പോസ്റ്റ് ഓഫീസിൽ 1000 രൂപ നിക്ഷേപിച്ച് അക്കൗണ്ട് തുറക്കൂ; മാസം 9,250 രൂപ കയ്യിൽ വാങ്ങാം

സമ്പാദ്യത്തിന് മികച്ച പലിശയും ഒപ്പം മാസം തോറും കൃത്യമായ വരുമാനവും ആഗ്രഹിക്കുന്നവർക്കായി പോസ്റ്റ് ഓഫീസ് നൽകുന്ന സ്കീം ആണ് പോസ്റ്റ് ഓഫീസ് പ്രതിമാസ വരുമാന പദ്ധതി. സുരക്ഷിത നിക്ഷേപം തേടുന്നവർക്ക്, പ്രത്യേകിച്ച് വിരമിച്ചവർക്കും സ്ഥിരവരുമാനം ആഗ്രഹിക്കുന്നവർക്കും ഈ പദ്ധതി ഏറെ പ്രയോജനകരമാണ്.

ഒറ്റത്തവണ നിക്ഷേപത്തിലൂടെ അഞ്ച് വർഷത്തേക്ക് ഓരോ മാസവും നിശ്ചിത തുക പലിശയായി ലഭിക്കുന്ന പദ്ധതിയാണിത്. നിലവിൽ 7.4 ശതമാനമാണ് ഈ പദ്ധതിക്ക് ലഭിക്കുന്ന വാർഷിക പലിശ നിരക്ക്.

മാസം 9,250 രൂപ ലഭിക്കുന്നത് എങ്ങനെ?

പദ്ധതിയുടെ നിയമപ്രകാരം ഒരാൾക്ക് വ്യക്തിഗത അക്കൗണ്ടിൽ പരമാവധി 9 ലക്ഷം രൂപ വരെയും, ജോയിന്റ് അക്കൗണ്ടിൽ (പരമാവധി 3 പേർക്ക്) 15 ലക്ഷം രൂപ വരെയും നിക്ഷേപിക്കാം. നിങ്ങൾ പങ്കാളിയുമായി ചേർന്ന് ഒരു ജോയിന്റ് അക്കൗണ്ട് ആരംഭിച്ച് 15 ലക്ഷം രൂപ നിക്ഷേപിക്കുകയാണെങ്കിൽ, നിലവിലെ 7.4% പലിശ നിരക്ക് പ്രകാരം പ്രതിവർഷം 1,11,000 രൂപ പലിശയായി ലഭിക്കും. ഈ തുകയെ 12 മാസങ്ങളായി വിഭജിക്കുമ്പോൾ ഓരോ മാസവും 9,250 രൂപ നിങ്ങളുടെ അക്കൗണ്ടിലെത്തും.

ഈ സ്കീമിന്റെ പ്രധാന സവിശേഷതകൾ

1. നിക്ഷേപ പരിധി 

ഈ പദ്ധതിയിൽ വ്യക്തിഗതമായും ജോയിന്റ് അക്കൗണ്ടായും പണം നിക്ഷേപിക്കാവുന്നതാണ്. സിംഗിൾ അക്കൗണ്ടിൽ ഒരാൾക്ക് പരമാവധി 9 ലക്ഷം രൂപ വരെ നിക്ഷേപിക്കാം. ജോയിന്റ് അക്കൗണ്ടിൽ പരമാവധി മൂന്ന് പേർ ചേർന്ന് തുടങ്ങാവുന്ന അക്കൗണ്ടിൽ 15 ലക്ഷം രൂപ വരെ നിക്ഷേപിക്കാം.

2. ആകർഷകമായ പലിശ നിരക്ക്

നിലവിൽ ഈ പദ്ധതിക്ക് 7.4% വാർഷിക പലിശയാണ് ലഭിക്കുന്നത്. നിക്ഷേപിക്കുന്ന തുകയുടെ പലിശ ഓരോ മാസവും നിക്ഷേപകന്റെ സേവിങ്സ് അക്കൗണ്ടിലേക്ക് നേരിട്ട് ക്രെഡിറ്റ് ചെയ്യപ്പെടും. പലിശ തുക ഓരോ മാസവും പിൻവലിച്ചില്ലെങ്കിലും അതിന് പ്രത്യേകം പലിശ ലഭിക്കില്ല എന്ന കാര്യം ശ്രദ്ധിക്കുക.

3. കാലാവധി

ഈ പദ്ധതിയുടെ കാലാവധി 5 വർഷം ആണ്. അഞ്ച് വർഷത്തിന് ശേഷം നിക്ഷേപകന് തന്റെ തുക പിൻവലിക്കുകയോ അല്ലെങ്കിൽ അന്നത്തെ പലിശ നിരക്കിൽ വീണ്ടും നിക്ഷേപിക്കുകയോ ചെയ്യാം.

4. സുരക്ഷിതത്വം

ബാങ്ക് നിക്ഷേപങ്ങളെ അപേക്ഷിച്ച് പോസ്റ്റ് ഓഫീസ് പദ്ധതികൾക്ക് കേന്ദ്ര സർക്കാരിന്റെ പരമാധികാര ഗ്യാരണ്ടി ഉള്ളതിനാൽ നിക്ഷേപത്തിന് 100% സുരക്ഷ ഉറപ്പാണ്. വിപണിയിലെ മാറ്റങ്ങൾ പലിശ നിരക്കിനെ ബാധിക്കില്ല.

5. പ്രായപരിധി

18 വയസ്സ് പൂർത്തിയായ ഏതൊരു ഇന്ത്യൻ പൗരനും ഈ അക്കൗണ്ട് തുടങ്ങാം. 10 വയസ്സിന് മുകളിലുള്ള പ്രായപൂർത്തിയാകാത്ത കുട്ടികളുടെ പേരിൽ രക്ഷിതാക്കൾക്ക് അക്കൗണ്ട് ആരംഭിക്കാം.

നേരത്തെ പിൻവലിക്കാമോ?

അടിയന്തര സാഹചര്യങ്ങളിൽ നിക്ഷേപം പിൻവലിക്കാൻ സാധിക്കുമെങ്കിലും ചില നിബന്ധനകളുണ്ട്. നിക്ഷേപിച്ച് ഒരു വർഷം തികയുന്നതിന് മുൻപ് പണം പിൻവലിക്കാൻ സാധിക്കില്ല. ഒന്നിനും മൂന്നിനും ഇടയിൽ വർഷങ്ങളിൽ പിൻവലിക്കുകയാണെങ്കിൽ നിക്ഷേപ തുകയുടെ 2 ശതമാനവും, മൂന്ന് വർഷത്തിന് ശേഷമാണെങ്കിൽ 1 ശതമാനവും പിഴയായി ഈടാക്കും.