2026-ൽ 10 ലക്ഷം രൂപ നിക്ഷേപിക്കാനുണ്ടോ? ഇതാ ചില മികച്ച ഇടങ്ങൾ

പുതുവർഷത്തിൽ കൈവശമുള്ള ഒരു വലിയ തുക എവിടെ നിക്ഷേപിക്കണം എന്നാലോചിച്ച് കുഴങ്ങുകയാണോ നിങ്ങൾ? ഓഹരി വിപണിയിലെ ചാഞ്ചാട്ടങ്ങൾക്കിടയിലും മികച്ച ലാഭം കൊയ്യാൻ ചെറിയ രീതിയിൽ റിസ്ക് എടുക്കുന്ന നിക്ഷേപകർക്ക് അനുയോജ്യമായ ചില മാർഗങ്ങളുണ്ട്. 10 ലക്ഷം രൂപ വരെയുള്ള നിക്ഷേപത്തിന് അനുയോജ്യമായവ എന്തൊക്കെയെന്ന് നോക്കാം.

2025-ൽ ഓഹരി വിപണി പ്രതീക്ഷിച്ച പ്രകടനം കാഴ്ചവെച്ചില്ലെങ്കിലും, ദീർഘകാലാടിസ്ഥാനത്തിൽ പണപ്പെരുപ്പത്തെ മറികടക്കാൻ ഇക്വിറ്റി മ്യൂച്വൽ ഫണ്ടുകൾ തന്നെയാണ് മികച്ച മാർഗമെന്ന് സാമ്പത്തിക വിദഗ്ധർ ഒരേ സ്വരത്തിൽ പറയുന്നു. നിക്ഷേപ തുകയുടെ കുറഞ്ഞത് 40 ശതമാനമെങ്കിലും ഇക്വിറ്റിയിൽ ഉൾപ്പെടുത്താനാണ് പൊതുവായ നിർദ്ദേശം.

ചെറിയ രീതിയിൽ റിസ്ക് എടുക്കാൻ താൽപര്യപ്പെടുന്നവർക്ക് ഇക്വിറ്റിയിൽ ഏകദേശം 47 ശതമാനവും അന്താരാഷ്ട്ര ഇക്വിറ്റിയിൽ 14 ശതമാനവും നിക്ഷേപിക്കാം. ഇക്വിറ്റിയിൽ 47 ശതമാനം എന്നു പറയുമ്പോൾ 3 ലക്ഷം രൂപ പരാഗ് പരീഖ് ഫ്ലെക്സി ക്യാപ് ഫണ്ടിലും, 2 ലക്ഷം രൂപ വീതം വൈറ്റ് ഓക്ക് ക്യാപിറ്റൽ മൾട്ടി അസറ്റ്, നിപ്പോൺ ഇന്ത്യ മൾട്ടിക്യാപ് ഫണ്ടുകളിലും നിക്ഷേപിക്കാം. അന്താരാഷ്ട്ര ഇക്വിറ്റി കണക്കിലെടുക്കുമ്പോൾ 1 ലക്ഷം രൂപ കോട്ടക് ഗ്ലോബൽ എമേർജിംഗ് മാർക്കറ്റ്സ് ഫണ്ടിൽ നീക്കിവെക്കാം. കടപ്പത്രങ്ങളിൽ 19% നിക്ഷേപിക്കാം. നികുതി ആനുകൂല്യങ്ങൾ കണക്കിലെടുത്ത് മൾട്ടി അസറ്റ് ഫണ്ടുകൾ വഴി ഈ നിക്ഷേപം നടത്താം. സ്വർണത്തിനും വെള്ളിയിലും 20% നിക്ഷേപിക്കാം. സുരക്ഷിത നിക്ഷേപമെന്ന നിലയിൽ 2 ലക്ഷം രൂപ മിറെ അസറ്റ് ഗോൾഡ് സിൽവർ പാസീവ് ഫണ്ടിൽ നിക്ഷേപിക്കാം.

കുറച്ചുകൂടി ഓഹരി അധിഷ്ഠിതമായ പോർട്ട്‌ഫോളിയോ ആഗ്രഹിക്കുന്നവർ ഈ രീതിയിൽ നിക്ഷേപം നടത്താം. ഇക്വിറ്റിയിൽ 62%, അതായത് ഐസിഐസിഐ തെമാറ്റിക് അഡ്വാന്റേജ്, മിറെ അസറ്റ് ഫ്ലെക്സി ക്യാപ്, വൈറ്റ് ഓക്ക്, കോട്ടക്, നിപ്പോൺ എന്നിവയുടെ മൾട്ടി അസറ്റ് അലോക്കേഷൻ ഫണ്ടുകളിലായി തുക വിന്യസിക്കാം. കടപ്പത്രങ്ങൾ 30% നിക്ഷേപിക്കാം. അതായത്, നികുതി കാര്യക്ഷമതയ്ക്കായി മൾട്ടി അസറ്റ് ഫണ്ടുകൾ വഴിയുള്ള ഡെബ്റ്റ് നിക്ഷേപം. ബാക്കി തുക (8%) സ്വർണ്ണത്തിൽ നിക്ഷേപിക്കാം.

കൂടുതൽ നേട്ടത്തിനായി ഇക്വിറ്റിക്ക് മുൻതൂക്കം നൽകുന്ന രീതിയാണ് മൂന്നാമത്തേത്. ഇക്വിറ്റിയിൽ 72.5% നിക്ഷേപിക്കണം. എച്ച്ഡിഎഫ്സി ഫ്ലെക്സി ക്യാപ്, ഐസിഐസിഐ പ്രുഡൻഷ്യൽ ഇക്വിറ്റി & ഡെബ്റ്റ് എന്നിവയിൽ 2.5 ലക്ഷം രൂപ വീതം നിക്ഷേപിക്കാം. കൂടാതെ സ്മോൾ ക്യാപ്, മിഡ്ക്യാപ് ഫണ്ടുകളിലും ചെറിയ വിഹിതം നൽകാം. 7.5% ഹൈബ്രിഡ് ഫണ്ടുകൾ വഴിയുള്ള ഡെബ്റ്റ് നിക്ഷേപത്തിനും 15% സ്വർണ്ണത്തിനുമായി മാറ്റി വെക്കാം.

നിങ്ങളുടെ റിസ്ക് എടുക്കാനുള്ള ശേഷി അനുസരിച്ച് ഇക്വിറ്റി, ഡെബ്റ്റ്, സ്വർണ്ണം എന്നിവയുടെ കൃത്യമായ നിക്ഷേപം കണ്ടെത്തുകയാണ് പ്രധാനം. സെക്ടർ അടിസ്ഥാനത്തിലുള്ള ഫണ്ടുകൾ ഒഴിവാക്കി വൈവിധ്യവൽക്കരിച്ച മൾട്ടി അസറ്റ് അല്ലെങ്കിൽ ഫ്ലെക്സി ക്യാപ് ഫണ്ടുകൾ തിരഞ്ഞെടുക്കുന്നത് 2026-ൽ സുരക്ഷിതമായ നേട്ടം നൽകാൻ സഹായിക്കും.