ബാങ്ക് എഫ്.ഡിയെ മറന്നേക്കൂ, നിക്ഷേപത്തിന് നേടാം റെക്കോർഡ് പലിശ, ഒപ്പം സർക്കാർ സുരക്ഷയും

കഴിഞ്ഞ ആറ് മാസത്തിനിടെ രാജ്യത്തെ ബാങ്കുകൾ സ്ഥിര നിക്ഷേപത്തിന്‍റെ പലിശ നിരക്കുകൾ കുറച്ചിരുന്നു. റിസർവ് ബാങ്ക് ഓഫ് ഇന്ത്യ (ആർ‌ബി‌ഐ) പലിശ നിരക്കുകളിൽ മാറ്റം വരുത്തിയതിന് പിന്നാലെയാണ് ബാങ്കുകളുടെ നടപടി. ഫെബ്രുവരി മുതൽ, ആർ‌ബി‌ഐയുടെ റിപ്പോ നിരക്കിൽ 100 ​​ബേസിസ് പോയിൻറുകൾ (ബി‌പി‌എസ്) കുറച്ചതിനെത്തുടർന്ന് എസ്‌ബി‌ഐ, എച്ച്‌ഡി‌എഫ്‌സി, ഐ‌സി‌ഐ‌സി‌ഐ, പി‌എൻ‌ബി തുടങ്ങിയ മുൻനിര ബാങ്കുകൾ അവരുടെ എഫ്‌ഡി പലിശ നിരക്കുകൾ പരിഷ്കരിച്ചു. ഈ സാഹചര്യത്തിൽ, മികച്ച വരുമാനം വാഗ്ദാനം ചെയ്യുന്ന പോസ്റ്റ് ഓഫീസ് സേവിംഗ്സ് സ്കീമുകൾക്ക് കൂടുതൽ പ്രചാരം ലഭിച്ചു. പ്രത്യേകിച്ച് സുരക്ഷിതമായ നിക്ഷേപം തേടുന്ന മുതിർന്ന പൗരന്മാർക്കിടയിൽ.

2025-26 സാമ്പത്തിക വർഷത്തിലെ ജൂലൈ മുതൽ സെപ്റ്റംബർ വരെയുള്ള പാദത്തിലെ പബ്ലിക് പ്രൊവിഡന്റ് ഫണ്ട് (പിപിഎഫ്), നാഷണൽ സേവിംഗ്സ് സർട്ടിഫിക്കറ്റ് (എൻഎസ്‌സി), സീനിയർ സിറ്റിസൺ സേവിംഗ്സ് സ്കീം (എസ്‌സി‌എസ്‌എസ്) തുടങ്ങിയ ചെറുകിട സമ്പാദ്യ പദ്ധതികളുടെ നിരക്ക് സർക്കാർ മാറ്റമില്ലാതെ നിലനിർത്തിയിട്ടുണ്ട്. ഈ സാഹചര്യത്തിൽ നിക്ഷേപകർ എന്താണ് ചെയ്യേണ്ടത്.. ? ബാങ്ക് എഫ്ഡികളിൽ തുടരണോ അതോ പോസ്റ്റ് ഓഫീസ് ചെറുകിട സമ്പാദ്യ പദ്ധതിയിലേക്ക് മാറണോ..? നമുക്ക് നോക്കാം.

പോസ്റ്റ് ഓഫീസ് പദ്ധതികളുടെ പലിശ നിരക്ക്

പോസ്റ്റ് ഓഫീസ് ടൈം ഡെപ്പോസിറ്റ്: 5 വർഷത്തെ കാലാവധിയിൽ പ്രതിവർഷം 7.5% പലിശ ലഭിക്കും. 1 വർഷത്തെ നിക്ഷേപത്തിന് 6.9 ശതമാനവും 2 വർഷത്തെ നിക്ഷേപത്തിന് 7 ശതമാനവും പലിശ നേടാം. നിക്ഷേപം 3 വർഷമാണെങ്കിൽ 7.1 ശതമാനമാണ് പലിശ.

