5 വർഷം 9,000 രൂപയ്ക്ക് മുകളിൽ പ്രതിമാസ വരുമാനം ഉറപ്പ്; ഈ പോസ്റ്റ് ഓഫീസ് സ്കീമിൽ നിക്ഷേപിക്കാൻ മടിക്കേണ്ട...

സുരക്ഷിതമായ നിക്ഷേപത്തിലൂടെ സ്ഥിരവരുമാനം ആഗ്രഹിക്കുന്നവർക്ക് കൈത്താങ്ങാണ് പോസ്റ്റ് ഓഫീസിന്റെ പ്രതിമാസ വരുമാന പദ്ധതി. കേന്ദ്ര സർക്കാർ നേരിട്ട് നടത്തുന്ന ഈ പദ്ധതിയിൽ ഒരിക്കൽ നിക്ഷേപം നടത്തിയാൽ അടുത്ത അഞ്ച് വർഷത്തേക്ക് എല്ലാ മാസവും കൃത്യമായ തുക വരുമാനമായി ലഭിക്കും. കേന്ദ്ര സർക്കാരിന്റെ പിന്തുണയുള്ളതിനാൽ നിക്ഷേപത്തിന് പൂർണ സുരക്ഷയുണ്ട്.

നിലവിൽ 7.4 ശതമാനമാണ് ഈ പദ്ധതിക്ക് ലഭിക്കുന്ന വാർഷിക പലിശ നിരക്ക് (പലിശ നിരക്കുകൾ ഓരോ മൂന്ന് മാസം കൂടുമ്പോഴും സർക്കാർ പുനഃപരിശോധിക്കാറുണ്ട്). 5 വർഷമാണ് പദ്ധതിയുടെ കാലാവധി. ആവശ്യമെങ്കിൽ കാലാവധിക്ക് ശേഷം ഇത് വീണ്ടും പുതുക്കാവുന്നതാണ്. സിംഗിൾ അക്കൗണ്ടിൽ പരമാവധി 9 ലക്ഷം രൂപ വരെയും, ജോയിന്റ് അക്കൗണ്ടുകളിൽ 15 ലക്ഷം രൂപ വരെയും നിക്ഷേപിക്കാം.

എങ്ങനെയാണ് പ്രതിമാസം 9,250 രൂപ ലഭിക്കുന്നത്?

ഈ പദ്ധതിയുടെ പരമാവധി പ്രയോജനം ലഭിക്കുന്നത് ജോയിന്റ് അക്കൗണ്ട് ഉടമകൾക്കാണ്. ദമ്പതികൾക്കോ അല്ലെങ്കിൽ മൂന്ന് പേർക്കോ ചേർന്ന് ജോയിന്റ് അക്കൗണ്ട് ആരംഭിക്കാം. ജോയിന്റ് അക്കൗണ്ടിൽ നിങ്ങൾ 15 ലക്ഷം രൂപ ഒരുമിച്ച് നിക്ഷേപിക്കുകയാണെങ്കിൽ, 7.4% പലിശ നിരക്കിൽ പ്രതിവർഷം 1,11,000 രൂപ പലിശയായി ലഭിക്കും. ഇത് 12 മാസത്തേക്ക് വിഭജിക്കുമ്പോൾ പ്രതിമാസം 9,250 രൂപ നിങ്ങളുടെ അക്കൗണ്ടിലെത്തും. സിംഗിൾ അക്കൗണ്ടിൽ ഒരാൾ തനിച്ച് 9 ലക്ഷം രൂപ നിക്ഷേപിക്കുകയാണെങ്കിൽ പ്രതിവർഷം 66,600 രൂപ പലിശ ലഭിക്കും. അതായത് മാസംതോറും 5,550 രൂപ വരുമാനമായി ലഭിക്കും.

അക്കൗണ്ട് എങ്ങനെ തുടങ്ങാം?

ഏതൊരു പോസ്റ്റ് ഓഫീസ് ശാഖയിലും ഈ അക്കൗണ്ട് ആരംഭിക്കാം. പ്രായപൂർത്തിയായവർക്കും 10 വയസ്സിന് മുകളിലുള്ള കുട്ടികൾക്കും സ്വന്തം പേരിൽ അക്കൗണ്ട് തുടങ്ങാവുന്നതാണ്. പത്തുവയസ്സിൽ താഴെയുള്ള കുട്ടികൾക്കായി രക്ഷിതാക്കൾക്ക് അക്കൗണ്ട് ആരംഭിക്കാം. അക്കൗണ്ട് തുറക്കുന്നതിനായി ആധാർ കാർഡ്, പാൻ കാർഡ്, പാസ്പോർട്ട് സൈസ് ഫോട്ടോ എന്നിവ ആവശ്യമാണ്. 

കുറഞ്ഞത് 1,000 രൂപ മുതൽ നിക്ഷേപം ആരംഭിക്കാം എന്നതാണ് ഈ പദ്ധതിയുടെ മറ്റൊരു പ്രത്യേകത. ഒരു വർഷത്തിന് മുൻപ് പണം പിൻവലിക്കാൻ സാധിക്കില്ല. 1-3 വർഷത്തിനിടയിൽ പിൻവലിച്ചാൽ നിക്ഷേപ തുകയുടെ 2% കുറയ്ക്കുന്നതാണ്. 3-5 വർഷത്തിനിടയിൽ പിൻവലിച്ചാൽ 1% തുക പിഴയായി ഈടാക്കും. ഈ പദ്ധതിക്ക് പ്രത്യേക നികുതി ഇളവുകൾ ലഭ്യമല്ല. ലഭിക്കുന്ന പലിശ വരുമാനം നികുതിക്ക് വിധേയമാണ്. വിരമിച്ചവർക്കും സ്ഥിരമായ മാസവരുമാനം ആഗ്രഹിക്കുന്ന വീട്ടമ്മമാർക്കും ഏറ്റവും അനുയോജ്യമായ ഒരു സമ്പാദ്യ പദ്ധതിയാണിത്.