നിക്ഷേപത്തിന് മികച്ചത് ഈ പദ്ധതി തന്നെ, പലിശയും സുരക്ഷയും ഉറപ്പ്, 5000 രൂപ കൊണ്ട് 8.5 ലക്ഷം സമ്പാദിക്കാം

ഭാവി ജീവിതം സുഗമമാക്കുന്നതിനാണ് എല്ലാവരും സാമ്പത്തിക നിക്ഷേപം തിരഞ്ഞെടുക്കുന്നത്. എന്നാൽ അപകട സാധ്യത ഏറെയുള്ള ഓഹരി വിപണിയിലെ നിക്ഷേപത്തോട് പലർക്കും താൽപ്പര്യമില്ല. അവിടെയാണ് പോസ്റ്റ് ഓഫീസ് ആർ‌ഡി അഥവാ റിക്കറിംഗ് നിക്ഷേപ സ്കീം വരുന്നത്. പോസ്റ്റ് ഓഫീസ് ആർഡി ലളിതവും സുരക്ഷിതവും സ്ഥിരവും അച്ചടക്കമുള്ളതുമായ സമ്പാദ്യത്തിൽ വിശ്വസിക്കുന്നവർക്ക് അനുയോജ്യവുമാണ്. പദ്ധതിയുടെ കൂടുതൽ വിശദാംശങ്ങൾ നമുക്ക് നോക്കാം.

100 രൂപ ഉപയോഗിച്ച് അക്കൗണ്ട് തുറക്കാം

അടുത്തുള്ള ഏതെങ്കിലും പോസ്റ്റ് ഓഫീസിൽ പോയി പോസ്റ്റ് ഓഫീസ് റിക്കറിംഗ് ഡെപ്പോസിറ്റ് സ്കീമിൽ അക്കൗണ്ട് തുറക്കാം. 100 രൂപ മുതൽ ഇതിൽ നിക്ഷേപം ആരംഭിക്കാം. പരമാവധി നിക്ഷേപത്തിന് പരിധി നിശ്ചയിച്ചിട്ടില്ല. ഈ പദ്ധതിയുടെ കാലാവധി അഞ്ച് വർഷമാണ്. ആവശ്യമെങ്കിൽ 5 വർഷത്തേക്ക് കൂടി നിക്ഷേപ കാലാവധി വർദ്ധിപ്പിക്കാം. പോസ്റ്റ് ഓഫീസ് ആർഡിയിൽ പ്രായപൂർത്തിയാകാത്ത ഒരാളുടെ പേരിലും അക്കൗണ്ട് തുറക്കാം. എന്നിരുന്നാലും, ഇതിൽ, മാതാപിതാക്കൾ രേഖയോടൊപ്പം അവരുടെ പേരും നൽകേണ്ടതുണ്ട്. നിങ്ങളുടെ അക്കൗണ്ട് നീട്ടുന്ന സമയത്തും അക്കൗണ്ട് തുറന്ന സമയത്തെ പലിശ നിങ്ങൾക്ക് ലഭിക്കും. അതിനു ശേഷം എപ്പോൾ വേണമെങ്കിലും നിങ്ങൾക്ക് നിങ്ങളുടെ അക്കൗണ്ട് ക്ലോസ് ചെയ്യാവുന്നതാണ്.

നിലവില്‍ നിക്ഷേപകര്‍ക്ക് 6.7 ശതമാനം വരെ പലിശയും പോസ്റ്റ് ഓഫീസ് ആര്‍ഡി നിക്ഷേപം വാഗ്ദാനം ചെയ്യുന്നുണ്ട്. ഇതു പല ബാങ്കുകളുടെയും സ്ഥിര നിക്ഷേപങ്ങളേക്കാള്‍ മികച്ച പലിശയാണ്. പദ്ധതിയുടെ മറ്റൊരു പ്രത്യേകത നിക്ഷേപത്തിന്‍റെ സുരക്ഷയാണ്. കേന്ദ്രസർക്കാർ പരിരക്ഷയുള്ളത് കൊണ്ടുതന്നെ നിക്ഷേപിക്കുന്ന തുക സുരക്ഷിതമായിരിക്കും. അതുമാത്രമല്ല പലിശയും ഉറപ്പാണ്.

