കയ്യിൽ 5 ലക്ഷം രൂപയുണ്ടോ, 2 ലക്ഷം രൂപ പലിശയായി മാത്രം ലഭിക്കും, ഇതാണ് പോസ്റ്റ് ഓഫീസ് നിക്ഷേപ പദ്ധതി

ഭാവി ജീവിതത്തിലെ സാമ്പത്തിക ഭദ്രത മുന്നിൽ കണ്ടാണ് എല്ലാവരും നിക്ഷേപം നടത്തുന്നത്. ബാങ്ക് സ്ഥിര നിക്ഷേപം, മ്യൂച്വൽ ഫണ്ട്, കേന്ദ്രസർക്കാർ ചെറുകിട നിക്ഷേപങ്ങൾ തുടങ്ങി നിരവധി നിക്ഷേപ പദ്ധതികൾ നമുക്ക് ചുറ്റുമുണ്ട്. എന്നാൽ പോസ്റ്റ് ഓഫീസ് നിക്ഷേപം ഒരു പടി മുന്നിലാണ്. സുരക്ഷ, മികച്ച പലിശ എന്നതാണ് പോസ്റ്റ് ഓഫീസ് സാമ്പത്തിക നിക്ഷേപ പദ്ധതികളുടെ ഏറ്റവും പ്രധാനപ്പെട്ട നേട്ടങ്ങൾ.

ബാങ്ക് എഫ്ഡിക്കൊപ്പം പോസ്റ്റ് ഓഫീസ് ടൈം ഡെപ്പോസിറ്റ് സ്കീമും നിക്ഷേപത്തിന് വളരെ ജനപ്രിയമാണ്. പോസ്റ്റ് ഓഫീസ് സേവിംഗ് സ്കീമിൽ നിക്ഷേപിക്കുന്നതിലൂടെ, സമ്പാദ്യത്തോടൊപ്പം ഉയർന്ന വരുമാനവും നിങ്ങൾക്ക് ലഭിക്കും. അതുകൊണ്ടുതന്നെ പോസ്റ്റ് ഓഫീസ് ടൈം ഡെപ്പോസിറ്റ് സ്കീമിന്‍റെ കൂടുതൽ വിശദാംശങ്ങൾ നമുക്ക് നോക്കാം.

പോസ്റ്റ് ഓഫീസ് ടൈം ഡെപ്പോസിറ്റ് സ്കീം

1,000 രൂപ മാത്രമാണ് നിക്ഷേപം ആരംഭിക്കാന്‍ ആവശ്യമായ തുക. 10 വയസിന് മുകളില്‍ പ്രായമുള്ളവര്‍ക്ക് സ്വന്തം പേരിലും മറ്റുള്ളവര്‍ക്കായി രക്ഷിതാക്കള്‍ക്കും അക്കൗണ്ട് ആരംഭിക്കാവുന്നതാണ്. ഒരാള്‍ക്ക് ഒന്നില്‍ കൂടുതല്‍ പോസ്റ്റ് ഓഫീസ് ടൈം ഡെപ്പോസിറ്റ് അക്കൗണ്ട് ആരംഭിക്കാനാകും.

പലിശ നിരക്ക്

1, 2, 3, 5 വര്‍ഷത്തേക്കായാണ് പോസ്റ്റ് ഓഫീസ് ടൈം ഡെപ്പോസിറ്റ് സ്വീകരിക്കുന്നത്. ഒരു വർഷത്തേക്ക് പോസ്റ്റ് ഓഫീസ് ടൈം ഡെപ്പോസിറ്റിൽ പണം നിക്ഷേപിച്ചാൽ 6.9 ശതമാനം പലിശ ലഭിക്കും. രണ്ട് വർഷത്തേക്ക് നിക്ഷേപിച്ചാൽ ഏഴ് ശതമാനം പലിശ ലഭിക്കും. മൂന്ന് വർഷത്തേക്ക് പണം നിക്ഷേപിക്കുമ്പോൾ, നിക്ഷേപകന് 7.1 ശതമാനം പലിശയും അഞ്ച് വർഷത്തെ ടൈം ഡെപ്പോസിറ്റിന് 7.5 ശതമാനം പലിശയും നൽകും. 5 വർഷത്തെ കാലാവധിയുള്ള നിക്ഷേപം വീണ്ടും അഞ്ച് വർഷത്തേക്ക് കൂടി നീട്ടാനും സാധിക്കും.

