ഇന്ത്യയിലെ ഈ മുൻനിര ബാങ്കുകൾ വ്യക്തിഗത വായ്പകൾക്ക് കുറഞ്ഞ പലിശ നിരക്ക് നൽകുന്നു

ഈടില്ലാതെ പെട്ടെന്ന് പണം ഉറപ്പാക്കാൻ സഹായിക്കുന്ന വായ്പകളാണ് വ്യക്തിഗത വായ്പ. അത്യാവശ്യഘട്ടങ്ങളിൽ സാമ്പത്തിക നേട്ടം ഉറപ്പാക്കാൻ ഇതിലൂടെ സാധിക്കും. പ്രമുഖ ബാങ്കുകളും ധനകാര്യ സ്ഥാപനങ്ങളും കുറഞ്ഞ പലിശ നിരക്കിൽ പേഴ്സണൽ ലോണുകൾ നൽകുന്നുണ്ട്. കടം വീട്ടാനും, ചികിത്സാ സഹായങ്ങൾക്കും, വീട് പുതുക്കി പണിയാനുമെല്ലാം ഈ വായ്പകൾ പരിഗണിക്കാവുന്നതാണ്.

എന്താണ് വ്യക്തിഗത വായ്പ?

വ്യക്തിഗത വായ്പ എന്നാൽ ഈടില്ലാത്ത വായ്പ എന്നാണ് അർത്ഥം. ബാങ്കുകളിൽ നിന്നും ബാങ്ക് ഇതര ധനകാര്യ സ്ഥാപനങ്ങളിൽ (NBFC) നിന്നും ഈട് നൽകാതെ തന്നെ പണം ലഭിക്കാൻ ഇതിലൂടെ സാധിക്കും. നിലവിൽ വ്യക്തിഗത വായ്പകൾ എളുപ്പത്തിൽ ലഭിക്കും. ഇതിന്റെ നടപടിക്രമങ്ങൾ വളരെ ലളിതവും വേഗത്തിലുമുള്ളതാണ്.

സാധാരണ വായ്പകൾക്ക് അപേക്ഷിക്കുമ്പോൾ ഒരു മികച്ച ആസ്തി ഈടായി നൽകേണ്ടി വരുന്നു. എന്നാൽ വ്യക്തിഗത വായ്പകൾ എടുക്കുന്നതിന് തിരിച്ചടയ്ക്കാനുള്ള സാധ്യതയും വരുമാനവുമാണ് പ്രധാനമായും പരിഗണിക്കുന്നത്. ഈ ലോൺ തുക നിശ്ചിത കാലയളവിനുള്ളിൽ ഇഎംഐകളായി തിരിച്ചടയ്ക്കണം.

. 

കുറഞ്ഞ പലിശ നിരക്കിൽ വ്യക്തിഗത വായ്പകൾ നൽകുന്ന ബാങ്കുകൾ

കുറഞ്ഞ പലിശ നിരക്കിൽ വ്യക്തിഗത വായ്പ നൽകുന്ന ചില ബാങ്കുകൾ ഇതാ:

എസ്ബിഐ: ഏറ്റവും വലിയ പൊതുമേഖലാ ബാങ്കായ എസ്ബിഐ 10.3% മുതൽ പലിശ നിരക്കിൽ വ്യക്തിഗത വായ്പകൾ നൽകുന്നു. 35 ലക്ഷം രൂപ വരെയാണ് വായ്പയായി നൽകുന്നത്.

എച്ച്ഡിഎഫ്സി ബാങ്ക്: എച്ച്ഡിഎഫ്സി ബാങ്കിൽ 10.9% മുതൽ 24% വരെ പലിശ നിരക്കിൽ 40 ലക്ഷം രൂപ വരെ വായ്പ നൽകുന്നു. ഇതിന്റെ പ്രോസസിംഗ് ഫീസ് 6,500 രൂപയും ജിഎസ്ടിയും ഈടാക്കും.

ഐസിഐസിഐ ബാങ്ക്: ഐസിഐസിഐ ബാങ്കിൽ 10.85% മുതൽ 16.5% വരെ പലിശ നിരക്കിൽ 50 ലക്ഷം രൂപ വരെ വായ്പയായി എടുക്കാവുന്നതാണ്. കൂടാതെ 72 മാസം വരെ തിരിച്ചടവിനായി കാലാവധി ലഭിക്കുന്നതാണ്.

ആക്സിസ് ബാങ്ക്: ആക്സിസ് ബാങ്ക് 40 ലക്ഷം രൂപ വരെ വ്യക്തിഗത വായ്പ നൽകുന്നു. 12 മാസം മുതൽ 84 മാസം വരെയാണ് ഇതിന്റെ കാലാവധി. പലിശ നിരക്ക് 11.25% മുതൽ ആരംഭിക്കുന്നു. പ്രോസസിംഗ് ഫീസായി ലോൺ തുകയുടെ 2% വരെയും ജിഎസ്ടിയും ഈടാക്കുന്നു.

ഐഡിഎഫ്സി ഫസ്റ്റ് ബാങ്ക്: ഐഡിഎഫ്സി ഫസ്റ്റ് ബാങ്കിൽ 9.99% പലിശ നിരക്കിൽ 10 ലക്ഷം രൂപ വരെ തൽക്ഷണം വായ്പ ലഭിക്കുന്നു.

