ഇനി വീട്ടിലിരുന്ന് നിങ്ങൾക്കും ഒരു പി.പി.എഫ് അക്കൗണ്ട് തുറക്കാം; റിട്ടയർമെന്റിന് ശേഷം ഉയർന്ന വരുമാനം നേടാം

ഒരു സുരക്ഷിത നിക്ഷേപത്തിന് ആ​ഗ്രഹിക്കുന്നവർക്ക് ഏറ്റവും മികച്ച ഓപ്ഷനാണ് പി.പി.എഫ്. മികച്ച പലിശ, ഉയർന്ന ജനപ്രീതി, കുറഞ്ഞ അപകടസാധ്യത, നികുതി രഹിത സ്വഭാവം എന്നിവ തന്നെയാണ് പി.പി.എഫിന്റെ ഹൈലൈറ്റുകൾ. ഇതൊരു ദീർഘകാലത്തെ നിക്ഷേപമാണ്. മാത്രമല്ല ഒരു മികച്ച സർക്കാർ നിക്ഷേപവുമാണ്. റിട്ടയർമെന്റ് നിക്ഷേപം ലക്ഷ്യമിടുന്നവർക്കു മികച്ച അവസരം ലഭിക്കുന്നത് ഇവിടെയാണ്. പി.പി.എഫിൽ അക്കൗണ്ട് എടുക്കാൻ ആ​ഗ്രഹിക്കുന്നവർക്ക് ഇനി ഓൺലൈനായി വീട്ടിലിരുന്ന് തുടങ്ങാം.

വീട്ടിലിരുന്ന് ഒരു അക്കൗണ്ട് എടുക്കുന്നതാണ് എപ്പോഴും നല്ലത്. നിരവധി നേട്ടങ്ങളാണ് ഇതിലൂടെ ഉറപ്പാക്കുന്നത്. ഉയർന്ന പലിശയും നികുതി രഹിത സ്വഭാവവും ഈ സ്കീമിനെ ജനപ്രിയമാക്കുന്നു. റിട്ടയർമെന്റ് ജീവിതത്തിലേക്ക് കടക്കുമ്പോൾ ഇതിൽ നിന്നും ആകർഷകമായ വരുമാനവും ഉറപ്പാക്കാം.

ആർക്ക് അക്കൗണ്ട് തുറക്കാം?

ഏതൊരു ഇന്ത്യൻ പൗരനും പി.പി.എഫ് അക്കൗണ്ട് തുറക്കാൻ കഴിയും. പ്രായപൂർത്തിയാകാത്തവർക്കും ഈ സ്കീംമിൽ അം​ഗത്വം നേടാം. അത്തരത്തിൽ 18 വയസ്സിൽ താഴെ ഉള്ളവർക്ക് അവരുടെ മാതാപിതാക്കൾക്ക് ​​അക്കൗണ്ട് തുറന്ന് കൊടുക്കാം. എന്നാൽ എൻ.ആർ.ഐ കൾക്ക് (നോൺ റസിഡൻ്റ് ഇന്ത്യക്കാർ) പി.പി.എഫ് അക്കൗണ്ട് തുറക്കാൻ സാധിക്കില്ല. ഇതിനു മുന്നേ ഒരു അക്കൗണ്ട് ഉപയോ​ഗിച്ചിട്ടുണ്ടെങ്കിൽ അതിൽ തുടരാം. പക്ഷേ പുതിയ അക്കൗണ്ട് തുറക്കാൻ അനുവാദമില്ല.

എത്ര രൂപ നിക്ഷേപിക്കാം?

നിങ്ങൾക്ക് ഇഷ്ടമുള്ള രീതിയിൽ നിക്ഷേപം നടത്താം. എന്നാൽ വർഷത്തിൽ പരമാവധി 500 രൂപയെങ്കിലും നിക്ഷേപിക്കണം. നിക്ഷേപിക്കുന്നതിനുള്ള ഏറ്റവും ഉയർന്ന തുക 1.5 ലക്ഷം രൂപയാണ്. ഈ തുക ഒറ്റത്തവണയായോ ഒന്നിലധികം തവണകളായോ നിക്ഷേപിക്കാം. വർഷത്തിൽ 1.5 ലക്ഷം രൂപ വരെ നിങ്ങൾ നിക്ഷേപിച്ചാൽ ആദായനികുതി ലാഭിക്കാൻ സാധിക്കും.

