1,000 രൂപ മുതൽ നിക്ഷേപിക്കാം, എല്ലാ മാസവും 9,000 രൂപ വെറുതേ കിട്ടും: ഈ പോസ്റ്റ് ഓഫീസ് സ്കീമിൽ നിക്ഷേപിക്കാം

പോസ്റ്റ് ഓഫീസ് സ്കീമുകൾ സാധാരണക്കാർക്ക് സുപരിചിതമാണ്. നിരവധി സ്കീമുകളാണ് പോസ്റ്റ് ഓഫീസ് വാ​ഗ്ദാനം ചെയ്യുന്നത്. സുരക്ഷിതമായി നിക്ഷേപിക്കാൻ ആ​ഗ്രഹിക്കുന്നവർക്ക് വിശ്വസനീയമായ ഒരു ഓപ്ഷനാണ് പോസ്റ്റ് ഓഫീസ് സ്കീമുകൾ. എല്ലാ സാമ്പത്തിക സ്ഥിതിയിലുള്ളവർക്കും പോസ്റ്റ് ഓഫീസ് സ്കീമുകൾ നേട്ടം നൽകുന്നു.

അത്തരത്തിൽ സ്ഥിരമായ വരുമാനം നൽകുന്ന ഒരു ജനപ്രിയ നിക്ഷേപ മാർ​ഗമാണ് പോസ്റ്റ് ഓഫീസ് പ്രതിമാസ വരുമാന പദ്ധതി (POMIS). ഈ സ്കീം ഉപയോഗിച്ച്, ഒറ്റത്തവണ നിക്ഷേപത്തിലൂടെ നിങ്ങൾക്ക് പ്രതിമാസം 9,000-ത്തിലധികം സമ്പാദിക്കാൻ കഴിയും. ഏതൊരു വ്യക്തിയും നിക്ഷേപത്തിലൂടെ സ്ഥിരമായ വരുമാനം ആ​ഗ്രഹിക്കും. ഈ പ്രതിമാസ വരുമാന പദ്ധതി നിങ്ങളുടെ ആ​ഗ്രഹത്തിന് അനുയോജ്യമായിരിക്കും.

പോസ്റ്റ് ഓഫീസ് പ്രതിമാസ വരുമാന പദ്ധതിയുടെ പ്രധാന സവിശേഷതകളും നേട്ടങ്ങളും

പോസ്റ്റ് ഓഫീസ് പ്രതിമാസ വരുമാന പദ്ധതി (POMIS) നിക്ഷേപകർക്ക് നിരവധി ഗുണങ്ങൾ വാഗ്ദാനം ചെയ്യുന്നു. ഓരോന്നും വിശദമായി അറിയാം;

കാലാവധി: ഈ പോസ്റ്റ് ഓഫീസ് പദ്ധതി 5 വർഷത്തെ കാലാവധിയിൽ പ്രവർത്തിക്കുന്നു. ഒറ്റത്തവണ നിക്ഷേപിക്കുന്നതിനാൽ അഞ്ച് വർഷത്തേക്ക് ആ നിക്ഷേപത്തിൽ നിന്നും നിങ്ങൾക്ക് പ്രതിമാസ വരുമാനം ലഭിക്കും.

പലിശ നിരക്ക് : നിലവിലെ കണക്കുകൾ പ്രകാരം ഈ പദ്ധതി പ്രതിവർഷം 7.4% പലിശ നിരക്ക് വാഗ്ദാനം ചെയ്യുന്നു. മറ്റു സ്കീമുകളെ താരതമ്യം ചെയ്യുമ്പോൾ ഈ പലിശ നിരക്ക് ഉയർന്നതാണ്.

നിക്ഷേപ തുക: ഈ സ്കീം പ്രകാരം നിങ്ങൾക്ക് നിക്ഷേപിക്കാവുന്ന ഏറ്റവും കുറഞ്ഞ തുക 1,000 രൂപയാണ്. സിം​ഗിൾ അക്കൗണ്ടിൽ പരമാവധി 9 ലക്ഷം വരെയും ജോയിന്റ് അക്കൗണ്ടിൽ 15 ലക്ഷം വരെയും നിക്ഷേപിക്കാൻ സാധിക്കും.

പ്രതിമാസം ലഭിക്കുന്ന വരുമാനം എത്രയാണ്?