എച്ച്എസ്ബിസി ബാങ്ക്: എച്ച്എസ്ബിസി ബാങ്കിൽ 1 ലക്ഷം മുതൽ 50 ലക്ഷം രൂപ വരെ വ്യക്തിഗത വായ്പകൾ ലഭ്യമാണ്. ഇതിന്റെ പലിശ നിരക്ക് 10.15% മുതൽ 16% വരെയാണ്. വായ്പ തുകയുടെ 2% വരെയാണ് പ്രോസസിംഗ് ഫീസ് ഈടാക്കുന്നത്.

യെസ് ബാങ്ക്: പ്രതിമാസം 25,000 രൂപ സ്ഥിര വരുമാനവും നല്ല ക്രെഡിറ്റ് സ്കോറും ഉള്ളവർക്ക് 11.25% മുതൽ 21% വരെ പലിശ നിരക്കിൽ വ്യക്തിഗത വായ്പകൾ നേടാം. പ്രോസസിംഗ് ഫീസ് ലോൺ തുകയുടെ 2.5% വരെയാണ്.

കൊട്ടക് മഹീന്ദ്ര ബാങ്ക്: കൊട്ടക് മഹീന്ദ്ര ബാങ്കിൽ 10.99% പലിശ നിരക്കിൽ 35 ലക്ഷം രൂപ വരെ വായ്പയായി എടുക്കാം. ഒരു വർഷം മുതൽ ആറ് വർഷം വരെയാണ് ഇതിന്റെ കാലാവധി.

കുറഞ്ഞ പലിശ നിരക്കിൽ വ്യക്തിഗത വായ്പ എങ്ങനെ നേടാം?

കുറഞ്ഞ പലിശ നിരക്കിൽ വ്യക്തിഗത വായ്പ ലഭിക്കാൻ സഹായിക്കുന്ന ചില കാര്യങ്ങൾ ഇതാ:

മികച്ച ക്രെഡിറ്റ് സ്കോർ: കുറഞ്ഞ പലിശ നിരക്കിൽ വ്യക്തിഗത വായ്പ ലഭിക്കാൻ സഹായിക്കുന്ന പ്രധാന കാര്യങ്ങളിൽ ഒന്ന് മികച്ച ക്രെഡിറ്റ് സ്കോർ നിലനിർത്തുക എന്നതാണ്. ഉയർന്ന ക്രെഡിറ്റ് സ്കോർ (750-ന് മുകളിൽ) ഉണ്ടെങ്കിൽ കുറഞ്ഞ പലിശ നിരക്കിൽ എളുപ്പത്തിൽ വായ്പ ലഭിക്കും. 750-ൽ കുറഞ്ഞ ക്രെഡിറ്റ് സ്കോർ ഉള്ളവർ വായ്പക്ക് അപേക്ഷിക്കുന്നതിന് മുമ്പ് അത് മെച്ചപ്പെടുത്താൻ ശ്രമിക്കുക.

കൃത്യ സമയത്തുള്ള ഇഎംഐ പേയ്മെന്റുകൾ: വായ്പയോ, ക്രെഡിറ്റ് കാർഡ് കടമോ കൃത്യ സമയത്ത് തിരിച്ചടച്ചില്ലെങ്കിൽ അത് ക്രെഡിറ്റ് സ്കോറിനെ ബാധിക്കും. വ്യക്തിഗത വായ്പക്ക് പലിശ നിരക്ക് തീരുമാനിക്കുന്നതിന് മുമ്പ് ധനകാര്യ സ്ഥാപനങ്ങൾ ഇത് പരിഗണിക്കും.

കുറഞ്ഞ ലോൺ കാലാവധി: കുറഞ്ഞ പലിശ നിരക്കിൽ വായ്പ എടുക്കാൻ ആഗ്രഹിക്കുന്നവർക്ക് കുറഞ്ഞ തിരിച്ചടവ് കാലാവധി തിരഞ്ഞെടുക്കാവുന്നതാണ്. ഇങ്ങനെ ചെയ്യുമ്പോൾ മാസ തവണകൾ (EMI) കൂടുമെങ്കിലും പലിശ നിരക്ക് കുറവായിരിക്കും.

പലിശ കുറക്കാൻ സംസാരിക്കുക: നിലവിലുള്ള ഉപഭോക്താക്കൾക്ക് പലിശ നിരക്ക് കുറയ്ക്കാൻ ബാങ്കിനോട് ആവശ്യപ്പെടാം. ഇതിനായി ഒരു കത്ത് നൽകാവുന്നതാണ്.

അറിയിപ്പ്:
മുകളില്‍ കൊടുത്തിരിക്കുന്ന ലേഖനം പഠനാവശ്യത്തിന് നൽകുന്നതാണ്. ഇതുമായി ബന്ധപ്പെട്ട് നിക്ഷേപ തീരുമാനങ്ങള്‍ എടുക്കും മുന്‍പ് സാമ്പത്തിക വിദഗ്ധന്റെ നിര്‍ദേശം തേടാം. ഓഹരി വിപണിയിലെ നിക്ഷേപം നഷ്ട സാധ്യതകള്‍ക്ക് വിധേയമാണ്. സ്വന്തം റിസ്‌കില്‍ മാത്രം നിക്ഷേപ തീരുമാനം കൈക്കൊള്ളുക. ലേഖനം വായിച്ചിട്ട് എടുക്കുന്ന തീരുമാനത്തിന്റെ അടിസ്ഥാനത്തില്‍ സംഭവിക്കുന്ന ലാഭനഷ്ടങ്ങള്‍ക്ക് ഗുഡ്റിട്ടേൺസ് മലയാളവും ലേഖകനും ഉത്തരവാദികളല്ല.