5 ലക്ഷം നിക്ഷേപിച്ചാൽ 15 ലക്ഷം റിട്ടേൺ ലഭിക്കുന്ന പോസ്റ്റ്‌ ഓഫീസിന്റെ കിടിലൻ പദ്ധതി

കൂടുതൽ പേരും തങ്ങളുടെ നിക്ഷേപം കൊണ്ട് സമ്പാദ്യം വർധിപ്പിക്കാൻ ആഗ്രഹിക്കുന്നവരാണ്. സുരക്ഷിതമായ നിക്ഷേപത്തോടൊപ്പം, മികച്ച വരുമാനവും നികുതി ആനുകൂല്യങ്ങളും അവർ അന്വേഷിക്കുന്നു. പോസ്റ്റ്‌ ഓഫീസിന്റെ വിവിധ നിക്ഷേപ പദ്ധതികൾ സുരക്ഷിതമായ നിക്ഷേപവും സെക്ഷൻ 80 സി ഉൾപ്പെടെയുള്ള നികുതി ആനുകൂല്യങ്ങളും നൽകുന്നു. അത്തരത്തിൽ ഉറപ്പുള്ള വരുമാനം വാഗ്ദാനം ചെയ്യുന്ന ഒരു പോസ്റ്റ്‌ ഓഫീസ് പദ്ധതിയാണ് പോസ്റ്റ്‌ ഓഫീസ് ടൈം ഡെപ്പോസിറ്റ് (ടി.ഡി).

ഈ പദ്ധതിക്ക് കീഴിൽ, നിക്ഷേപകർക്ക് അവരുടെ പണം 5 വർഷത്തേക്ക് സുരക്ഷിതമാക്കാനും ആ സമയം പലിശ നേടാനും കഴിയും. 5 വർഷത്തെ കാലയളവിൽ 7.5 ശതമാനം പലിശ നിരക്കാണ് പദ്ധതി വാഗ്ദാനം ചെയ്യുന്നത്. ടി.ഡി യിൽ നിക്ഷേപിക്കുന്നതിലൂടെ, നിങ്ങൾക്ക് നിക്ഷേപ തുകയേക്കാൾ മൂന്നിരട്ടിയിൽ കൂടുതൽ ഉണ്ടാക്കാൻ സാധിക്കും. അതായത്, നിങ്ങൾ 5,00,000 രൂപ നിക്ഷേപിച്ചാൽ 15,00,000 രൂപയിൽ കൂടുതൽ നിങ്ങൾക്ക് നേടാൻ സാധിക്കും. അതെങ്ങനെയാണെന്ന് നോക്കാം.

5 വർഷത്തെ കാലയളവിൽ 5,00,000 രൂപ നിക്ഷേപിക്കുമ്പോൾ, 7.5 ശതമാനം പലിശ നിരക്കിൽ നിങ്ങളുടെ തുക 7,24,974 രൂപയായി ഉയരുന്നു. ഈ പണം നിങ്ങൾ 5 വർഷത്തേക്ക് കൂടി നിക്ഷേപിക്കുമ്പോൾ, 10 വർഷത്തിനുള്ളിൽ 5,51,175 രൂപ പലിശയായി ലഭിക്കും. അപ്പോൾ ആകെ തുക 10,51,175 രൂപയാകും. ഇത് 15 ലക്ഷം രൂപയാക്കാൻ, നിങ്ങളുടെ പണം അഞ്ച് വർഷത്തേക്ക് വീണ്ടും നിക്ഷേപിക്കണം. ഈ രീതിയിൽ, നിങ്ങൾ അതേ പദ്ധതിക്ക് കീഴിൽ വീണ്ടും നിക്ഷേപിക്കുമ്പോൾ പലിശയിനത്തിൽ മാത്രം നിങ്ങൾക്ക് 10,24,149 രൂപ ലഭിക്കും. നിക്ഷേപ തുകയും കൂടെ ചേരുമ്പോൾ, നിങ്ങളുടെ മൊത്തം വരുമാനം 15 ലക്ഷം രൂപയിൽ കൂടുതലായിരിക്കും.

പദ്ധതി ഒരു വർഷത്തെ നിക്ഷേപ കാലാവധിയിൽ 6.9 ശതമാനം പലിശയും രണ്ട് മുതൽ മൂന്ന് വർഷം വരെയുള്ള കാലാവധിയിൽ 7 ശതമാനം പലിശയും വാഗ്ദാനം ചെയ്യുന്നു. 5 വർഷത്തെ കാലയളവിൽ ആരംഭിച്ച ഒരു പദ്ധതി 4 വർഷത്തിന് ശേഷം, കാലയളവ് പൂർത്തിയാവാതെ പിൻവലിച്ചാൽ 4 ശതമാനം പലിശ നിരക്കാണ് ലഭിക്കുക. പോസ്റ്റ്‌ ഓഫീസ് ടൈം ഡെപ്പോസിറ്റ് പദ്ധതി, ആദായനികുതി നിയമത്തിലെ സെക്ഷൻ 80 സി പ്രകാരം നികുതി ഇളവുകൾക്ക് യോഗ്യമാണ്.