333 രൂപ ലാഭിച്ചാൽ കിട്ടുന്നത് 7 ലക്ഷത്തിലധികം രൂപ: ഈ പോസ്റ്റ് ഓഫീസ് പദ്ധതി ഉയർന്ന പലിശയും നൽകുന്നു

സാമ്പത്തിക സുരക്ഷയോടെ ജീവിതം മുന്നോട്ട് കൊണ്ടു പോകാനാണ് എല്ലാവർക്കും ആ​ഗ്രഹം. അതിന് മികച്ച നിക്ഷേപം തന്നെ തിരഞ്ഞെടുക്കുകയും വേണം. നിലവിൽ സുരക്ഷിതമായി നിക്ഷേപിക്കാൻ സാധിക്കുന്നത് പോസ്റ്റ് ഓഫീസ് പദ്ധതികളിലൂടെയാണ്. എല്ലാ മാസവും നിശ്ചിത തുക നിക്ഷേപിച്ചു കൊണ്ട് വലിയ തുക സമ്പാദിക്കാൻ പോസ്റ്റ് ഓഫീസിൻ്റെ റിക്കറിം​ഗ് ഡെപ്പോസിറ്റ് അഥവാ ആർഡി ഒരു മികച്ച തിരഞ്ഞെടുപ്പാണ്.

എന്താണ് ആർഡി?

ഇത് ഒരു തരം സേവിംഗ്സ് സ്കീമാണ്. അവിടെ ഒരു നിശ്ചിത തുക എല്ലാ മാസവും ഒരു ബാങ്കിലോ പോസ്റ്റ് ഓഫീസിലോ നിക്ഷേപിക്കുന്നു. ദീർഘകാലത്തേക്ക് തുടർച്ചയായി നിക്ഷേപിച്ചാൽ ഈ തുക പലിശയ്‌ക്കൊപ്പം വളരുന്നു. കാലാവധി പൂർത്തിയാകുമ്പോൾ ഒരു വലിയ തുക സ്വന്തമാക്കാനും സാധിക്കുന്നു. സാധാരണക്കാർക്ക് പോലും നിക്ഷേപിക്കാൻ ഉചിതമായ നിക്ഷേപ മാർ​ഗമാണിത്.

പോസ്റ്റ് ഓഫീസ് ആർ‌ഡി സ്കീമിൽ തുടക്കത്തിൽ അഞ്ച് വർഷത്തേക്ക് മാത്രമേ നിക്ഷേപിക്കാൻ സാധിക്കൂ. എന്നാൽ ആവശ്യമെങ്കിൽ അടുത്ത അഞ്ച് വർഷത്തേക്ക് കൂടി കാലാവധി നീട്ടാൻ കഴിയും. വലിയ സാമ്പത്തിക ലക്ഷ്യമുള്ളവർ ദീർഘകാലത്തേക്ക് നിക്ഷേപിക്കുന്നതാണ് നല്ലത്. നിങ്ങളുടെ ആധാർ, പാൻ കാർഡ്, ഒരു പാസ്‌പോർട്ട് സൈസ് ഫോട്ടോ എന്നിവ ആർഡി അക്കൗണ്ട് തുറക്കുമ്പോൾ സമർപ്പിക്കണം. എല്ലാ മാസവും നിക്ഷേപങ്ങൾ മുടങ്ങാതെ നടത്തണം. തവണകൾ നഷ്ടപ്പെട്ടാൽ പിഴ അടക്കേണ്ടി വരും. ആർഡി സ്കീം ഓൺലൈൻ വഴിയും ലഭ്യമാണ്. അതിനാൽ നിക്ഷേപങ്ങൾ കൂടുതൽ എളുപ്പമാവും.

ആർഡിയിൽ എത്ര രൂപ വരെ നിക്ഷേപിക്കാം?

ആർഡിയിൽ നിങ്ങൾക്ക് വെറും 100 രൂപ മുതൽ നിക്ഷേപം തുടങ്ങാം. എന്നാൽ പരമാവധി നിക്ഷേപത്തിന് പരിധിയില്ല. ഒരു മാസം 100 രൂപ എന്നത് വളരെ ചെറിയ തുകയാണ്. ദിവസവും 100 രൂപ മാറ്റി വെച്ച് ആർഡിയിൽ നിക്ഷേപിക്കുന്നവരും ഉണ്ട്.

