സാലറി സ്ലിപ്പില്ലാതെ പേഴ്സണൽ ലോൺ വേണോ? ഈ 6 വഴികൾ നോക്കൂ

പെട്ടെന്നുണ്ടാകുന്ന സാമ്പത്തിക ആവശ്യങ്ങൾക്കായി നമ്മൾ ആദ്യം ആശ്രയിക്കുന്നത് പേഴ്സണൽ ലോണുകളെയാണ്. എന്നാൽ, കൃത്യമായ വരുമാന രേഖകൾ ഹാജരാക്കാൻ സാധിച്ചില്ലെങ്കിൽ ഇന്ത്യയിലെ മിക്ക ബാങ്കുകളും നിങ്ങൾക്ക് പേഴ്സണൽ ലോണുകൾ നൽകാൻ സാധ്യതയില്ല.

നിങ്ങളുടെ വിശ്വാസ്യതയും, ലോൺ തിരിച്ചടയ്ക്കാൻ ആവശ്യമായ സ്ഥിരവരുമാനം നിങ്ങൾക്കുണ്ടെന്ന ബോധ്യവും മുൻനിർത്തിയാണ് ബാങ്കുകൾ ഇത്തരം ലോണുകൾ നൽകുന്നത്. രേഖാമൂലം സ്ഥിരമായ വരുമാനം കാണിക്കാൻ സാധിച്ചില്ലെങ്കിൽ, അത് ലോൺ തിരിച്ചടയ്ക്കുന്ന കാര്യത്തിൽ വലിയൊരു റിസ്ക് ആയിട്ടാണ് ബാങ്കുകൾ കണക്കാക്കുന്നത്. അത്തരക്കാർക്ക് വായ്പ ലഭിക്കാൻ സഹായിക്കുന്ന ചില വഴികൾ അറിഞ്ഞിരിക്കാം.

1. ബാങ്ക് സ്റ്റേറ്റ്‌മെന്റ് പരിശോധിക്കുക 

നിങ്ങൾക്ക് പേ-സ്ലിപ്പ് ഇല്ലെങ്കിലും, ബാങ്ക് അക്കൗണ്ടിലെ പണമിടപാടുകൾ വായ്പ ലഭിക്കാൻ സഹായിക്കും. കൃത്യമായ ഇടവേളകളിൽ അക്കൗണ്ടിലേക്ക് പണം വരുന്നുണ്ടെന്നും അത്യാവശ്യം ബാലൻസ് സൂക്ഷിക്കുന്നുണ്ടെന്നും ബാങ്കിനെ ബോധ്യപ്പെടുത്തിയാൽ വായ്പ ലഭിക്കാൻ സാധ്യതയുണ്ട്.

2. ഉയർന്ന സിബിൽ സ്കോർ 

വരുമാന രേഖകളില്ലാത്തവർക്ക് സിബിൽ സ്കോർ വലിയൊരു തുണയാണ്. 750-ന് മുകളിൽ സ്കോർ ഉണ്ടെങ്കിൽ, നിങ്ങൾ കൃത്യമായി കടം തിരിച്ചടയ്ക്കുന്ന ആളാണെന്ന് ബാങ്കിന് വിശ്വാസം വരും. ഇത് വരുമാന രേഖകളുടെ അഭാവത്തിലും വായ്പ എളുപ്പമാക്കും.

3. ഈട് നൽകിയുള്ള വായ്പകൾ

വരുമാന രേഖകൾ ഇല്ലാത്തവർക്ക് സ്വർണ്ണമോ, സ്ഥിരനിക്ഷേപങ്ങളോ, ഇൻഷുറൻസ് പോളിസികളോ ഈട് നൽകി വായ്പ എടുക്കാം. ഇത്തരം വായ്പകൾക്ക് പലിശ നിരക്ക് കുറവായിരിക്കും എന്നത് മറ്റൊരു ഗുണമാണ്.

4. സഹ അപേക്ഷകനെ ചേർക്കുക 

നിങ്ങൾക്ക് വരുമാന രേഖയില്ലെങ്കിൽ, സ്ഥിരവരുമാനവും മികച്ച സിബിൽ സ്കോറുമുള്ള കുടുംബാംഗത്തെ (അച്ഛൻ, അമ്മ അല്ലെങ്കിൽ പങ്കാളി) ലോണിൽ അപേക്ഷകനായി ചേർക്കാവുന്നതാണ്. ഇത് വായ്പ അനുവദിക്കാനുള്ള സാധ്യത വർദ്ധിപ്പിക്കും.

5. ബാങ്കുമായുള്ള നല്ല ബന്ധം 

നിങ്ങൾ വർഷങ്ങളായി ഇടപാട് നടത്തുന്ന ബാങ്കാണെങ്കിൽ, നിങ്ങളുടെ സാമ്പത്തിക അച്ചടക്കം മുൻനിർത്തി അവർ വായ്പ നൽകാൻ തയ്യാറായേക്കാം. പ്രീ-അപ്രൂവ്ഡ് ലോൺ ഓഫറുകൾ ഉണ്ടോ എന്ന് പരിശോധിക്കുന്നതും നല്ലതാണ്.

6. ചെറിയ വായ്പകൾ നൽകുന്ന ആപ്പുകൾ 

പുതിയ കാലത്തെ ചില ആപ്പുകൾ വലിയ വരുമാന രേഖകൾ ഇല്ലാതെ തന്നെ ചെറിയ തുകകൾ വായ്പയായി നൽകുന്നുണ്ട്. എന്നാൽ ഇവയുടെ പലിശ നിരക്ക് കൂടുതലായിരിക്കുമെന്ന കാര്യം പ്രത്യേകം ശ്രദ്ധിക്കണം.

വരുമാന രേഖകളില്ലാതെ വായ്പ എടുക്കുമ്പോൾ പലിശ നിരക്ക് താരതമ്യേന കൂടുതലായിരിക്കാൻ സാധ്യതയുണ്ട്. അതിനാൽ കൃത്യമായി തിരിച്ചടയ്ക്കാൻ കഴിയുമെന്ന് ഉറപ്പുള്ളവർ മാത്രം ഇത്തരം വായ്പകൾക്ക് മുതിരുക.