പോസ്റ്റ് ഓഫീസ് എഫ്ഡിയോ ആർഡിയോ: 5 വർഷത്തേക്ക് 6 ലക്ഷം നിക്ഷേപിച്ചാൽ നേട്ടം ഏത്?

സമ്പാദ്യത്തിന്റെയും നിക്ഷേപത്തിന്റെയും കാര്യത്തിൽ, പോസ്റ്റ് ഓഫീസ് രണ്ട് ജനപ്രിയ ഓപ്ഷനുകൾ വാഗ്‌ദാനം ചെയ്യുന്നുണ്ട്. ഫിക്സഡ് ഡെപ്പോസിറ്റും റിക്കറിംഗ് ഡെപ്പോസിറ്റും. എഫ്‌ഡികൾ ഒറ്റത്തവണ നിക്ഷേപത്തിലൂടെ പലിശ സഹിതമുള്ള തുക തിരികെ നൽകുന്നു. എന്നാൽ, ആർ‌ഡികൾ പ്രതിമാസ തവണകളായി പണം നിക്ഷേപിക്കാൻ അവസരം നൽകുന്നു. സർക്കാർ പിന്തുണയുള്ളതിനാൽ രണ്ടും ഉറപ്പുള്ള റിട്ടേണുകൾ വാഗ്‌ദാനം ചെയ്യുന്നുണ്ട്. എന്നാൽ, അവയിൽ നിക്ഷേപിക്കുന്ന പണത്തിന്റെ വളർച്ചയുടെ കാര്യത്തിൽ വ്യത്യാസങ്ങളുണ്ട്. 5 വർഷത്തേക്ക് 6 ലക്ഷം രൂപ നിക്ഷേപിക്കാൻ ആലോചിക്കുന്നുവെങ്കിൽ ഇവയിൽ ഏതാണ് ഉയർന്ന വരുമാനം നൽകുന്നതെന്ന് നോക്കാം.

എന്താണ് പോസ്റ്റ് ഓഫീസ് ഫിക്സഡ് ഡെപ്പോസിറ്റ് (FD)?

പോസ്റ്റ് ഓഫീസിന്റെ ഒരു ചെറിയ സേവിംഗ്സ് സ്കീമാണ് പോസ്റ്റ് ഓഫീസ് എഫ്ഡി. വ്യക്തികൾക്ക് ഒരു നിശ്ചിത കാലയളവിലേക്ക് ഒരു വലിയ തുക നിക്ഷേപിക്കാം. മുൻകൂട്ടി നിശ്ചയിച്ച നിരക്കിൽ അവർക്ക് ആ തുകയ്ക്ക് പലിശ ലഭിക്കും. പോസ്റ്റ് ഓഫീസ് എഫ്ഡികളുടെ കാലാവധി 1 മുതൽ 5 വർഷം വരെയാണ്. സർക്കാർ പിന്തുണയുള്ള ഒരു നിക്ഷേപ പദ്ധതിയാണിത്. നിക്ഷേപിച്ച തുകയ്ക്ക് സുരക്ഷ നൽകുന്നതിനൊപ്പം ആകർഷകമായ പലിശ നിരക്കുകളും നൽകുന്നുവെന്നതാണ് ഇവയുടെ സവിശേഷത.

പോസ്റ്റ് ഓഫീസ് എഫ്ഡി 5 വർഷ കാലാവധിയുള്ള നിക്ഷേപങ്ങൾക്ക് ആദായനികുതി നിയമത്തിലെ സെക്ഷൻ 80C പ്രകാരമുള്ള നികുതി ആനുകൂല്യങ്ങൾ ലഭിക്കും. ഒറ്റത്തവണ നിക്ഷേപത്തിനുള്ള ഏറ്റവും കുറഞ്ഞ തുക 1,000 രൂപയാണ്. പരമാവധി നിക്ഷേപത്തിന് പരിധിയില്ല.

