ബാങ്ക് എഫ്.ഡിയേക്കാൾ മികച്ചത്, 1.7 ലക്ഷം പലിശ നേടാം, സമ്പാദ്യം വളർത്താൻ ഇതാണ് മികച്ച മാർഗം

ഏറ്റവും സുരക്ഷിതമായി സമ്പാദ്യം വർദ്ധിപ്പിക്കാനുള്ള മാർഗം സ്ഥിര നിക്ഷേപമാണ്. ഓഹരി വിപണിയുടെ അപകട സാധ്യതകളോ മ്യൂച്വൽ ഫണ്ടുകളുടെ കണക്ക് കൂട്ടലുകളുടേയോ ആവശ്യമില്ലാത്ത നിക്ഷേപ മാർഗം. കയ്യിലുള്ള പണം നിക്ഷേപിക്കുക, കുറച്ച് വർഷത്തേക്ക് അതിനെക്കുറിച്ച് മറക്കുക. നിക്ഷേപ കാലാവധി പൂർത്തിയാകുമ്പോൾ മികച്ച സമ്പാദ്യം നേടുക. സ്ഥിര നിക്ഷേപം എന്ന് കേൾക്കുമ്പോൾ എല്ലാവരും കരുതുക ബാങ്ക് എഫ്.ഡിയാണ് മികച്ചത് എന്നാണ്. എന്നാൽ ബാങ്ക് എഫ്.ഡിയേക്കാൾ മികച്ച പലിശ നൽകുന്ന സ്ഥിര നിക്ഷേപം പോസ്റ്റ് ഓഫീസുകൾ വാഗ്ധാനം ചെയ്യുന്നുണ്ട്.

പോസ്റ്റ് ഓഫീസ് ഫിക്സഡ് ഡെപ്പോസിറ്റ്

ടൈം ഡെപ്പോസിറ്റ് എന്നും അറിയപ്പെടുന്ന പോസ്റ്റ് ഓഫീസ് സ്ഥിര നിക്ഷേപം ഇന്ത്യയിലെ ഏറ്റവും ജനപ്രിയമായ സേവിംഗ്സ് സ്കീമുകളിൽ ഒന്നാണ്. നിങ്ങൾക്ക് 1 വർഷം, 2 വർഷം, 3 വർഷം അല്ലെങ്കിൽ 5 വർഷം എന്നിങ്ങനെയുള്ള കാലാവധികളിൽ നിക്ഷേപം നടത്താൻ സാധിക്കും. നിലവിലെ പലിശ നിരക്ക് പരിശോധിച്ചാല്‍ ഒരു വര്‍ഷത്തേക്ക് 6.9 ശതമാനവും രണ്ട് വര്‍ഷത്തേക്ക് 7 ശതമാനവും മൂന്ന് വര്‍ഷത്തേക്ക് 7.1 ശതമാനവും അഞ്ചു വര്‍ഷത്തേക്ക് 7.5 ശതമാനവും ടൈം ഡെപ്പോസിറ്റ് വാഗ്ദാനം ചെയ്യുന്നു.

1.7 ലക്ഷം പലിശ നേടാം

നിലവിലെ 7.5 ശതമാനം പലിശ നിരക്കിൽ 5 വർഷത്തേക്ക് നിങ്ങൾ 4 ലക്ഷം രൂപ നിക്ഷേപിച്ചു എന്ന് കരുതുക. കാലാവധി പൂർത്തിയാകുമ്പോൾ 5,79,979 രൂപ നേടാൻ സാധിക്കും. അതായത് 4 ലക്ഷം നിക്ഷേപത്തിന് ലഭിക്കുന്ന പലിശ 1,79,000 രൂപ.

ഉദാഹരണം

ഒരു ചെറിയ ഭൂമി വിറ്റ് 4 ലക്ഷം ലഭിച്ച സുനിത എന്ന വീട്ടമ്മയെ സങ്കൽപ്പിക്കുക. ഓഹരികളിലോ മ്യൂച്വൽ ഫണ്ടുകളിലോ നിക്ഷേപിച്ച് റിസ്ക് എടുക്കാൻ അവർ ആഗ്രഹിച്ചില്ല. പകരം 5 വർഷത്തേക്ക് ഒരു പോസ്റ്റ് ഓഫീസ് എഫ്.ഡിയിൽ നിക്ഷേപിച്ചു. 5 വർഷത്തിന്‍റെ അവസാനം, ഒടുവിൽ അവർ എഫ്ഡി പിൻവലിച്ചപ്പോൾ, അക്കൗണ്ടിൽ ഏകദേശം 5.8 ലക്ഷം ഉണ്ടായിരുന്നു. അതായത് നിശബ്ദമായി, വിയർപ്പൊഴുക്കാതെ, സമയം കളയാതെ സുനിത സമ്പാദിച്ചത് 1.7 ലക്ഷം രൂപ.

നികുതി ഇളവ്

പോസ്റ്റ് ഓഫീസ് ടൈം ഡെപ്പോസിറ്റ് സ്കീമിൽ, 1961 ലെ ആദായനികുതി നിയമത്തിലെ സെക്ഷൻ 80C പ്രകാരം നികുതി ഇളവിന്റെ ആനുകൂല്യം ലഭിക്കും. ഇതിലെ നിക്ഷേപത്തിനും വായ്പ എടുക്കാം, ഇതിനായി നിയമങ്ങൾ നിശ്ചയിച്ചിട്ടുണ്ട്. ഇതോടൊപ്പം, ഈ പോസ്റ്റ് ഓഫീസ് സേവിംഗ്സ് സ്കീമിൽ ഒരു സിംഗിൾ അക്കൗണ്ടോ ജോയിന്‍റ് അക്കൗണ്ടോ തുറക്കാം. 10 വയസ്സിന് മുകളിലുള്ള കുട്ടിയുടെ അക്കൗണ്ട് അവന്‍റെ/അവളുടെ കുടുംബാംഗം വഴി തുറക്കാം.

നിക്ഷേപം ആരംഭിക്കാം

പോസ്റ്റ് ഓഫീസിൽ എഫ്ഡി തുറക്കുന്നത് വളരെ എളുപ്പമാണ്. പണം അല്ലെങ്കിൽ ചെക്ക് ഉപയോഗിച്ച് ഓഫ്‌ലൈനായി അല്ലെങ്കിൽ നെറ്റ് ബാങ്കിംഗ് അല്ലെങ്കിൽ ഇന്റർനെറ്റ് ബാങ്കിംഗ് ഉപയോഗിച്ച് ഓൺലൈനായി എഫ് ഡി അക്കൗണ്ട് ആരംഭിക്കാവുന്നതാണ്. ഒരു പോസ്റ്റ് ഓഫീസിൽ നിന്ന് മറ്റൊന്നിലേക്ക് വളരെ എളുപ്പത്തിൽ തന്നെ എഫ് ഡി ട്രാൻസ്ഫർ ചെയ്യാം.