൻസ് അക്കൗണ്ടുകളും തുറക്കാൻ കഴിയും. ഇത് കുടുംബത്തിന്റെ സാമ്പത്തിക വളർച്ചയ്ക്ക് വേണ്ടിയാണ്.

ചെലവ് കുറഞ്ഞ ബാങ്കിംഗ്: ഈ അക്കൗണ്ടിലൂടെ അധിക ചാർജുകൾ ഈടാക്കില്ല. അതായത് ഡെബിറ്റ് കാർഡ് ഇഷ്യു, NEFT, RTGS, ഉൾപ്പെടെ സാധാരണയായി ഉപയോഗിക്കുന്ന 10 ബാങ്കിംഗ് സേവനങ്ങളുടെ നിരക്കുകൾ ഈ അക്കൗണ്ടിൽ ഒഴിവാക്കപ്പെടും.

അധിക ആനുകൂല്യങ്ങൾ: ആരോഗ്യപരമായ എല്ലാ സേവനങ്ങളും, യൂട്ടിലിറ്റികൾ, മുതിർന്നവർക്കുള്ള പരിചരണം എന്നീ കാര്യങ്ങൾക്ക് പ്രത്യേക ഡിസ്കൗണ്ടുകളുണ്ട്, കൂടാതെ ലോക്കർ വാടകയിൽ 25 ശതമാനം കിഴിവും നൽകുന്നുണ്ട്. ഡീമാറ്റ് അക്കൗണ്ടിൻ്റെ ആദ്യ വർഷത്തേക്കുള്ള വാർഷിക മെയിൻ്റനൻസ് ചാർജും ഇതിൽ ഒഴിവാക്കിയിട്ടുണ്ട്.

ഈ സേവിം​ഗ്സ് അക്കൗണ്ടിലൂടെ സാമ്പത്തിക സുരക്ഷയ്ക്കപ്പുറം ആരോ​ഗ്യ സുരക്ഷയും ലഭിക്കുന്നു. ആരോഗ്യം, സാമ്പത്തിക ക്ഷേമം, സൗകര്യങ്ങൾ എന്നിവയിൽ ശ്രദ്ധ കേന്ദ്രീകരിക്കുന്ന സ്കീമാണ് ഫെഡറൽ ബാങ്ക് അവതരിപ്പിക്കുന്ന എസ്റ്റീം സേവിം​ഗ്സ് അക്കൗണ്ട്. ഇത്തരമൊരു മാറ്റം മറ്റു ബാങ്കുകളിലും ഭാവിയിൽ വരാൻ സാധ്യതയുണ്ട്. ഈ ഒരു സ്കീം തന്നെ ധാരാളമാണ്. കാരണം ഒന്നിലധികം സ്കീമുകൾ നൽകുന്ന ആനുകൂല്യങ്ങൾ ഒരു സ്കീമിലൂടെയാണ് ഇവിടെ ലഭിക്കുന്നത്. 55 വയസ്സും അതിൽ കൂടുതലും ഉള്ളവർക്ക് ഉടൻ ഈ സ്കീമിൽ അപേക്ഷിക്കാം. ഒപ്പം കുടുംബത്തിനും നേട്ടം ഉറപ്പാണ്.