8 ലക്ഷം രൂപ സമ്പാദിക്കാം

പോസ്റ്റ് ഓഫീസ് ആർ‌ഡിയിലെ നിക്ഷേപവും പലിശയും കണക്കാക്കിയാൽ, നിങ്ങൾ ഈ സ്കീമിൽ എല്ലാ മാസവും 5,000 രൂപ നിക്ഷേപിക്കുകയാണെങ്കിൽ, അതിന്റെ കാലാവധി പൂർത്തിയാകുമ്പോൾ, അതായത് അഞ്ച് വർഷത്തിൽ, നിങ്ങൾ ആകെ 3 ലക്ഷം രൂപ നിക്ഷേപിക്കുകയും 6.7 ശതമാനം നിരക്കിൽ പലിശ നിരക്കിൽ 56,830 രൂപ ചേർക്കുകയും ചെയ്യും. ഇതിനുശേഷം, നിങ്ങളുടെ മൊത്തം ഫണ്ട് 3,56,830 രൂപയാകും. ഇനി നിങ്ങൾ ഈ അക്കൗണ്ട് മറ്റൊരു അഞ്ച് വർഷത്തേക്ക് കൂടി നീട്ടിയാൽ, 10 വർഷത്തിനുള്ളിൽ നിങ്ങൾ നിക്ഷേപിക്കുന്ന തുക 6,00,000 രൂപയാകും. ഇതോടൊപ്പം, 6.7 ശതമാനം നിരക്കിൽ ഈ നിക്ഷേപത്തിന് ലഭിക്കുന്ന പലിശ തുക 2,54,272 രൂപയാകും. ഈ രീതിയിൽ, 10 വർഷത്തിനുള്ളിൽ നിങ്ങളുടെ മൊത്തം ഫണ്ട് 8,54,272 രൂപയാകും.

ആവശ്യമെങ്കിൽ വായ്പയും ലഭിക്കും

അത്യാവശ്യമെങ്കില്‍ മൂന്നു വര്‍ഷത്തിനു ശേഷം അക്കൗണ്ട് ക്ലോസ് ചെയ്യാം. ഈ സാഹചര്യത്തില്‍ പോസ്റ്റ് ഓഫീസ് സേവിംഗ് അക്കൗണ്ടിന്‍റെ പലിശ കിട്ടും. നിലവില്‍ ഇത് 4 ശതമാനം ആണ്. അതോടൊപ്പം നിങ്ങൾ നിക്ഷേപം ആരംഭിച്ച് ഒരു വർഷത്തിന് ശേഷം നിക്ഷേപിച്ച തുകയുടെ 50 ശതമാനം വായ്പയായി എടുക്കാനും സാധിക്കും. വായ്പയുടെ പലിശ നിരക്ക് നിങ്ങൾക്ക് ലഭിക്കുന്ന പലിശ നിരക്കിനേക്കാൾ 2 ശതമാനം കൂടുതലാണ്. അതായത് 8.7 ശതമാനം.

ഓൺലൈൻ സേവനം

നിങ്ങൾ പോസ്റ്റ് ഓഫീസിൽ സേവിങ്സ് തുടങ്ങാൻ ആഗ്രഹിക്കുന്നുണ്ടെകിൽ കൂടുതൽ ഫലപ്രദമായ മാർഗമാണ് ഓൺലൈൻ നിക്ഷേപം. പോസ്റ്റ് ഓഫീസ് ആര്‍ ഡികളില്‍ ഇനി ഓണ്‍ലൈനായും നിക്ഷേപിക്കാം. ഇന്ത്യ പോസ്റ്റ് പേയ്‌മെന്‍റ് (ഐപിപിബി) ആപ്പ് വഴിയാണ് ഈ സേവനം ലഭ്യമാകുക. ഈ ആപ്പു വഴി ആര്‍ഡിയിലേയ്ക്കുള്ള പ്രതിമാസ നിക്ഷേപതുക നിങ്ങൾക്ക് കൈമാറാം.

അറിയിപ്പ്: മുകളില്‍ കൊടുത്തിരിക്കുന്ന ലേഖനം പഠനാവശ്യത്തിന് നൽകുന്നതാണ്. ഇതുമായി ബന്ധപ്പെട്ട് തീരുമാനങ്ങള്‍ എടുക്കും മുന്‍പ് സാമ്പത്തിക വിദഗ്ധന്റെ നിര്‍ദേശം തേടാം. സ്വന്തം റിസ്‌കില്‍ മാത്രം വായ്പ തീരുമാനം കൈക്കൊള്ളുക. ലേഖനം വായിച്ചിട്ട് എടുക്കുന്ന തീരുമാനത്തിന്റെ അടിസ്ഥാനത്തില്‍ സംഭവിക്കുന്ന ലാഭനഷ്ടങ്ങള്‍ക്ക് ഗ്രേനിയം ഇന്‍ഫര്‍മേഷന്‍ ടെക്നോളജീസും ലേഖകനും ഉത്തരവാദികളല്ല.