വെറും 50,000 രൂപ നിക്ഷേപം നടത്തൂ, 3,300 രൂപ പെന്‍ഷനായി നേടാം; ഈ പോസ്റ്റ് ഓഫീസ് പദ്ധതിയെക്കുറിച്ച് അറിയാമോ

വിശ്വസനീയമായ നിക്ഷേപ പദ്ധതികളെയാണ് നിക്ഷേപകര്‍ എപ്പോഴും അന്വേഷിക്കുന്നതും തെരഞ്ഞെടുക്കുന്നതും. അതിനൊപ്പം മതിയായ ആദായവും ലഭിക്കണം. ഇവിടെയാണ് പോസ്റ്റ് ഓഫീസ് നിക്ഷേപങ്ങള്‍ ആകര്‍ഷകമാകുന്നത്. നിക്ഷേപങ്ങള്‍ക്ക് പൂര്‍ണമായ സുരക്ഷിതത്വവും ഒപ്പം ഉയര്‍ന്ന ആദായവും പോസ്റ്റ് ഓഫീസ് നിക്ഷേപങ്ങളിലൂടെ നിക്ഷേപകര്‍ക്ക് ലഭിക്കുന്നു. നിക്ഷേപകര്‍ക്ക് മികച്ച നേട്ടങ്ങള്‍ വാഗ്ദാനം ചെയ്യുന്നതും, ഓരോ കാലത്തിനും അനുസൃതമായതുമായ വിവിധ തരത്തിലുള്ള നിക്ഷേപ പദ്ധതികള്‍ പോസ്റ്റ് ഓഫീസ് വകുപ്പ് അവതരിപ്പിക്കാറുണ്ട്.

അവയിലൊന്നാണ് പ്രതിമാസ നിക്ഷേപ പദ്ധതികള്‍ അഥവാ എംഐഎസ്. ഈ പോസ്റ്റ് ഓഫീസ് പദ്ധതിയില്‍ നിശ്ചിത തുക ഒറ്റത്തവണ നിക്ഷേപം നടത്തിയാല്‍ നിക്ഷേപകന് സ്ഥിരമായ പെന്‍ഷനാണ് ലഭിക്കുക. പെന്‍ഷനൊപ്പം നിക്ഷേപകന് മെച്വൂരിറ്റി നേട്ടങ്ങളും ലഭിക്കും.

100-ന്റേയോ 1000-ന്റേയോ ഗുണിതങ്ങളായി പോസ്റ്റ് ഓഫീസ് നിക്ഷേപ പദ്ധതിയില്‍ നിക്ഷേപം നടത്താം. എന്നാല്‍ പരമാവധി ഒരു വ്യക്തിയ്ക്ക് നിക്ഷേപം നടത്താവുന്ന തുകയ്ക്ക് പരിധിയുണ്ട്. 4.5 ലക്ഷം രൂപയാണ് പോസ്റ്റ് ഓഫീസ് മന്ത്ലി ഇന്‍കം സ്‌കീം അക്കൗണ്ടില്‍ ഒരു വ്യക്തിയ്ക്ക് പരമാവധി നിക്ഷേപം നടത്തുവാന്‍ സാധിക്കുക. ഏറ്റവും ചുരുങ്ങിയ നിക്ഷപ തുക 1,000 രൂപയാണ്.

3 നിക്ഷേപകര്‍ക്ക് ഒന്നിച്ചും ഈ പോസ്റ്റ് ഓഫീസ് നിക്ഷേപ പദ്ധതിയില്‍ സംയുക്ത അക്കൗണ്ട് ആരംഭിക്കാം. അങ്ങനെയാണെങ്കില്‍ അക്കൗണ്ടില്‍ നിക്ഷേപിക്കാവുന്ന പരമാവധി തുക 9 ലക്ഷം രൂപയായി ഉയരും.

നിലവില്‍ 6.6 ശതമാനമാണ് പോസ്റ്റ് ഓഫീസ് എംഐസ് പദ്ധതിയില്‍ വാഗ്ദാനം ചെയ്യുന്ന പലിശ നിരക്ക്. കൂട്ടുപലിശയല്ല സിംപിള്‍ പലിശ നിരക്കാണ് ഇവിടെ ഉപയോഗിക്കുന്നതും നിക്ഷേപകര്‍ അറിഞ്ഞിരിക്കേണ്ടതുണ്ട്.

എംഐഎസ് കാല്‍ക്കുലേറ്റര്‍ പ്രകാരം ഒരിക്കല്‍ 50,000 രൂപ നിക്ഷേപം നടത്തിയാല്‍ വാര്‍ഷിക പെന്‍ഷനായി നിക്ഷേപകന് 3,300 രൂപ ലഭിക്കും. അഞ്ച് വര്‍ഷത്തിലെ നിക്ഷേപത്തില്‍ ആകെ പലിശ ഇനത്തില്‍ ലഭിക്കുന്നത് 16,500 രൂപയായിരിക്കും.

ഉദാഹരണത്തിന് നിങ്ങള്‍ 1 ലക്ഷം രൂപ പദ്ധതിയില്‍ നിക്ഷേപിച്ചു എന്ന് കരുതുക. നിങ്ങള്‍ക്ക് ഓരോ മാസവും 550 രൂപ പെന്‍ഷന്‍ തുകയായി ലഭിക്കും. അതായത് വര്‍ഷം 6,600 രൂപ. അഞ്ച് വര്‍ഷം കൊണ്ട് ആകെ 33,000 രൂപ ലഭിക്കും. 4.5 ലക്ഷം രൂപ പദ്ധതിയില്‍ നിക്ഷേപിച്ചാല്‍ മാസം 2,475 രൂപയാണ് പെന്‍ഷനായി ലഭിക്കുക. പ്രതിവര്‍ഷം 29,700 രൂപ. അപ്പോള്‍ പലിശ ഇനത്തില്‍ ആകെ ലഭിക്കുന്നത് 1,48,500 രൂപ.