5,000 രൂപയെ 8 ലക്ഷമാക്കുന്ന മാജിക്ക് എന്താണ്? പോസ്റ്റ് ഓഫീസിലെ ഈ സ്കീമിൽ നിക്ഷേപിക്കാം...

സമ്പാദ്യശീലം നിങ്ങളുടെ ഭാവി ജീവിതം സുരക്ഷിതമാക്കാൻ എളുപ്പത്തിൽ സഹായിക്കുന്നു. ചെറിയ തുകയോ വലിയ തുകയോ നിക്ഷേപിച്ച് വിവിധ ഇൻവെസ്റ്റ്മെന്റ് ആരംഭിക്കാവുന്നതാണ്. എന്നാൽ നിക്ഷേപിക്കുമ്പോൾ ഒരു സുരക്ഷിതമായ സ്കീം ആ​ഗ്രഹിക്കുന്നവർക്ക് രണ്ടാമതൊന്ന് ചിന്തിക്കാതെ സമീപിക്കാൻ സാധിക്കുന്നത് പോസ്റ്റ് ഓഫീസ് പദ്ധതികളാണ്. ഇവിടെ ഒട്ടനവധി ചെറുകിട സമ്പാദ്യ പദ്ധതികളുണ്ട്. നിങ്ങൾക്ക് മികച്ച റിട്ടേണോടെ സമ്പാ​ദിക്കാൻ പ്ലാനുണ്ടെങ്കിൽ പോസ്റ്റ് ഓഫീസ് ആർ.ഡിയിൽ നിക്ഷേപിക്കാവുന്നതാണ്.

പോസ്റ്റ് ഓഫീസ് ആർ.ഡി അഥവാ റിക്കറിം​ഗ് ഡെപ്പോസിറ്റ് ഒരു ജനപ്രിയ പദ്ധതിയാണ്. നിങ്ങൾക്ക് എല്ലാ മാസവും ഒരു നിശ്ചിത തുക ഈ അക്കൗണ്ടിലേക്ക് നിക്ഷേപിക്കാം. കാലാവധി പൂർത്തിയാവുമ്പോൾ ലക്ഷങ്ങൾ സമ്പാദിക്കാൻ സാധിക്കും എന്നതാണ് ഇതിന്റെ പ്രത്യേകത. നിങ്ങൾക്ക് ഇഷ്ടമുള്ള ഒരു നിശ്ചിത തുക എല്ലാ മാസവും നിക്ഷേപിക്കാം. എന്തെങ്കിലും പ്രത്യേകം നേട്ടം പ്രതീക്ഷിക്കുന്നവർക്കും ഈ സ്കീം മികച്ച റിസൾട്ട് തരുന്നു.

പോസ്റ്റ് ഓഫീസ് ആർ.ഡി

5 വർഷത്തെ കാലാവധിയിലേക്ക് പോസ്റ്റ് ഓഫീസ് ആർ.ഡിയിൽ നിക്ഷേപിക്കുന്നത്. നിങ്ങൾക്ക് താത്പര്യമുണ്ടെങ്കിൽ ആ കാലാവധി 10 വർഷത്തേക്ക് നീട്ടുവാനും സാധിക്കും. നിങ്ങൾക്ക് പോസ്റ്റ് ഓഫീസ് ആർ.ഡിയിൽ അക്കൗണ്ട് ഇല്ല എങ്കിൽ തൊട്ടടുത്ത പോസ്റ്റ് ഓഫീസിൽ നേരിട്ടെത്തി ഈ സ്കീമിൽ നിക്ഷേപിക്കാവുന്നതാണ്. വെറും 100 രൂപ നൽകി ഒരു അക്കൗണ്ട് ആരംഭിക്കാൻ സാധിക്കും. എന്നാൽ പരമാവധി നിക്ഷേപത്തിന് പരിധിയില്ല.