പലിശയിനത്തിൽ ലക്ഷങ്ങൾ സമ്പാദിക്കും

പോസ്റ്റ് ഓഫീസ് ടൈം ഡെപ്പോസിറ്റിൻ്റെ പലിശ നിരക്ക് കണക്കാക്കിയാൽ ലക്ഷക്കണക്കിന് രൂപ വരെ പലിശ ലഭിക്കും. ഇങ്ങിനെ മനസ്സിലാക്കുക, അഞ്ച് ലക്ഷം രൂപ അഞ്ച് വർഷത്തേക്ക് നിക്ഷേപിച്ചാൽ കാലാവധി പൂർത്തിയാകുമ്പോൾ ആകെ 7,24,974 രൂപ ലഭിക്കും. ഇതിൽ 2,24,974 രൂപ പലിശയായിരിക്കും.

നികുതി ഇളവ്

നികുതി ആനുകൂല്യങ്ങൾ 1961ലെ ആദായനികുതി നിയമത്തിലെ സെക്ഷൻ 80C പ്രകാരം പോസ്റ്റ് ഓഫീസിൽ 5 വർഷത്തെ കാലാവധിയുള്ള ടൈം ഡെപ്പോസിറ്റ് അക്കൗണ്ടിൽ നിക്ഷേപിച്ച തുകയ്ക്കും നികുതി ഇളവിൻ്റെ ആനുകൂല്യം ലഭിക്കും. 5 വർഷത്തിൽ താഴെ കാലാവധിയുള്ള നിക്ഷേപങ്ങൾക്ക് നികുതി ആനുകൂല്യങ്ങൾ ലഭ്യമല്ല. ഡെപ്പോസിറ്റ് കാലാവധി പൂർത്തിയാകുന്നതിന് മുമ്പുതന്നെ പണം പിൻവലിക്കാം, എന്നാൽ പിഴ ഈടാക്കും.

ഉയർന്ന പലിശ ലഭിക്കുന്ന 2 പോസ്റ്റ് ഓഫീസ് പദ്ധതികൾ

1. സീനിയർ സിറ്റിസൺ സേവിംഗ്സ് സ്കീം

മുതിർന്ന പൗരന്മാർക്ക് വിരമിക്കൽ ജീവിതം ആസ്വദിക്കാൻ അവസരമൊരുക്കുന്ന പദ്ധതിയാണ് സീനിയർ സിറ്റിസൺ സേവിംഗ്സ് സ്കീം. പരമാവധി നിക്ഷേപം 30 ലക്ഷം രൂപയാണ്. 8.2 ശതമാനമാണ് നിലവിൽ സീനിയർ സിറ്റിസൺ സേവിംഗ്സ് സ്കീമിന്റെ പലിശ നിരക്ക്. ആദായ നികുതി വകുപ്പിന്റെ സെക്ഷൻ 80 സി പ്രകാരം 1.5 ലക്ഷം രൂപ വരെ നികുതി ഇളവും സീനിയർ സിറ്റിസൺ സേവിംഗ്സ് സ്കീമിൽ നിക്ഷേപകർക്ക് ലഭിക്കുന്നു.

2. കിസാൻ വികാസ് പത്ര

18 വയസ്സിന് മുകളിലുള്ള ആർക്കും ഈ സർക്കാർ പിന്തുണയുള്ള സ്കീം വ്യക്തിഗതമായോ സംയുക്തമായോ തുറക്കാം. ഏറ്റവും കുറഞ്ഞ നിക്ഷേപം 1,000 രൂപയാണ്, ഉയർന്ന പരിധിയില്ല. ഇത് 30 മാസ കാലാവധിയുള്ള ഒരു ഹ്രസ്വകാല നിക്ഷേപ പദ്ധതിയാണ്, കൂടാതെ 7.5 ശതമാനം പലിശയും വാഗ്ദാനം ചെയ്യുന്നു.