പുതിയ ബൈക്ക് വാങ്ങുകയാണോ? 20-4-10 - ഫോർമുല ഉപയോഗിച്ച് വാങ്ങിയാൽ കടം ഒഴിവാക്കാം

സ്വപ്നവാഹനം സ്വന്തമാക്കുക എന്നത് ഏതൊരാളുടെയും വലിയ ആഗ്രഹമാണ്. എന്നാൽ ആവേശത്തിന് പുറത്ത് ബൈക്കോ കാറോ വാങ്ങുമ്പോൾ പലരും പലിശയുടെയും ഇഎംഐയുടെയും വലിയൊരു കെണിയിൽ ചെന്ന് ചാടാറുണ്ട്. മാസാവസാനം കയ്യിൽ പണമില്ലാത്ത അവസ്ഥ ഒഴിവാക്കാനും സാമ്പത്തിക ഭദ്രത ഉറപ്പാക്കാനും വിദഗ്ധർ നിർദ്ദേശിക്കുന്ന ഒരു ലളിതമായ വഴിയാണ് '20-4-10' റൂൾ. ഇത് എന്താണെന്നും എങ്ങനെ പ്രായോഗികമാക്കാമെന്നും നോക്കാം.

എന്താണ് 20-4-10 റൂൾ?

നിങ്ങളുടെ സാമ്പത്തിക ശേഷിക്ക് അനുയോജ്യമായ വാഹനമാണോ നിങ്ങൾ തിരഞ്ഞെടുക്കുന്നത് എന്ന് തീരുമാനിക്കാൻ ഈ മൂന്ന് കാര്യങ്ങൾ ശ്രദ്ധിച്ചാൽ മതിയാകും.

1. '20' - ഡൗൺ പേയ്മെന്റ്

വാഹനത്തിന്റെ ആകെ വിലയുടെ കുറഞ്ഞത് 20 ശതമാനമെങ്കിലും മുൻകൂറായി അടച്ചിരിക്കണം. ഇതിലൂടെ ലോൺ തുക കുറയുന്നു എന്നത് മാത്രമല്ല, തിരിച്ചടയ്ക്കേണ്ടി വരുന്ന ആകെ പലിശയിലും വലിയ കുറവുണ്ടാകും. ബാക്കി 80 ശതമാനം മാത്രം ലോൺ എടുക്കുന്നതാണ് ഉചിതം.

2. '4' - തിരിച്ചടവ് കാലാവധി

വാഹന വായ്പയുടെ കാലാവധി പരമാവധി 4 വർഷത്തിൽ കൂടാൻ പാടില്ല. ലോൺ കാലാവധി കൂടുന്തോറും നിങ്ങൾ അടയ്ക്കേണ്ട പലിശയും വർദ്ധിക്കും. 4 വർഷത്തിനുള്ളിൽ ലോൺ അടച്ചുതീർക്കുന്നത് വഴി അനാവശ്യമായ പലിശ ഭാരം ഒഴിവാക്കാം. കൂടാതെ, വാഹനത്തിന്റെ മൂല്യം ഇടിയുന്നതിന് മുൻപ് തന്നെ നിങ്ങൾ കടബാധ്യതയിൽ നിന്ന് മുക്തനാവുകയും ചെയ്യും.

3. '10' - മാസ വരുമാനത്തിന്റെ പരിധി 

വാഹനത്തിന്റെ മാസ ഗഡു, ഇൻഷുറൻസ്, ഇന്ധനച്ചെലവ്, അറ്റകുറ്റപ്പണികൾ എന്നിവയെല്ലാം ചേർത്ത് നിങ്ങളുടെ മാസ വരുമാനത്തിന്റെ 10 ശതമാനത്തിൽ കൂടരുത്. നിങ്ങളുടെ ശമ്പളത്തിന്റെ വലിയൊരു ഭാഗം വാഹനത്തിനായി മാറ്റിവെക്കേണ്ടി വന്നാൽ അത് നിങ്ങളുടെ മറ്റ് അത്യാവശ്യ ചെലവുകളെയും നിക്ഷേപങ്ങളെയും ബാധിക്കും. 10 ശതമാനം എന്ന പരിധി നിശ്ചയിക്കുന്നതിലൂടെ മാസാവസാനം പണത്തിന് ബുദ്ധിമുട്ട് അനുഭവപ്പെടില്ല.

ഈ റൂൾ അനുസരിച്ച് നിങ്ങളുടെ മാസ വരുമാനം 50,000 രൂപയാണെന്ന് കരുതുക. നിങ്ങളുടെ വാഹനവുമായി ബന്ധപ്പെട്ട എല്ലാ ചെലവുകളും 5,000 രൂപയിൽ കൂടാൻ പാടില്ല. നിങ്ങൾ വാങ്ങാൻ ഉദ്ദേശിക്കുന്ന ബൈക്കിന് 1 ലക്ഷം രൂപയാണ് വിലയെങ്കിൽ, 20,000 രൂപയെങ്കിലും കയ്യിൽ നിന്ന് ഡൗൺ പേയ്മെന്റ് നൽകണം. ബാക്കി തുക 4 വർഷത്തെ ലോണായി എടുക്കുമ്പോൾ ഇഎംഐ നിങ്ങളുടെ ബജറ്റിന് ഉള്ളിലാണോ എന്ന് ഉറപ്പുവരുത്തുക.

ഒരു വാഹനം വാങ്ങുക എന്നത് കേവലം ഒരു സന്തോഷം മാത്രമല്ല, അത് കൃത്യമായ പ്ലാനിംഗ് ആവശ്യമുള്ള ഒരു നിക്ഷേപം കൂടിയാണ്. ആഡംബരത്തേക്കാൾ ഉപരി സ്വന്തം പോക്കറ്റിന് ഇണങ്ങുന്ന വാഹനം തിരഞ്ഞെടുക്കാൻ 20-4-10 റൂൾ നിങ്ങളെ സഹായിക്കും. അടുത്ത തവണ ഷോറൂമിലേക്ക് പോകുന്നതിന് മുൻപ് ഈ കണക്കൊന്ന് കൂട്ടി നോക്കാൻ മറക്കണ്ട.