ഈ സ്കീമിനും കീഴിൽ പ്രായപൂർത്തിയാകാത്തവരുടെ പേരിലും അക്കൗണ്ട് തുടങ്ങാം. എന്നാൽ അതിൽ മാതാപിതാക്കളും അവരുടെ പേര് രേഖയോടൊപ്പം നൽകേണ്ടതുണ്ട്.

പലിശ എത്രയാണ്?

പോസ്റ്റ് ഓഫീസ് ആർ.ഡിയുടെ നിലവിലെ പലിശ 6.7% എന്ന നിരക്കിലാണ് കണക്കാക്കുന്നത്. കഴിഞ്ഞ വർഷമാണ് 6.5% നിരക്കിൽ നിന്ന് 6.7% നിരക്കിലേക്ക് പോസ്റ്റ് ഓഫീസ് ആർ.ഡി പലിശ ഉയർത്തിയത്.

കാലാവധി പൂർത്തിയാവുമ്പോൾ ലക്ഷങ്ങൾ സമ്പാദിക്കുന്നത് എങ്ങനെ?

പോസ്റ്റ് ഓഫീസ് ആർ.ഡിയുടെ കാലാവധി 5 വർഷമാണ്. ഈ കാലാവധിയിലേക്ക് നിങ്ങൾ എല്ലാ മാസവും 5,000 രൂപ നിക്ഷേപിച്ചാൽ അഞ്ച് വർഷം കൊണ്ട് നിങ്ങളുടെ മൊത്തം നിക്ഷേപം 3 ലക്ഷം രൂപയായിരിക്കും. അതിൽ പലിശയായി കണക്കാക്കുന്നത് 56,830 രൂപയാണ്. എങ്കിൽ കാലാവധി പൂർത്തിയാവുമ്പോൾ നിങ്ങളുടെ മൊത്തം തുക 3,56,830 രൂപയാകും.

ഇനി ഈ അക്കൗണ്ട് അഞ്ച് വർഷത്തേക്ക് കൂടി നീട്ടുകയാണെങ്കിൽ നിങ്ങൾക്ക് 10 വർഷത്തിനുള്ളിൽ വലിയ നേട്ടം കിട്ടും. അതായത് നിക്ഷേപ തുക മാത്രം 6,00,000 രൂപയാകും. ഇവിടെ 6.7% നിരക്കിൽ പലിശ മാത്രം 2,54,272 രൂപ ലഭിക്കും. അതായത് 10 വർഷത്തെ കാലാവധി പൂർത്തിയാവുമ്പോൾ നിങ്ങളുടെ മൊത്തം തുക 8,54,272 രൂപയാകും. വെറും 5000 രൂപയ്ക്ക് അക്കൗണ്ട് ആരംഭിച്ച് 8 ലക്ഷത്തിലധികം ഉറപ്പാക്കാം.

കാലാവധിയ്ക്ക് മുന്നേ അക്കൗണ്ട് ക്ലോസ് ചെയ്യാൻ സാധിക്കുമോ?

നിങ്ങൾക്ക് എന്തെങ്കിലും കാരണത്താൽ നിക്ഷേപം മുന്നോട്ട് കൊണ്ടു പോവാൻ സാധിക്കുന്നില്ല എങ്കിൽ കാലാവധി പൂർത്തിയാകുന്നതിന് മുന്നെ ഈ അക്കൗണ്ട് ക്ലോസ് ചെയ്യാം. ഒപ്പം വായ്പാ സൗകര്യവും നൽകിയിട്ടുണ്ട്. എന്നാൽ നിങ്ങളുടെ നിക്ഷേപ തുകയുടെ 50 ശതമാനം വരെ മാത്രമേ വായ്പയായി എടുക്കാൻ കഴിയൂ. നിങ്ങൾക്ക് നിക്ഷേപത്തിലൂടെ ലഭിക്കുന്ന പലിശ നിരക്കിനേക്കാൾ 2 ശതമാനം കൂടുതൽ പലിശയാണ് വായ്പയിലൂടെ ഈടാക്കുന്നത്.