ഒറ്റ വരുമാനം മതി നിങ്ങൾക്കും കോടീശ്വരനാകാം; 36-ാം വയസുകാരന്റെ ജീവിതാനുഭവം ചർച്ചയാകുന്നു

കോടീശ്വരനാകാൻ വലിയ ബിസിനസ് സാമ്രാജ്യമോ പാരമ്പര്യമായി കിട്ടിയ സ്വത്തോ വേണമെന്ന് കരുതുന്നവർക്ക് ഒരു മാതൃകയാവുകയാണ് 36 വയസ്സുകാരനായ ഒരു യുവാവ്. ആഡംബരങ്ങൾ ഒഴിവാക്കിയുള്ള ലളിതജീവിതത്തിലൂടെയും കൃത്യമായ സാമ്പത്തിക ആസൂത്രണത്തിലൂടെയും ഒരു കോടി രൂപയുടെ ആസ്തി കൈവരിച്ചിരിക്കുകയാണ് യുവാവ്. റെഡ്ഡിറ്റിലൂടെയാണ് തന്റെ ഈ നേട്ടം യുവാവ് ലോകവുമായി പങ്കുവെച്ചത്.

ഭാര്യയും രണ്ട് വയസ്സുള്ള മകളുമടങ്ങുന്ന കുടുംബത്തിന്റെ ഏക ആശ്രയമാണ് ഈ 36-കാരൻ. വിദേശ ജോലിയിലൂടെയോ കമ്പനികളിലെ ഓഹരി പങ്കാളിത്തത്തിലൂടെയോ അല്ല ഈ നേട്ടം അദ്ദേഹം കൈവരിച്ചത്. 2016-ൽ ജോലിയിൽ പ്രവേശിച്ചെങ്കിലും, 2022-ഓടെ വീട്ടിലെ കടബാധ്യതകൾ തീർത്ത ശേഷമാണ് കാര്യമായ നിക്ഷേപങ്ങൾ ആരംഭിച്ചത്. സ്ഥിരമായ സമ്പാദ്യശീലമാണ് തന്റെ വിജയരഹസ്യമെന്ന് അദ്ദേഹം പറയുന്നു. 

യുവാവ് പ്രധാനമായും സ്വർണം, മ്യൂച്വൽ ഫണ്ടുകളും ഓഹരികളും, റിയൽ എസ്റ്റേറ്റ് തുടങ്ങിയവയിലാണ് തന്റെ നിക്ഷേപങ്ങൾ തിരിച്ചിരുന്നത്. പോർട്ട്‌ഫോളിയോയുടെ ഒരു പ്രധാന ഭാഗം സ്വർണത്തിനാണ് നീക്കിവച്ചിരിക്കുന്നത്, തുടർന്ന് മ്യൂച്വൽ ഫണ്ടുകൾ, സ്റ്റോക്കുകൾ, ഡെറ്റ് ഉപകരണങ്ങൾ എന്നിവയ്ക്കായും. സ്വന്തമായി താമസിക്കുന്ന വീടിന്റെ മൂല്യം ഏകദേശം 90 ലക്ഷം രൂപയാണ്. (ഇത് ഈ ഒരു കോടി രൂപയുടെ സമ്പാദ്യ കണക്കിൽ ഉൾപ്പെടുത്തിയിട്ടില്ല). ഏകദേശം 30 ലക്ഷം രൂപ വീടിനായി ചെലലവഴിച്ചില്ലായിരുന്നെങ്കിൽ സമ്പാദ്യം ഇതിലും കൂടുമായിരുന്നുവെന്ന് അദ്ദേഹം വ്യക്തമാക്കുന്നു. 

ആഡംബരങ്ങളോട് 'നോ' 

ലൈഫ് സ്റ്റൈൽ ഇൻഫ്ലേഷൻ (വരുമാനം കൂടുമ്പോൾ ജീവിതച്ചെലവ് അമിതമായി വർദ്ധിപ്പിക്കുന്നത്) ഒഴിവാക്കാൻ യുവാവ് പ്രത്യേകം ശ്രദ്ധിച്ചു. ആഡംബര കാറുകളോ അനാവശ്യ ചെലവുകളോ അദ്ദേഹത്തിനില്ല. യാത്രകളാണ് ഒരേയൊരു വിനോദം. അതിനായി മാത്രം പ്രത്യേകമായി പണം മാറ്റിവയ്ക്കാറുമുണ്ട്.

ലക്ഷ്യം സാമ്പത്തിക സ്വാതന്ത്ര്യം 

പെട്ടെന്ന് ജോലി ഉപേക്ഷിക്കുക എന്നതല്ല തന്റെ ലക്ഷ്യമെന്ന് അദ്ദേഹം പറയുന്നു. 40-കളുടെ പകുതിയോടെ 4 മുതൽ 5 കോടി രൂപയുടെ സമ്പാദ്യം ഉണ്ടാക്കുകയാണ് ലക്ഷ്യം. അതുവഴി ജോലി എന്നത് ഒരു നിർബന്ധമല്ല, മറിച്ച് ഒരു താൽപര്യം മാത്രമായി മാറ്റാൻ സാധിക്കുമെന്നും അദ്ദേഹം പ്രതീക്ഷിക്കുന്നു.

സോഷ്യൽ മീഡിയയിൽ വൈറലായ ഈ കുറിപ്പ് നിരവധി യുവാക്കൾക്ക് സാമ്പത്തിക അച്ചടക്കത്തിന്റെ പ്രാധാന്യം മനസ്സിലാക്കി കൊടുക്കുന്ന ഒന്നാണ്. കൃത്യമായ പ്ലാനിംഗ് ഉണ്ടെങ്കിൽ ആർക്കും സാമ്പത്തിക സുരക്ഷിതത്വം നേടാനാകുമെന്ന് ഈ യുവാവ് തെളിയിക്കുന്നു.