ആർഡി പലിശ നിരക്ക്

2025 ജൂലൈ മുതൽ സെപ്റ്റംബർ വരെയുള്ള പാദത്തിൽ, പോസ്റ്റ് ഓഫീസ് ആർ‌ഡിയുടെ പലിശ നിരക്ക് പ്രതിവർഷം 6.7% എന്ന നിരക്കിലാണ്. അതായത് ഈ പാദത്തിൽ പലിശ നിരക്ക് പരിഷ്കരിച്ചിട്ടില്ല. സാധാരണയായി ഓരോ പാദത്തിലും നിക്ഷേപങ്ങളുടെ പലിശ നിരക്കുകൾ പരിഷ്കരിക്കുന്നുണ്ട്.

ആർഡിയിൽ നിന്നും വായ്പ ലഭിക്കും

ആർ‌ഡി സ്കീമിൽ ഒരു വർഷം പൂർത്തിയാക്കിയ ശേഷം, നിക്ഷേപകർക്ക് അവരുടെ മൊത്തം നിക്ഷേപ തുകയുടെ 50% വരെ വായ്പ എടുക്കാനുള്ള ഓപ്ഷനുണ്ട്. പെട്ടെന്നുള്ള സാമ്പത്തിക ആവശ്യങ്ങൾ പൂർത്തീകരിക്കാൻ ഇതിലൂടെ സാധിക്കുമെങ്കിലും ഈ വായ്പയുടെ പലിശ നിരക്ക് ആർ‌ഡി പലിശ നിരക്കിനേക്കാൾ 2% കൂടുതലാണ്.

പ്രതിമാസം 10,000 രൂപ നിക്ഷേപിച്ചാൽ

ഈ പോസ്റ്റ് ഓഫീസ് ആർഡിയിൽ നിങ്ങൾ അഞ്ച് വർഷത്തേക്ക് പ്രതിമാസം 10,000 രൂപ നിക്ഷേപിച്ചാൽ നിലവിലെ പലിശയും കണക്കാക്കുമ്പോൾ കാലാവധി അവസാനിക്കുമ്പോൾ ലഭിക്കുന്ന തുക 7,13,659 രൂപയായിരിക്കും. ഇതിൽ നിങ്ങളുടെ മൊത്തം നിക്ഷേപ തുക 6 ലക്ഷം രൂപയാണ്. എന്നാൽ പലിശ മാത്രം ലഭിച്ചത് 1,13,659 രൂപയും. ഒറ്റയടിക്ക് 10,000 കൊടുക്കാൻ സാധിക്കുന്നില്ലെങ്കിൽ ദിവസവും 333 രൂപ ലാഭിച്ചാൽ മതി.

അറിയിപ്പ്:
മുകളില്‍ കൊടുത്തിരിക്കുന്ന ലേഖനം പഠനാവശ്യത്തിന് നൽകുന്നതാണ്. ഇതുമായി ബന്ധപ്പെട്ട് നിക്ഷേപ തീരുമാനങ്ങള്‍ എടുക്കും മുന്‍പ് സാമ്പത്തിക വിദഗ്ധന്റെ നിര്‍ദേശം തേടാം. ഓഹരി വിപണിയിലെ നിക്ഷേപം നഷ്ട സാധ്യതകള്‍ക്ക് വിധേയമാണ്. സ്വന്തം റിസ്‌കില്‍ മാത്രം നിക്ഷേപ തീരുമാനം കൈക്കൊള്ളുക. ലേഖനം വായിച്ചിട്ട് എടുക്കുന്ന തീരുമാനത്തിന്റെ അടിസ്ഥാനത്തില്‍ സംഭവിക്കുന്ന ലാഭനഷ്ടങ്ങള്‍ക്ക് ഗുഡ്റിട്ടേൺസ് മലയാളവും ലേഖകനും ഉത്തരവാദികളല്ല.