വ്യക്തി​ഗത വായ്പ എടുക്കുമ്പോൾ മറഞ്ഞിരിക്കുന്ന അധിക ചാർജുകൾ; ഇവ വായ്പാ പലിശയേക്കാൾ അധികമാണ്

നിങ്ങൾ വ്യക്തി​ഗത വായ്പകൾ എടുക്കാറുണ്ടോ? സാധാരണയായി അപ്രതീക്ഷിത സാമ്പത്തിക ആവശ്യങ്ങൾ വരുമ്പോഴാണ് ആളുകൾ വ്യക്തി​ഗത വായ്പകളെ ആശ്രയിക്കുന്നത്. മാത്രമല്ല മറ്റു വായ്പകളെ പോലെ വ്യക്തി​ഗത വായ്പകൾക്ക് ഈട് നൽകേണ്ട. അതിനാൽ നിരവധി ആളുകളാണ് വ്യക്തി​ഗത വായ്പകളെ ആശ്രയിക്കുന്നത്. എന്നാൽ എപ്പോഴും സൂക്ഷിക്കേണ്ടത് വ്യക്തി​ഗത വായ്പകളുടെ അമിത ചാർജുകളെ കുറിച്ചാണ്.

വ്യക്തി​ഗത വായ്പകളുടെ പേരിൽ പലരും വഞ്ചിതരാവാറുണ്ട്. കാരണം വായ്പക്ക് അപേക്ഷിച്ചാൽ വായ്പാ തുകയിൽ നിന്ന് ഒരു ചെറിയ ശതമാനം പ്രോസസ്സിംഗ് ചാർജായി ഈടാക്കുന്നു. ഇത് വായ്പയുടെ 2 ശതമാനം വരെയാകാം. അതിനാൽ ഈ 2 ശതമാനം കുറച്ചാണ് വായ്പ നിങ്ങൾക്ക് ലഭിക്കുന്നത്.

മാത്രമല്ല ഇത്തരത്തിൽ ഈടാക്കുന്ന തുക പലപ്പോഴും നിങ്ങളുടെ യഥാർത്ഥ മുതലിന്റെയും പലിശയുടെയും തുകയേക്കാൾ അല്പം കൂടുതലാകാം. ഇത്തരത്തിൽ നിങ്ങളറിയാതെ പല ചാർജുകളും ഈടാക്കുന്നു. വ്യക്തി​ഗത വായ്പക്ക് അപേക്ഷിക്കുമ്പോൾ മറഞ്ഞിരിക്കുന്ന ചാർജുകൾ ഏതെല്ലാം...?

പ്രോസസ്സിംഗ് ഫീസ് : വായ്പ തുകയുടെ 1 ശതമാനം മുതൽ 3 ശതമാനം വരെ പ്രോസസ്സിംഗ് ഫീസായി ബാങ്കുകൾ ഈടാക്കുന്നു.

ഇൻഷുറൻസ് ചാർജുകൾ : തിരിച്ചടവിലെ അപകടസാധ്യതകൾ ഇല്ലാതാക്കുന്നതിനായി ബാങ്കുകൾ വായ്പ സംരക്ഷണ ഇൻഷുറൻസ് മുന്നോട്ട് വെക്കുന്നു. ഇതൊരിക്കലും നിർബന്ധിതമായി ഈടാക്കുന്നില്ല. പക്ഷേ ബാങ്കുകൾ ഇത് ഒരു ഓപ്ഷനായി വായ്പയിൽ ഉൾപ്പെടുത്താറുണ്ട്, അപേക്ഷകന് താത്പര്യമില്ലെങ്കിൽ ഇത് ഒഴിവാക്കാം.

പ്രീപേയ്‌മെന്റ് അല്ലെങ്കിൽ ഫോർക്ലോഷർ ചാർജുകൾ : കാലാവധി അവസാനിക്കുന്നതിന് മുമ്പ് നിങ്ങൾ വായ്പ തിരിച്ചടച്ചാൽ, ബാങ്കുകൾ പ്രീപേയ്‌മെന്റ് പിഴ ഈടാക്കിയേക്കാം (സാധാരണയായി കുടിശ്ശികയുള്ള വായ്പ തുകയുടെ 2 ശതമാനം മുതൽ 5 ശതമാനം വരെ). ചില ബാങ്കുകൾ ഒരു നിശ്ചിത കാലയളവിനുശേഷം ഭാഗിക പ്രീപേയ്‌മെന്റ് അനുവദിക്കുന്നു. പക്ഷേ അതിനും ഒരു നിശ്ചിത ഫീസ് ചുമത്തിയേക്കാം.