പോസ്റ്റ് ഓഫീസ് എഫ്ഡി പലിശ നിരക്കുകൾ

ഒരു വർഷത്തെ എഫ്ഡി നിക്ഷേപങ്ങൾക്ക് 6.9 ശതമാനമാണ് പോസ്റ്റ് ഓഫീസ് നൽകുന്ന പലിശ നിരക്ക്. 2 വർഷത്തെ നിക്ഷേപങ്ങൾക്ക് 7 ശതമാനവും 3 വർഷത്തെ നിക്ഷേപങ്ങൾക്ക് 7.1 ശതമാനവും 5 വർഷത്തെ നിക്ഷേപങ്ങൾക്ക് 7.5 ശതമാനവും പലിശയായി നൽകുന്നു.

എന്താണ് പോസ്റ്റ് ഓഫീസ് റിക്കറിംഗ് ഡെപ്പോസിറ്റ് (RD)?

പോസ്റ്റ് ഓഫീസ് വാഗ്‌ദാനം ചെയ്യുന്ന ഒരു സേവിംഗ്സ് സ്കീമാണ് പോസ്റ്റ് ഓഫീസ് ആർഡി. 1 മുതൽ 5 വർഷം വരെയുള്ള ഒരു നിശ്ചിത കാലയളവിലേക്ക് വ്യക്തികൾക്ക് പ്രതിമാസ നിക്ഷേപം നടത്താൻ കഴിയും. എല്ലാ മാസവും ഒരു നിശ്ചിത തുക നിക്ഷേപിക്കാം, മൊത്ത തുകയ്ക്ക് പലിശയും ലഭിക്കും. സേവിംഗ്സ് അക്കൗണ്ട് വഴി ഏത് പോസ്റ്റ് ഓഫീസിലും ഒരു ആർ‌ഡി അക്കൗണ്ട് തുറക്കാൻ കഴിയും. ഇത് ഓഫ്‌ലൈനായും ഓൺ‌ലൈനായും തുറക്കാം. ഒറ്റയ്ക്കോ ജോയിന്റ് അക്കൗണ്ട് ആയോ തുറക്കാം.

പോസ്റ്റ് ഓഫീസ് ആർ‌ഡിയുടെ കാലാവധി 5 വർഷമാണ്. അക്കൗണ്ട് 5 വർഷത്തേക്ക് കൂടി നീട്ടാൻ കഴിയും. പോസ്റ്റ് ഓഫീസ് ആർ‌ഡിയിൽ പ്രതിമാസ നിക്ഷേപത്തിനുള്ള ഏറ്റവും കുറഞ്ഞ തുക 100 രൂപയോ അതിൽ കൂടുതലോ ആണ്. നിലവിൽ പ്രതിവർഷം 6.7​% ആണ് പലിശ നിരക്ക്.

6 ലക്ഷം നിക്ഷേപിച്ചാൽ കൂടുതൽ തുക കിട്ടുന്നത് എവിടെ?

പോസ്റ്റ് ഓഫീസ് എഫ്ഡിയിൽ 5 വർഷത്തേക്ക് 6 ലക്ഷം രൂപ നിക്ഷേപിച്ചാൽ പ്രതിവർഷം 7.5 ശതമാനം പലിശ നിരക്ക് കണക്കാക്കുമ്പോൾ, പലിശയായി കിട്ടുക 2,69,969 രൂപയാണ്. 5 വർഷം പൂർത്തിയാകുമ്പോൾ കയ്യിൽ കിട്ടുക 8,69,969 രൂപയാണ്.

പോസ്റ്റ് ഓഫീസ് ആർഡിയിൽ 5 വർഷത്തേക്ക് 6 ലക്ഷം നിക്ഷേപിച്ചാൽ, പ്രതിവർഷം 6.7 ശതമാനം പലിശ നിരക്കിൽ, പലിശ ഇനത്തിൽ കിട്ടുക 1,13,659 രൂപയും കാലാവധി പൂർത്തിയാകുമ്പോൾ കിട്ടുന്ന മൊത്തം തുക 7,13,659 രൂപയുമായിരിക്കും.