സിം​ഗിൾ അക്കൗണ്ടിൽ 9 ലക്ഷം നിക്ഷേപിച്ചാൽ നിങ്ങൾക്ക് പ്രതിമാസം 5,550 രൂപ വരെ ഉറപ്പായും ലഭിക്കും. അതായത് പ്രതിവർഷം 66600 രൂപയാവും ലഭിക്കുന്നത്. എന്നാൽ ഇതൊരു ജോയിൻ്റ് അക്കൗണ്ട് ആണെങ്കിൽ 15 ലക്ഷം നിക്ഷേപിച്ചു കഴിഞ്ഞാൽ എല്ലാ മാസവും നിങ്ങൾക്ക് 9,250 ലഭിക്കും. പ്രതിവർഷം ലഭിക്കുന്ന പലിശ വരുമാനം 1,11,000 രൂപയായിരിക്കും. അതായത് നിക്ഷേപത്തിനു പുറമേ എല്ലാ മാസവും 9,000 രൂപക്ക് മുകളിൽ വെറുതേ കിട്ടും.

പോസ്റ്റ് ഓഫീസ് പ്രതിമാസ വരുമാന പദ്ധതിയിൽ അക്കൗണ്ട് തുറക്കുവാൻ ശ്രദ്ധിക്കേണ്ട കാര്യങ്ങൾ.....

ഈ സ്കീമിൽ സിം​ഗിൾ അക്കൗണ്ടോ ജോയിൻ്റ് അക്കൗണ്ടോ തുറക്കാൻ കഴിയും. മൂന്ന് പേർക്ക് വരെ ഒരു ജോയിൻ്റ് അക്കൗണ്ട് തുടങ്ങാം. നിക്ഷേപിച്ചു കഴിഞ്ഞു വരുമാനം ലഭിച്ചു തുടങ്ങിയാൽ സാമ്പത്തിക പ്രതിസന്ധികൾ വരുമ്പോൾ കാലാവധിക്കു മുന്നേ പണം പിൻവലിക്കാം. എന്നാൽ നിക്ഷേപം ആരംഭിച്ച് ഒരു വർഷത്തിന് ശേഷം മാത്രമേ പണം പിൻവലിക്കൽ സാധിക്കുകയുള്ളൂ.

വിപണിയിലെ മാറ്റങ്ങളിലും അപകട സാധ്യതയെയും പരി​ഗണിക്കാതെ സുരക്ഷിതമായി നിക്ഷേപിക്കാൻ ആഗ്രഹിക്കുന്നവർക്ക് പോസ്റ്റ് ഓഫീസ് പ്രതിമാസ വരുമാന പദ്ധതി ഒരു മികച്ച തിരഞ്ഞെടുപ്പാണ്. സ്ഥിരമായ വരുമാനവും ഉയർന്ന പലിശ നിരക്കുമാണ് ഇതിനുള്ള പ്രധാന കാരണങ്ങളിലൊന്ന്. മാത്രമല്ല മറ്റു നിക്ഷേപങ്ങളിൽ നിന്നും വ്യത്യസ്തമായി പോസ്റ്റ് ഓഫീസിൽ അക്കൗണ്ട് തുറക്കുന്നത് ഏറെ ലളിതമാണ്.

18 വയസ്സ് തികഞ്ഞ ഏതൊരു വ്യക്തിക്കും ഇവിടെ നിക്ഷേപിക്കാം. സാധാരണ ഒരു സേവിം​ഗ്സ് അക്കൗണ്ടിനേക്കാൾ ഉയർന്ന നേട്ടം പോസ്റ്റ് ഓഫീസ് പ്രതിമാസ വരുമാന പദ്ധതിയിലൂടെ ഉറപ്പായും ലഭിക്കും.

അറിയിപ്പ്:
മുകളില്‍ കൊടുത്തിരിക്കുന്ന ലേഖനം പഠനാവശ്യത്തിന് നൽകുന്നതാണ്. ഇതുമായി ബന്ധപ്പെട്ട് നിക്ഷേപ തീരുമാനങ്ങള്‍ എടുക്കും മുന്‍പ് സാമ്പത്തിക വിദഗ്ധന്റെ നിര്‍ദേശം തേടാം. ഓഹരി വിപണിയിലെ നിക്ഷേപം നഷ്ട സാധ്യതകള്‍ക്ക് വിധേയമാണ്. സ്വന്തം റിസ്‌കില്‍ മാത്രം നിക്ഷേപ തീരുമാനം കൈക്കൊള്ളുക. ലേഖനം വായിച്ചിട്ട് എടുക്കുന്ന തീരുമാനത്തിന്റെ അടിസ്ഥാനത്തില്‍ സംഭവിക്കുന്ന ലാഭനഷ്ടങ്ങള്‍ക്ക് ഗ്രേനിയം ഇന്‍ഫര്‍മേഷന്‍ ടെക്നോളജീസും ലേഖകനും ഉത്തരവാദികളല്ല.