പലിശ എത്രയാണ്?

പി.പി.എഫിൻ്റെ പലിശ നിരക്ക് പലപ്പോഴും മാറിക്കൊണ്ടിരിക്കും. അതായത് ഓരോ പാദത്തിലുമാണ് പലിശ നിരക്ക് സർക്കാർ നിശ്ചയിക്കുന്നത്.
നിലവിൽ 2024-25 പാദത്തിലെ കണക്ക് പ്രകാരം പി.പി.എഫ് ഏകദേശം 7.1% പലിശ ഉറപ്പ് നൽകുന്നു. മാത്രമല്ല നികുതി രഹിതമായതിനാൽ മുഴുവൻ ആനുകൂല്യങ്ങളും നേടാനാവും.

കാലാവധി

ഒരു പി.പി.എഫ് സ്കീമിന്റെ കാലാവധി 15 വർഷമാണ്. ഈ ദീർഘകാല പദ്ധതിക്ക് നിങ്ങൾ ആ​ഗ്രഹിക്കുന്നുവെങ്കിൽ 5 വർഷത്തേക്ക് കൂടി നീട്ടാൻ സാധിക്കും. അതാണ് ഏറ്റവും വലിയ പ്രത്യേകത. 15 വർഷത്തിന് ശേഷം നിക്ഷേപിച്ച മുഴുവൻ തുകയും പി.പി.എഫിൽ നിന്ന് പിൻവലിക്കാം. അപ്രതീക്ഷിത ചിലവുകൾ വന്നാൽ കാലാവധിക്കു മുന്നേ നിങ്ങൾക്ക് വായ്പയെടുക്കാൻ സാധിക്കും. അത് മൂന്നാം വർഷത്തിനു ശേഷം മാത്രമേ സാധിക്കൂ. അതുപോലെ നിങ്ങൾക്ക് കാലാവധിക്കു മുന്നേ ആവശ്യമെങ്കിൽ ഭാ​ഗികമായി പണം പിൻവലിക്കാം. എന്നാൽ അത് പി.പി.എഫ് അക്കൗണ്ട് തുറന്ന് 7 വർഷത്തിന് ശേഷം മാത്രമേ സാധിക്കൂ.

വീട്ടിലിരുന്ന് അക്കൗണ്ട് തുറക്കാം....

സർക്കാർ, സ്വകാര്യ ബാങ്കുകളിൽ അക്കൗണ്ടുള്ളവർക്കെല്ലാം പി.പി.എഫിൽ അക്കൗണ്ട് തുറക്കാം. അതിനായി ചില കാര്യങ്ങൾ ശ്രദ്ധിക്കണം. എങ്ങനെ പി.പി.എഫ് അക്കൗണ്ട് തുറക്കാമെന്ന് പരിശോധിക്കാം.

• ആദ്യം നിങ്ങളുടെ നെറ്റ്ബാങ്കിംഗ് വെബ്സൈറ്റിലേക്കോ ആപ്പിലേക്കോ ലോഗിൻ ചെയ്യുക.

• ശേഷം പി.പി.എഫ് അക്കൗണ്ട് ഓപ്‌ഷൻ തിരഞ്ഞെടുക്കുക: ഇൻവെസ്റ്റ്മെന്റ് അല്ലെങ്കിൽ സർവ്വീസസ് ഓപ്ഷൻ തിരഞ്ഞെടുക്കുക.

• ഇനി നിങ്ങളുടെ വ്യക്തിഗത വിവരങ്ങളും നോമിനി വിശദാംശങ്ങളും പൂരിപ്പിക്കേണ്ടതുണ്ട്.

• ശേഷം ആധാർ കാർഡ്, പാൻ കാർഡ് തുടങ്ങിയ ആവശ്യമായ തിരിച്ചറിയൽ രേഖകൾ അപ്‌ലോഡ് ചെയ്യുക.

• നിക്ഷേപം നടത്തുക: അക്കൗണ്ട് തുറക്കാൻ കുറഞ്ഞത് 500 രൂപ നിക്ഷേപിക്കുക.

ഇത്രയും ചെയ്താൽ അക്കൗണ്ട് തുറക്കാം.