വിവാഹം ഇനി ടെൻഷനില്ലാതെ നടത്താം; 12,000 രൂപയുടെ എസ്‌ഐ‌പി വഴി 50 ലക്ഷം രൂപ സമ്പാദിക്കാം

ഇന്ത്യൻ കുടുംബങ്ങളെ സംബന്ധിച്ചിടത്തോളം മക്കളുടെ വിവാഹം എന്നത് വൈകാരികമായ ഒരു ചടങ്ങ് മാത്രമല്ല, വലിയൊരു സാമ്പത്തിക ഉത്തരവാദിത്തം കൂടിയാണ്. ശരിയായ ആസൂത്രണമില്ലെങ്കിൽ വിവാഹച്ചെലവുകൾ കുടുംബത്തിന്റെ സാമ്പത്തിക ഭദ്രതയെ തന്നെ ബാധിച്ചേക്കാം. എന്നാൽ കൃത്യമായ നിക്ഷേപ ശൈലിയിലൂടെ 50 ലക്ഷം രൂപയുടെ ഒരു വലിയ സമ്പാദ്യം മക്കളുടെ വിവാഹത്തിനായി സ്വരൂപിക്കാം.

ഒരു 'സ്റ്റെപ്പ്-അപ്പ് എസ്‌ഐ‌പി' വഴി വളരെ ലളിതമായി ഈ ലക്ഷ്യം കൈവരിക്കാനാകും. ഒരു കുട്ടിക്ക് 5 വയസ്സുള്ളപ്പോൾ നിക്ഷേപം ആരംഭിച്ചാൽ, 20 വർഷത്തിന് ശേഷം (കുട്ടിക്ക് 25 വയസ്സാകുമ്പോൾ) വിവാഹ ആവശ്യങ്ങൾക്കായി 50 ലക്ഷം രൂപ കണ്ടെത്താൻ സാധിക്കും. ഇതിലെ പ്രധാന സവിശേഷത ഓരോ വർഷവും നിക്ഷേപ തുകയിൽ വരുത്തുന്ന ചെറിയ വർദ്ധനവാണ്.

ആദ്യ വർഷം: പ്രതിമാസം 12,000 രൂപ

ഈ പ്ലാൻ പ്രകാരം നിക്ഷേപം ആരംഭിക്കേണ്ടത് പ്രതിമാസം 12,000 രൂപ വെച്ചാണ്. ഓരോ വർഷവും നിക്ഷേപ തുകയിൽ 10 ശതമാനം വർദ്ധനവ് വരുത്തണം. അതായത് രണ്ടാം വർഷം മാസം 13,200 രൂപയും, മൂന്നാം വർഷം 14,520 രൂപയും നിക്ഷേപിക്കണം. ഓഹരി അധിഷ്ഠിത മ്യൂച്വൽ ഫണ്ടുകളിൽ നിന്ന് ശരാശരി 12 ശതമാനം വാർഷിക റിട്ടേൺ ലഭിക്കുമെന്ന് പ്രതീക്ഷിച്ചാൽ, 20 വർഷം കൊണ്ട് നിങ്ങളുടെ സമ്പാദ്യം ഏകദേശം 50 ലക്ഷം രൂപയായി മാറും.

എന്തുകൊണ്ട് സ്റ്റെപ്പ്-അപ്പ് എസ്‌ഐ‌പി?

നിക്ഷേപകർക്ക് അവരുടെ സമ്പാദ്യം കൂടുതൽ കാര്യക്ഷമമായി വളർത്താൻ സഹായിക്കുന്ന ഒരു മികച്ച രീതിയാണ് സ്റ്റെപ്പ്-അപ്പ് എസ്‌ഐ‌പി. സാധാരണ എസ്ഐപികളിൽ നിന്ന് വ്യത്യസ്തമായി, നിക്ഷേപ തുക കൃത്യമായ ഇടവേളകളിൽ വർദ്ധിപ്പിക്കാൻ ഇതിലൂടെ സാധിക്കും. ഓരോ മാസവും ഒരു നിശ്ചിത തുക ഓഹരി വിപണിയിലോ മ്യൂച്വൽ ഫണ്ടിലോ നിക്ഷേപിക്കുന്ന രീതിയാണല്ലോ എസ്ഐപി. എന്നാൽ നിങ്ങളുടെ വരുമാനം വർദ്ധിക്കുന്നതിനനുസരിച്ച് (ഉദാഹരണത്തിന് വർഷാവർഷം ലഭിക്കുന്ന ശമ്പള വർദ്ധനവ്) നിക്ഷേപ തുകയിലും മാറ്റം വരുത്തുന്ന രീതിയെയാണ് സ്റ്റെപ്പ്-അപ്പ് എസ്‌ഐ‌പി എന്ന് വിളിക്കുന്നത്.

വിലക്കയറ്റത്തെ പ്രതിരോധിക്കാൻ സ്റ്റെപ്പ്-അപ്പ് രീതി സഹായിക്കുന്നു. നമ്മുടെ വരുമാനം വർഷം തോറും വർദ്ധിക്കുന്നതിനനുസരിച്ച് നിക്ഷേപത്തിലും ചെറിയ മാറ്റങ്ങൾ വരുത്തുന്നത് വലിയൊരു ഭാരമാകില്ല. ദീർഘകാല നിക്ഷേപത്തിലൂടെ ലഭിക്കുന്ന കോമ്പൗണ്ടിംഗ് ഗുണഫലം സമ്പാദ്യത്തെ വേഗത്തിൽ വളർത്തും.

മറ്റ് ലക്ഷ്യങ്ങൾക്കും ഇതേ വഴി

വിവാഹത്തിന് മാത്രമല്ല, മക്കളുടെ ഉന്നത വിദ്യാഭ്യാസം, റിട്ടയർമെന്റ് പ്ലാനിംഗ് തുടങ്ങിയ കാര്യങ്ങൾക്കും ഈ രീതി അവലംബിക്കാവുന്നതാണ്. ഇതൊരു നിക്ഷേപ ഉപദേശമല്ല. തീരുമാനങ്ങൾ എടുക്കുന്നതിന് മുമ്പ് എല്ലായ്പ്പോഴും ഒരു സാമ്പത്തിക ഉപദേഷ്ടാവുമായി കൂടിയാലോചിക്കുക.