എല്ലാമാസവും 9,250 രൂപ വരുമാനം നേടാം, ചെയ്യേണ്ടത് ഇത്രമാത്രം, ബാങ്ക് സ്ഥിര നിക്ഷേപത്തേക്കാൾ മികച്ചത്

രാജ്യത്തെ ബാങ്കുകൾ ആർ‌ബി‌ഐയുടെ റിപ്പോ നിരക്കിനനുസരിച്ച് സ്ഥിര നിക്ഷേപങ്ങളുടെ പലിശ നിരക്കിൽ മാറ്റം വരുത്താറുണ്ട്. എന്നാൽ പോസ്റ്റ് ഓഫീസ് പദ്ധതികൾ സ്ഥിരമായ വരുമാനം വാഗ്ദാനം ചെയ്യുന്നു. ആർ‌ബി‌ഐയുടെ റിപ്പോ നിരക്ക് കുറയ്ക്കൽ ബാങ്ക് സേവിംഗ്സ് അക്കൗണ്ടുകളെ ബാധിച്ചാലും, പോസ്റ്റ് ഓഫീസ് പദ്ധതികൾ മാറ്റമില്ലാതെ തുടരുന്നു. ഇത് നിക്ഷേപകരെ ആകർഷിക്കുന്നു. വിരമിക്കലിനുശേഷം എല്ലാവരും പ്രതിമാസം വരുമാനം ആഗ്രഹിക്കുന്നവർക്ക് ഏറ്റവും അനുയോജ്യമായ നിക്ഷേപ പദ്ധതികൾ പോസ്റ്റ് ഓഫീസിന് കീഴിലുണ്ട്. അതിനൊന്നാണ് പോസ്റ്റ് ഓഫീസ് പ്രതിമാസ വരുമാന പദ്ധതി. നമുക്ക് വിശദമായി പരിശോധിക്കാം.

പ്രതിമാസ വരുമാന പദ്ധതി

പോസ്റ്റ് ഓഫീസിന്‍റെ പ്രതിമാസ വരുമാന പദ്ധതി സ്ഥിരമായ പ്രതിമാസ വരുമാനം വാഗ്ദാനം ചെയ്യുന്നു. പദ്ധതിയിൽ ഒരു നിശ്ചിത തുക നിക്ഷേപിക്കാനും എല്ലാ മാസവും സ്ഥിരമായ പലിശ നേടുന്നതിനും സാധിക്കും. സിംഗിൾ അക്കൗണ്ട്, ജോയിന്റ് അക്കൗണ്ട് എന്നിങ്ങനെ നിക്ഷേപം ആരംഭിക്കാം. സ്കീം 5 വർഷത്തിനുള്ളിൽ കാലാവധി പൂർത്തിയാകുകയും തുക തിരികെ നൽകുകയും ചെയ്യുന്നു.

പലിശ നിരക്ക്

വ്യക്തിഗതമായി 9 ലക്ഷം രൂപ വരെയോ സംയുക്തമായി 15 ലക്ഷം രൂപ വരെയോ നിക്ഷേപിക്കാം. ഉയർന്ന നിക്ഷേപങ്ങൾ മികച്ച പ്രതിമാസ വരുമാനം നൽകുന്നു. പദ്ധതിയിലെ ഏറ്റവും കുറവ് നിക്ഷേപത്തുക 1,000 രൂപയാണ്. പ്രതിമാസ വരുമാന പദ്ധതിയുടെ പലിശ നിരക്ക് വാർഷികമായി 7.4 ശതമാനമാണ്. അതായത് നിങ്ങൾ 15 ലക്ഷം രൂപ നിക്ഷേപിച്ചാൽ എല്ലാമാസവും ഏകദേശം 9,250 രൂപ വരുമാനം നേടാം. ഇത് ബാങ്കുകളുടെ സ്ഥിര നിക്ഷേപത്തേക്കാൾ ഉയർന്നതാണ്.

കൈമാറ്റം ചെയ്യാൻ സാധിക്കും

നിക്ഷേപകൻ ജോലിയുടെ ഭാഗമായോ മറ്റോ സ്ഥലം മാറുകയാണെങ്കിൽ ഇന്ത്യയിലുടനീളമുള്ള പോസ്റ്റ് ഓഫീസുകൾക്കിടയിൽ അക്കൗണ്ടുകൾ കൈമാറാൻ സാധിക്കും.

യോഗ്യതാ മാനദണ്ഡം

ഇന്ത്യയിൽ താമസിക്കുന്ന എല്ലാ പൗരന്മാർക്കും പദ്ധതിക്ക് വേണ്ടിയുള്ള യോഗ്യതയുണ്ട്. അതേസമയം, പ്രവാസികൾക്ക് പദ്ധതിയുടെ ഭാഗമാകുവാൻ സാധിക്കില്ല. പ്രായപൂർത്തിയായ ആർക്കും പോസ്റ്റ് ഓഫീസ് അക്കൗണ്ട് തുറക്കാം. 10 വയസ്സിന് താഴെയുള്ളവരാണെങ്കിൽ പ്രായപൂർത്തി ആയ ആർക്കും അവരുടെ പേരിൽ തുറക്കാൻ സാധിക്കും. ഇവർക്ക് 18 വയസ് തികയുമ്പോൾ ഫണ്ടുകൾ ആക്സസ് ചെയ്യാൻ സാധിക്കും. അതിന് അപേക്ഷകൾ നൽകേണ്ടതുണ്ട്.

സുരക്ഷിതം

ഇന്ത്യൻ സർക്കാരിന്‍റെ പിന്തുണയോടെ പ്രവർത്തിക്കുന്ന ഈ പദ്ധതി, സ്ഥിരമായ പ്രതിമാസ വരുമാനത്തോടെ സുരക്ഷിതമായ നിക്ഷേപങ്ങൾ ഉറപ്പാക്കുന്നു. വിരമിച്ചവർക്കും, വീട്ടമ്മമാർക്കും, സ്ഥിരവരുമാനം ആഗ്രഹിക്കുന്നവർക്കും അനുയോജ്യം.

അക്കൗണ്ട് എളുപ്പത്തിൽ തുറക്കാം

സൗകര്യത്തിനനുസരിച്ച് ഈ പോസ്റ്റ് ഓഫീസ് പദ്ധതിയിൽ നിന്ന് ത്രൈമാസികമായോ, അർദ്ധ വാർഷികമായോ, വാർഷികമായോ പലിശ സ്വീകരിക്കാം. അടുത്തുള്ള പോസ്റ്റ് ഓഫീസിൽ പോയി ആവശ്യമായ രേഖകൾ സഹിതം അപേക്ഷിക്കാം. അക്കൗണ്ട് തുറക്കുന്നതിനുള്ള ഫോം പോസ്റ്റ് ഓഫീസിൽ നിന്ന് എടുത്ത് KYC ഫോമും പാൻ കാർഡും സഹിതം സമർപ്പിക്കാം. അക്കൗണ്ട് തുറന്ന് കാലാവധി പൂർത്തിയാകുന്നതിന് മുൻപ് ക്ലോസ് ചെയ്യുമ്പോൾ പിഴ ഈടാക്കും.