പോസ്റ്റ് ഓഫീസ് ടൈം ഡിപ്പോസിറ്റും എൻ‌എസ്‌സിയും; കൂടുതൽ നേട്ടമുണ്ടാക്കാവുന്ന നിക്ഷേപം ഏത്?

സേവിംഗ്സ് അക്കൌണ്ടിനേക്കാൾ കൂടുതലും എന്നാൽ സുരക്ഷിതവുമായ വരുമാനം വാഗ്ദാനം ചെയ്യുന്ന നിരവധി നിക്ഷേപ മാർഗങ്ങളുണ്ട്. സ്മോൾ സേവിംഗ്സ് സ്കീമുകളായ പി‌പി‌എഫ്, എൻ‌എസ്‌സി, സുകന്യ സമൃദ്ധി യോജന മുതലായവ സേവിംഗ്സ് അക്കൌണ്ടുമായി താരതമ്യപ്പെടുത്തുമ്പോൾ മികച്ച വരുമാനം വാഗ്ദാനം ചെയ്യുന്ന നിക്ഷേപ മാർഗമാണ്.

മികച്ച നിക്ഷേപം

നികുതി ലാഭിക്കുന്നതിന് ലഭ്യമായ നിരവധി നിക്ഷേപ മാർഗങ്ങളിൽ, ഏറ്റവും ജനപ്രിയമായ രണ്ട് ഹ്രസ്വകാല നിക്ഷേപ മാർഗങ്ങളാണ് നാഷണൽ സേവിംഗ്സ് സർട്ടിഫിക്കറ്റും (എൻ‌എസ്‌സി), 5 വർഷത്തെ പോസ്റ്റ് ഓഫീസ് ടൈം ഡെപ്പോസിറ്റും (പി‌ഒ‌ടിഡി). 5 വർഷമോ അതിൽ കൂടുതലോ കാലാവധിയുള്ള ബാങ്ക് ഫിക്സഡ് ഡെപ്പോസിറ്റുകളും (എഫ്ഡി) ആദായനികുതി നിയമത്തിലെ സെക്ഷൻ 80 സി പ്രകാരം നികുതി ആനുകൂല്യങ്ങൾ നൽകുന്നുണ്ടെങ്കിലും, എൻ‌എസ്‌സിയും 5 വർഷത്തെ പി‌ഒ‌ടിഡിയും പൂർണ്ണമായും സുരക്ഷിതമാണ്.

നിക്ഷേപ പരിധി

എൻ‌എസ്‌സിയിലും 5 വർഷത്തെ പി‌ഒ‌ടി‌ഡിയിലും മിനിമം നിക്ഷേപ പരിധി 100 രൂപയും അതിന്റെ ഗുണിതവുമാണ്. ഈ രണ്ട് സ്കീമുകൾക്കും പരമാവധി നിക്ഷേപത്തിന് പരിധിയില്ല. രണ്ട് സ്കീമുകളിലെയും നിക്ഷേപം നിക്ഷേപകന് ഒറ്റയ്ക്കോ സംയുക്തമായോ പ്രായപൂർത്തിയാകാത്തയാൾക്കായോ ചെയ്യാം. ഒരൊറ്റ പോസ്റ്റോഫീസിൽ നിന്നോ വിവിധ ബ്രാഞ്ചുകളിൽ നിന്നോ ഒന്നിലധികം എൻ‌എസ്‌സികളിൽ നിക്ഷേപിക്കാവുന്നതാണ്. അതുപോലെ, ഒരൊറ്റ പോസ്റ്റോഫീസിലോ വ്യത്യസ്ത ബ്രാഞ്ചുകളിലോ ഒന്നിലധികം പോസ്റ്റ് ഓഫീസ് ടൈം ഡെപ്പോസിറ്റ് അക്കൗണ്ടുകളും തുറക്കാം.

പലിശ

എൻ‌എസ്‌സിയുടെയും 5 വർഷത്തെ പി‌ഒ‌ടിഡിയുടെയും പലിശ നിരക്ക് ത്രൈമാസ അടിസ്ഥാനത്തിലാണ് സർക്കാർ തീരുമാനിക്കുന്നത്. നിലവിൽ എൻ‌എസ്‌സിയുടെ പലിശ നിരക്ക് പ്രതിവർഷം 7.9 ശതമാനമാണ്. 5 വർഷത്തെ പി‌ഒ‌ടി‌ഡിയിൽ നൽകുന്ന പലിശ നിരക്ക് പ്രതിവർഷം 7.7 ശതമാനമാണ്.

നികുതി ആനുകൂല്യങ്ങൾ

പരമാവധി നിക്ഷേപ പരിധി ഇല്ലെങ്കിലും, ആദായനികുതി നിയമത്തിലെ 80 സി പ്രകാരം സാമ്പത്തിക വർഷത്തിലെ നികുതി വരുമാനത്തിൽ നിന്ന് 1.5 ലക്ഷം രൂപ വരെ നികുതി ഇളവ് ലഭ്യമാണ്.

കാലാവധി

എൻ‌എസ്‌സിയിൽ നിക്ഷേപിച്ച പണവും സമാഹരിച്ച പലിശയും കാലാവധി പൂർത്തിയാകുന്നതിനുമുമ്പ് പിൻവലിക്കാനാവില്ല. എന്നിരുന്നാലും, ഒരു നിക്ഷേപകന് എൻ‌എസ്‌സിയിൽ നിന്ന് വായ്പ നേടാൻ കഴിയും. 5 വർഷത്തെ പോസ്റ്റ് ഓഫീസ് ടൈം ഡെപ്പോസിറ്റിൽ നിക്ഷേപിച്ച മൂലധനം നിക്ഷേപ തീയതി കഴിഞ്ഞ് 6 മാസത്തിനുശേഷം മാത്രമേ പിൻവലിക്കാനാകൂ. പിൻവലിക്കൽ 6 മാസത്തിന് ശേഷവും നിക്ഷേപ തീയതി മുതൽ 1 വർഷത്തിന് മുമ്പുമാണെങ്കിൽ, പോസ്റ്റ് ഓഫീസ് സേവിംഗ്സ് അക്കൗണ്ടിൽ നിലവിലുള്ള പലിശ പ്രകാരം ലളിതമായ പലിശ ലഭിക്കും. നിക്ഷേപ തീയതി മുതൽ 1 വർഷത്തിനുശേഷമാണ് പണം പിൻ‌വലിക്കുന്നതെങ്കിൽ ഒരു ശതമാനം കുറവ് പലിശ ലഭിക്കും.