വൈകിയുള്ള പേയ്‌മെന്റുകൾക്ക് പിഴ: പ്രതിമാസ ഇ.എം.ഐ തിരിച്ചടവ് തെറ്റിയാൽ വൈകിയുള്ള പേയ്‌മെന്റ് ഫീസ് ഈടാക്കും (കാലാവധി കഴിഞ്ഞ ഇ.എം.ഐയിൽ പ്രതിമാസം ഏകദേശം 2% മുതൽ 4% വരെ). ഇത് നിങ്ങളുടെ ക്രെഡിറ്റ് സ്‌കോറിനെ സാരമായി ബാധിക്കും.

ഇ.എം.ഐ ബൗൺസ് ചാർജുകൾ : ഒരു പക്ഷേ ഇ.എം.ഐ അടക്കേണ്ട ദിവസം അക്കൗണ്ടിൽ പണമില്ലെങ്കിൽ ഇ.എം.ഐ ബൗൺസാവും. ബാങ്കുകൾ ഓരോ ബൗൺസിനും 500 രൂപ മുതൽ 1000 രൂപ വരെ ഈടാക്കും. കൂടാതെ ജി.എസ്.ടിയും ഈടാക്കും. ചില ബാങ്കുകൾ കുടിശ്ശിക തുകയ്ക്ക് പിഴ പലിശയും ചേർത്തേക്കാം.

വായ്പ റദ്ദാക്കൽ നിരക്കുകൾ : വായ്പാ അനുമതി ലഭിച്ചതിന് ശേഷം വായ്പ വേണ്ടെങ്കിൽ നിങ്ങൾക്ക് റദ്ദാക്കാം. പക്ഷേ ഇതിന് ചില ബാങ്കുകൾ വായ്പ റദ്ദാക്കൽ ഫീസ് ഈടാക്കും (പലപ്പോഴും ഏകദേശം 1000 രൂപ മുതൽ 3000 രൂപ വരെ).

ഡോക്യുമെന്റേഷൻ ചാർജുകൾ : ചില ബാങ്കുകൾ ഡോക്യുമെന്റേഷൻ അല്ലെങ്കിൽ കരാർ ഒപ്പിടൽ ഫീസായി 500 രൂപ മുതൽ 2000 രൂപ വരെ ഈടാക്കാറുണ്ട് .

വായ്പാ കൺവേർഷൻ : വായ്പാ കാലാവധിയിൽ മാറ്റം വരുത്താനോ കുറഞ്ഞ പലിശ നിരക്കിലേക്ക് മാറാനോ ആവശ്യപ്പെടുകയാണെങ്കിൽ, ബാങ്കുകൾ ഒരു കൺവേർഷൻ ഫീസ് ഈടാക്കാൻ സാധ്യതയുണ്ട്. ഇത് കുടിശ്ശികയുള്ള വായ്പ തുകയുടെ ഏകദേശം 0.5 ശതമാനം മുതൽ 2 ശതമാനം വരെയാകാം.

സ്റ്റാമ്പ് ഡ്യൂട്ടിയും നിയമപരമായ ചാർജുകളും : ബാങ്കുകൾ വായ്പാ കരാറുകൾക്ക് സ്റ്റാമ്പ് ഡ്യൂട്ടി ഈടാക്കുന്നു. ചില ബാങ്കുകൾ വായ്പാ പരിശോധനയ്ക്ക് നിയമപരമായ ചാർജുകളും ചുമത്തുന്നു.

അറിയിപ്പ്:
മുകളില്‍ കൊടുത്തിരിക്കുന്ന ലേഖനം പഠനാവശ്യത്തിന് നൽകുന്നതാണ്. ഇതുമായി ബന്ധപ്പെട്ട് നിക്ഷേപ തീരുമാനങ്ങള്‍ എടുക്കും മുന്‍പ് സാമ്പത്തിക വിദഗ്ധന്റെ നിര്‍ദേശം തേടാം. ഓഹരി വിപണിയിലെ നിക്ഷേപം നഷ്ട സാധ്യതകള്‍ക്ക് വിധേയമാണ്. സ്വന്തം റിസ്‌കില്‍ മാത്രം നിക്ഷേപ തീരുമാനം കൈക്കൊള്ളുക. ലേഖനം വായിച്ചിട്ട് എടുക്കുന്ന തീരുമാനത്തിന്റെ അടിസ്ഥാനത്തില്‍ സംഭവിക്കുന്ന ലാഭനഷ്ടങ്ങള്‍ക്ക് ഗ്രേനിയം ഇന്‍ഫര്‍മേഷന്‍ ടെക്നോളജീസും ലേഖകനും ഉത്തരവാദികളല്ല.