പലിശ മാത്രം 12 ലക്ഷത്തിന് മുകളിൽ; പോസ്റ്റ് ഓഫീസിന്റെ ഈ സ്കീമിൽ 1000 രൂപ മുതൽ നിക്ഷേപിക്കാം

പ്രായം 60 വയസ്സ് കഴിഞ്ഞാലും സാമ്പത്തിക സുരക്ഷ ഉറപ്പാക്കാൻ സാധിക്കും. വാർദ്ധക്യം ഒരിക്കലും വെറുമൊരു വിശ്രമ ജീവിതമല്ല. ഇതുവരെ ചെയ്യാൻ സാധിക്കാത്ത പലതും സ്വാതന്ത്ര്യത്തോടെ ചെയ്യാൻ സാധിക്കുന്ന സമയം കൂടെയാണ്. എന്നാൽ നിങ്ങൾക്ക് വാർദ്ധക്യ കാല്യത്ത് സുരക്ഷിതമായ സേവിം​ഗ്സ് ഉണ്ടായിരിക്കണം. അതിനായി 100% സുരക്ഷിതമായ പോസ്റ്റ് ഓഫീസ് സ്കീമുകളിൽ നിക്ഷേപിക്കാം. ഉയർന്ന പലിശയും ലഭിക്കും.

പ്രായമായവർക്കായി നിക്ഷേപിക്കാവുന്ന കിടിലൻ പോസ്റ്റ് ഓഫീസ് പദ്ധതിയാണ് സീനിയർ സിറ്റിസൺ സേവിം​ഗ്സ് സ്കീം (SCSS). ജോലിയിൽ നിന്നും വിരമിക്കുമ്പോൾ നിങ്ങൾക്ക് വലിയൊരു തുക സമ്പാദ്യമായി ഉണ്ടാവാം. ആ തുകയ്ക്ക് ഉയർന്ന പലിശയോടെ പോസ്റ്റ് ഓഫീസിൽ സുരക്ഷിതമായി നിക്ഷേപിക്കാം. കുറഞ്ഞ കാലാവധിയിൽ നിക്ഷേപിച്ച് വലിയ റിട്ടേൺ ഉണ്ടാക്കാൻ ഇതിലൂടെ സാധിക്കുന്നു. ഈ സ്കീമിലൂടെ പലിശ മാത്രം 12 ലക്ഷത്തിനു മുകളിൽ നേടാൻ സാധിക്കും.

പോസ്റ്റ് ഓഫീസിന്റെ സീനിയർ സിറ്റിസൺ സേവിം​ഗ്സ് സ്കീമിലൂടെ നിങ്ങൾക്ക് 5 വർഷത്തെ കാലാവധിയിലേക്ക് നിക്ഷേപിക്കാവുന്നതാണ്. അതായത് ഒരു എഫ്.ഡിയിൽ നിക്ഷേപിക്കുന്നതിലും എളുപ്പത്തിൽ ഈ സ്കീമിൽ നിക്ഷേപിക്കാനും മികച്ച പലിശ ഉറപ്പാക്കാനും സാധിക്കും. ഏറ്റവും കുറഞ്ഞത് 1000 രൂപ മുതൽ നിങ്ങൾക്ക് ഈ സ്കീമിൽ നിക്ഷേപിക്കാം. എന്നാൽ പരമാവധി 30 ലക്ഷം വരെയാണ് നിക്ഷേപ പരിധി.

ഈ സ്കീമിന് കീഴിൽ സിം​ഗിൾ അക്കൗണ്ടിന് പുറമേ ജോയിന്റ് അക്കൗണ്ടും ആരംഭിക്കാം. ഇതിൽ നികുതി ഇളവുകൾ ലഭിക്കുന്നു. ആവശ്യമെങ്കിൽ കാലാവധിയ്ക്ക് മുന്നേയും നിക്ഷേപം പിൻവലിക്കാൻ സാധിക്കും. എന്നാൽ ഇങ്ങനെ പിൻവലിക്കുമ്പോൾ നിശ്ചിത തുക നിങ്ങളിൽ നിന്നും ഈടാക്കും.

പലിശയും നേട്ടവും

ഈ സേവിം​ഗ്സ് സ്കീം 60 വയസ്സ് പൂർത്തിയായ മുതിർന്ന പൗരൻമാർക്ക് വേണ്ടിയുള്ളതാണ്. മാത്രമല്ല 55 വയസ്സിനു ശേഷം ജോലിയിൽ നിന്നും വിരമിക്കുന്നവർക്കും, 50 വയസ് കഴിഞ്ഞ് സേനയില്‍ നിന്ന് വിരമിച്ചവര്‍ക്കും ഇതില്‍ നിക്ഷേപിക്കാം. അതിനാൽ പലിശ നിരക്കും കൂടുതലാണ്. പോസ്റ്റ് ഓഫീസ് സീനിയർ സിറ്റിസൺ സേവിം​ഗ്സ് സ്കീം 8.2% നിരക്കിലാണ് പലിശ നൽകുന്നത്. മറ്റു നിക്ഷേപങ്ങളുടെ പലിശ നോക്കിയാൽ ഇത് ഉയർന്ന നിരക്കാണ്. നിങ്ങൾക്ക് ഓരോ പാദത്തിലുമാണ് പലിശ ലഭിക്കുന്നത്. അതായത് ഓരോ മൂന്ന് മാസത്തിലും പലിശ ലഭിക്കും.

പലിശ മാത്രം 12 ലക്ഷത്തിനു മുകളിൽ.....

ഈ സിനിയർ സിറ്റിസൺ സേവിം​ഗ്സ് സ്കീമിൽ നിങ്ങൾ പരമാവധി തുകയായ 30,00,000 ലക്ഷം രൂപ നിക്ഷേപിക്കണം. എങ്കിൽ 5 വർഷത്തെ കാലാവധിയിൽ നിങ്ങൾക്ക് 8.2 ശതമാനം പലിശ ലഭിക്കും. ഈ കണക്ക് പരിശോധിച്ചാൽ നിങ്ങൾക്ക് 12,30,000 രൂപ പലിശ മാത്രം ലഭിക്കും. 5 വർഷത്തെ കാലാവധി പൂർത്തിയാവുമ്പോൾ മൊത്തം 42,30,000 രൂപ നിങ്ങൾക്ക് ലഭിക്കും.

5 വർഷത്തിനു ശേഷവും ഈ സ്കീമിൽ തുടരാൻ ആഗ്രഹിക്കുന്നുവെങ്കിൽ നിലവിലെ കാലാവധി പൂർത്തിയാകുമ്പോൾ, നിങ്ങൾക്ക് അക്കൗണ്ട് കാലാവധി മൂന്ന് വർഷത്തേക്ക് നീട്ടാവുന്നതാണ്. കാലാവധി പൂർത്തിയാവുന്നതിന് 1 വർഷം കൊണ്ട് ഇത് നീട്ടാവുന്നതാണ്.