പിഎം കിസാൻ യോജന: 20ാം ​ഗഡു എപ്പോൾ എത്തും? പുതിയ കർഷകർക്ക് ഈ സ്കീമിൽ എങ്ങനെ അപേക്ഷിക്കാം?

പ്രധാൻ മന്ത്രി കിസാൻ സമ്മാൻ നിധി എന്ന പിഎം കിസാൻ പദ്ധതിയുടെ 20-ാം ഗഡുവിനായി ഇന്ത്യയിലെ കർഷകരെല്ലാം കാത്തിരിക്കുകയാണ്. ഇത്തവണ ജൂണിൽ എത്തേണ്ടിയിരുന്ന 20ാം ​ഗഡു ഇനിയും കർഷകരുടെ അക്കൗണ്ടുകളിൽ എത്തിയിട്ടില്ല. ജൂലൈ 18 എത്തുമെന്ന് വാർത്തകൾ എത്തിയിരുന്നുവെങ്കിലും ഔദ്യോ​ഗികമായ പ്രഖ്യാപനങ്ങളൊന്നും ഇതുവരെയും വന്നിട്ടില്ല. 9 കോടിയിലധികം കർഷകരാണ് പുതിയ പ്രഖ്യാപനത്തിനായി കാത്തിരിക്കുന്നത്.

പിഎം‌ കിസാൻ പദ്ധതിയുടെ 19-ാം ഗഡു ഫെബ്രുവരിയിൽ എത്തിയിരുന്നു. സാധാരണയായി നാല് മാസത്തിലൊരിക്കൽ ഓരോ ​ഗഡുവും നൽകേണ്ടതുണ്ട്. ഇപ്പോൾ ജൂലൈ അവസാനിക്കാറായിട്ടും 20ാം ​ഗഡുവിനെ കുറിച്ച് ഒരു അറിവും ഇല്ല. ഗഡു ഉടൻ വിതരണം ചെയ്തേക്കും, അതിനാൽ പ്രധാനമന്ത്രി കിസാൻ പദ്ധതിയുടെ ഔദ്യോഗിക വെബ്‌സൈറ്റ് എപ്പോഴും പരിശോധിക്കുക. ഇത്തവണ ആ​ഗസ്റ്റ് 2നായിരിക്കും പിഎം കിസാൻ്റെ 20ാം ​ഗഡു എത്തുന്നത് എന്ന വാർത്തകൾ പ്രചരിക്കുന്നുണ്ട്.

നിലവിൽ 20-ാം ഗഡുവിന് കാത്തിരിക്കുന്നവരെ പോലെ പുതിയ ആളുകൾക്കും പിഎം കിസാൻ പദ്ധതിയിൽ ചേരാനുള്ള അവസരമുണ്ട്. ആർക്കെല്ലാമാണ് പിഎം കിസാൻ യോജനയിൽ അപേക്ഷിക്കാൻ അർഹതയുള്ളത്? എങ്ങനെ അപേക്ഷിക്കാം? വിശദമായി അറിയാം.

പിഎം കിസാൻ യോജനയുടെ യോ​ഗ്യത

• അപേക്ഷകൻ ഒരു ഇന്ത്യൻ പൗരനായിരിക്കണം
• സ്വന്തമായി കൃഷിയോഗ്യമായ ഭൂമി ഉണ്ടായിരിക്കണം.
• ഒരു ചെറുകിട കർഷകനായിരിക്കണം
• പ്രതിമാസം 10,000 രൂപയോ അതിൽ കൂടുതലോ പെൻഷൻ വാങ്ങുന്നവർക്ക് യോ​ഗ്യതയില്ല
• ഒരു ഇൻസ്റ്റിറ്റ്യൂഷണൽ ഭുവുടമയാവരുത്.

Take a Poll

പിഎം കിസാൻ യോജനക്ക് എങ്ങനെ അപേക്ഷിക്കാം?

1. pmkisan.gov.in എന്ന പോർട്ടൽ തുറക്കാം

2. ഹോംപേജിലെ 'പുതിയ കർഷക രജിസ്ട്രേഷൻ' എന്ന ഓപ്ഷൻ ക്ലിക്ക് ചെയ്യുക. ആധാർ നമ്പർ, സംസ്ഥാനം, കാപ്ച കോഡ് എന്നിവ സമർപ്പിക്കുക.

3. ഒടിപി ഉപയോഗിച്ച് നിങ്ങളുടെ ആധാർ പരിശോധിക്കുക

4. പരിശോധനക്ക് ശേഷം അപേക്ഷ പൂരിപ്പിക്കുക. ആധാർ പ്രകാരമുള്ള നിങ്ങളുടെ പേര്, ബാങ്ക് അക്കൗണ്ട് നമ്പറും IFSC കോഡും, മൊബൈൽ നമ്പർ, ഭൂമിയുടെ ഉടമസ്ഥാവകാശ വിശദാംശങ്ങൾ എന്നിവ നൽകണം.

5. വിവരങ്ങൾ സമർപ്പിച്ച ശേഷം സ്ഥിരീകരണത്തിനായി കാത്തിരിക്കുക.

അപേക്ഷ സമർപ്പിച്ചതിന് ശേഷം വിവരങ്ങൾ സ്ഥിരീകരിക്കുന്നതിനായി സംസ്ഥാന നോഡൽ ഓഫീസർക്ക് (SNO) ഇത് അയയ്ക്കും. അംഗീകാരം ലഭിച്ചുകഴിഞ്ഞാൽ നിങ്ങളുടെ പേരും ഗുണഭോക്തൃ പട്ടികയിൽ കാണാൻ സാധിക്കും.

എന്താണ് പ്രധാനമന്ത്രി കിസാൻ പദ്ധതി?

ഇന്ത്യയിലെ കോടിക്കണക്കിന് കർഷകർക്ക് സാമ്പത്തിക സുരക്ഷ ഉറപ്പാക്കുന്നതിനായി 2019-ൽ ആരംഭിച്ച പദ്ധതിയാണ് പിഎം കിസാൻ പദ്ധതി. ഇത് ലോകത്തിലെ ഏറ്റവും വലിയ ഡിബിടി പദ്ധതിയായി മാറി. യോഗ്യരായ കർഷകർക്ക് വർഷത്തിൽ മൂന്ന് തവണ 2,000 രൂപ വീതം ലഭിക്കും. അതായത് പ്രതിവർഷം 6,000 രൂപ ലഭിക്കും. ഈ തുക ഗുണഭോക്താക്കളുടെ ബാങ്ക് അക്കൗണ്ടുകളിലേക്ക് നേരിട്ട് എത്തുന്നു.