20,000 രൂപയാണോ പ്രതിമാസ ശമ്പളം? നിങ്ങൾക്കും 7 കോടി വരെ കോർപ്പസ് നേടാം, എവിടെ നിക്ഷേപിക്കാം?

പണം സമ്പാദിക്കാൻ ആ​ഗ്രഹമില്ലാത്തവർ ആരുമില്ല. എന്നാൽ ഓരോരുത്തരുടേയും സാമ്പത്തിക നില അനുസരിച്ചാണാ് നിക്ഷേപ തുക പ്ലാൻ ചെയ്യേണ്ടത്. 15,000 രൂപ മാസ ശമ്പളം വാങ്ങിക്കുന്ന വ്യക്തിക്കും 1.5 ലക്ഷം രൂപ ലഭിക്കുന്ന വ്യക്തിക്കും വിവിധ നിക്ഷേപ പദ്ധതികളിൽ നിക്ഷേപിക്കാം. എന്നാൽ പ്രതിമാസം നിശ്ചിത വരുമാനം വാങ്ങുന്നതിനാൽ നിക്ഷേപം എന്ന ചിന്ത പലർക്കും അസാധ്യമാണെന്ന് തോന്നുന്നു. സമ്പാദ്യത്തിലേക്ക് കുറച്ച് പണം നിക്ഷേപിച്ചാൽ ചില പ്രത്യേക സാമ്പത്തിക ലക്ഷ്യങ്ങൾ കൈവരിക്കാൻ സാധിക്കില്ലെന്നാണ് പലരും ചിന്തിക്കുന്നത്.

എന്നാൽ ദീർഘകാലത്തേക്ക് നിക്ഷേപിച്ചാൽ ചെറിയ പ്രതിമാസ നിക്ഷേപത്തിന് പോലും ഒരു ഭീമൻ റിട്ടയർമെൻ്റ് കോർപ്പസ് സൃഷ്ടിക്കാൻ കഴിയുമെന്ന് ആരും തിരിച്ചറിഞ്ഞിട്ടില്ല. ഇതിൽ കൂട്ടു പലിശയുടെ ശക്തി വരുന്നുണ്ട്. 20,000 രൂപ മുതൽ പ്രതിമാസ വരുമാനം കിട്ടുന്നവർക്ക് 7 കോടി രൂപയുടെ കോർപ്പസ് സൃഷ്ടിക്കുന്നത് അസാധ്യമല്ല. എങ്ങനെ നേടാമെന്ന് നോക്കാം.

എവിടെ നിക്ഷേപിക്കാം?

നിങ്ങളുടെ വരവ് തുകയ്ക്ക് അനുസരിച്ചായിരിക്കണം നിക്ഷേപിക്കേണ്ടത്. മുകളിൽ പറഞ്ഞതു പോലെ ദീർഘ കാലത്തെ നിക്ഷേപം തന്നെ തിരഞ്ഞെടുക്കുക. ഇത് വലിയ നേട്ടം സ്വന്തമാക്കാം. ഇനി ഇത്തരം വലിയ ലക്ഷ്യങ്ങൾക്ക് മ്യൂച്വൽഫണ്ട് എസ്.ഐ.പിയിൽ നിക്ഷേപിക്കുന്നതാവും കൂടുതൽ നല്ലത്. ഇവിടെ ഏകദേശം 12% പലിശയുണ്ട്. കോംബൗണ്ടിം​ഗിലൂടെ വമ്പൻ തുകയായി നിക്ഷേപം വളരും.

1000 രൂപ നിക്ഷേപിച്ചാൽ എത്ര കോർപ്പസ് കിട്ടും?

20,000 രൂപ വരുമാനമുള്ള വ്യക്തി എല്ലാ മാസവും 1000 രൂപ നിക്ഷേപിച്ചാൽ വലിയ കോർപ്പസായി അത് വളരുമോ? ഒരാൾ 40 വർഷത്തേക്ക് എസ്ഐപി വഴി 1,000 രൂപ നിക്ഷേപിച്ചാൽ മൊത്തം നിക്ഷേപ തുക 4,80,000 രൂപയാവും. എന്നാൽ ഇവിടെ 12% എന്ന നിരക്കിൽ പലിശ കണക്കാക്കിയാൽ അവരുടെ ഏകദേശ കോർപ്പസ് തുക 1,18,82,420 രൂപയാവും.

5 കോടി, 6 കോടി, 7 കോടി കോർപ്പസുകൾ എങ്ങനെ സൃഷ്ടിക്കാം...?

20,000 രൂപ പ്രതിമാസ വരുമാനത്തിൽ നിന്നും 20% നിക്ഷേപത്തിലേക്ക് മാറ്റിവെക്കാം. ഇത് ഏകദേശം 4,000 രൂപയാണ്. സാധാരണയായി ഓരോ വർഷവും വരുമാനം 5% എന്ന നിരക്കിൽ വർദ്ധിക്കും. ഈ അടിസ്ഥാനത്തിൽ കണക്ക് പരിശോധിക്കാം.

4,000 രൂപ പ്രതിമാസ എസ്.ഐ.പിയിലൂടെ 5 കോടി രൂപ വരെ നേടാം...

ഈ ലക്ഷ്യം കൈവരിക്കാൻ ഏകദേശം 37 വർഷമെടുക്കും. 37 വർഷത്തിനുള്ളിൽ നിക്ഷേപം 48,78,151 രൂപയാകും. കണക്കാക്കിയ മൂലധന നേട്ടം 4,63,72,112 രൂപയും റിട്ടയർമെൻ്റ് കോർപ്പസ് 5,12,50,263 രൂപയുമാവും.

4,000 രൂപ പ്രതിമാസ എസ്.ഐ.പിയിലൂടെ 6 കോടി രൂപ വരെ നേടാം...

39 വർഷത്തിനുള്ളിൽ ലക്ഷ്യം കൈവരിക്കാനാകും. 39 വർഷത്തിനുള്ളിൽ നിക്ഷേപം 54,76,561 രൂപയും മൂലധന നേട്ടം 6,02,75,961 രൂപയുമാവും. എങ്കിൽ നിങ്ങളുടെ റിട്ടയർമെൻ്റ് കോർപ്പസ് 6,57,52,522 രൂപയായി വളരും.

4,000 രൂപ പ്രതിമാസ എസ്.ഐ.പിയിലൂടെ 7 കോടി രൂപ വരെ നേടാം...

ഈ ലക്ഷ്യം കൈവരിക്കാൻ ഏകദേശം 40 വർഷമെടുക്കും. 40 വർഷത്തിനുള്ളിൽ നിക്ഷേപം 57,98,389 രൂപയാവും. മൂലധന നേട്ടം 6,86,36,732 രൂപ ലഭിക്കും. ഇവിടെ നിങ്ങളുടെ റിട്ടയർമെൻ്റ് കോർപ്പസ് 7,44,35,121 രൂപയാവും.

ഇവിടെ ഓരോ വർഷവും നിക്ഷേപ തുക വർദ്ധിക്കും. അതായത് ഓരോ വർഷവും വരുമാനം വർദ്ധിക്കുമ്പോൾ അത് നിക്ഷേപത്തിലേക്ക് തന്നെ മാറ്റുക. അതിനാൽ ഇത്രയും വലിയ തുകയിലേക്ക് കോർപ്പസ് വളരും.