നാഷണൽ സേവിംഗ്സ് സർട്ടിഫിക്കറ്റ് (NSC): 5 വർഷത്തെ ലോക്ക്-ഇൻ കാലയളവിൽ വാർഷികമായി 7.7 ശതമാനം പലിശ നേടാം.

സീനിയർ സിറ്റിസൺ സേവിംഗ്സ് സ്കീം (SCSS): നിലവിൽ 8.2% പലിശ നൽകുന്നു. ഇത് വിരമിച്ചവർക്ക് ഏറ്റവും ആകർഷകമായ ഓപ്ഷനുകളിൽ ഒന്നാക്കി മാറ്റുന്നു.

ബാങ്കുകൾ നൽകുന്ന പലിശ

എസ്‌ബി‌ഐ: സാധാരണ ഉപഭോക്താക്കൾക്ക് 6.3%, മുതിർന്ന പൗരന്മാർക്ക് 6.8%.

എച്ച്ഡിഎഫ്‌സി ബാങ്ക്: സാധാരണ ഉപഭോക്താക്കൾക്ക് 6.4%, മുതിർന്ന പൗരന്മാർക്ക് 6.9%.

ഐസിഐസിഐ ബാങ്ക്: സാധാരണ ഉപഭോക്താക്കൾക്ക് 6.6%, മുതിർന്ന പൗരന്മാർക്ക് 7.1%

പിഎൻബി: സാധാരണ ഉപഭോക്താക്കൾക്ക് 6.5%, മുതിർന്ന പൗരന്മാർക്ക് 7%

മികച്ച പലിശ പോസ്റ്റ് ഓഫീസിൽ

ബാങ്ക് സ്ഥിര നിക്ഷേപത്തേക്കാൾ മികച്ച പലിശ നൽകുന്നത് പോസ്റ്റ് ഓഫീസ് പദ്ധതികളാണ്. മുതിർന്ന പൗരന്മാർക്ക് സീനിയർ സിറ്റിസൺ സേവിംഗ്സ് സ്കീം റെക്കോർഡ് പലിശയാണ് വാഗ്ധാനം ചെയ്യുന്നത്. ചെറുകിട സമ്പാദ്യ പദ്ധതികൾ ഏറ്റവും സുരക്ഷിതമായവയാണ്. കാരണം അവയ്ക്ക് കേന്ദ്രസർക്കാറിന്‍റെ പൂർണ്ണ പിന്തുണയുണ്ട്, മുതലും പലിശയും ഗ്യാരണ്ടിയാണ്.

ബാങ്ക് സ്ഥിര നിക്ഷേപവും അപകട രഹിതമാണ്. കാരണം ബാങ്കുകളിലെ നിക്ഷേപങ്ങൾ ഡെപ്പോസിറ്റ് ഇൻഷുറൻസ് ആൻഡ് ക്രെഡിറ്റ് ഗ്യാരണ്ടി കോർപ്പറേഷൻ (DICGC) ഇൻഷ്വർ ചെയ്തിട്ടുണ്ട്. എന്നാൽ ഓരോ ബാങ്കിലും ഒരു നിക്ഷേപകന് 5 ലക്ഷം വരെ മാത്രമേ (പലിശ ഉൾപ്പെടെ) ലഭിക്കൂ. എഫ്ഡി നിരക്കുകൾ കുറയുന്ന സാഹചര്യത്തിൽ, യാഥാസ്ഥിതിക നിക്ഷേപകർക്ക്, പ്രത്യേകിച്ച് മുതിർന്ന പൗരന്മാർക്ക്, പോസ്റ്റ് ഓഫീസ് സേവിംഗ് ഓപ്ഷനുകൾ തീർച്ചയായും മികച്ചതും സുരക്ഷിതവുമായ നിക്ഷേപ തിരഞ്ഞെടുപ്പാണ്.