പോസ്റ്റ് ഓഫീസ് vs ബാങ്ക് എഫ്ഡി: 5 ലക്ഷം നിക്ഷേപിക്കാം, 3 വർഷം കൊണ്ട് ഉയർന്ന വരുമാനം ഏത് സ്കീമിൽ?

സുരക്ഷിതമായി നിക്ഷേപിക്കുകയും സ്ഥിരമായ വരുമാനം ഉറപ്പാക്കുകയും ചെയ്യുന്ന സ്കീമുകൾ തിരയുന്നവർക്ക് എഫ്ഡി അഥവാ സ്ഥിര നിക്ഷേപങ്ങൾ മികച്ച മാർ​ഗമാണ്. താരതമ്യേന ഉയർന്ന പലിശ നിരക്ക് ലഭിച്ചിരുന്നെങ്കിലും ഇപ്പോൾ റിസർവ് ബാങ്ക് റിപ്പോ നിരക്ക് കുറച്ചതിനുശേഷം എഫ്ഡി പലിശയും കുറഞ്ഞു. സ്ഥിര നിക്ഷേപങ്ങൾ പോലെ ജനപ്രിയ നിക്ഷേപങ്ങളാണ് പോസ്റ്റ് ഓഫീസ് നൽകുന്ന ടൈം ഡെപ്പോസിറ്റ് ഉൾപ്പെടെയുള്ള ചെറുകിട സമ്പാദ്യ പദ്ധതികൾ. എന്നാൽ ഈ സ്കീമുകളുടെ പലിശ നിരക്ക് സർക്കാർ ഇതുവരെയും കുറച്ചിട്ടില്ല.

ഏറ്റവും ഉയർന്ന പലിശ നിരക്കുള്ള നിക്ഷേപങ്ങൾ ആ​ഗ്രഹിക്കുന്നുണ്ടെങ്കിൽ ഏത് സ്കീം നിങ്ങൾ തിരഞ്ഞെടുക്കും? 3 വർഷത്തേക്ക് നിങ്ങൾ 5 ലക്ഷം രൂപ നിക്ഷേപിച്ചാൽ എത്ര രൂപ നേടാം? ഓരോ സ്കീമിൻ്റെയും പലിശ നിരക്ക് എത്രയാണ്? വിശദമായ വിവരങ്ങൾ പരിശോധിക്കാം;

പോസ്റ്റ് ഓഫീസ് 3 വർഷത്തെ ടൈം ഡെപ്പോസിറ്റിന്റെ നിലവിലെ പലിശ നിരക്ക്

3 വർഷത്തെ പോസ്റ്റ് ഓഫീസ് ടൈം ഡെപ്പോസിറ്റിൽ നിക്ഷേപിച്ചാൽ പ്രതിവർഷം 7.10% നിരക്കിൽ പലിശ വാഗ്ദാനം ചെയ്യുന്നു, ത്രൈമാസ അടിസ്ഥാനത്തിൽ കോമ്പൗണ്ട് ചെയ്ത് വാർഷികമായി വരുമാനം നൽകുന്നു. ഇത് ഗവൺമെന്റ് പിന്തുണയുള്ള ഒരു സമ്പാദ്യ പദ്ധതിയാണ്. പോസ്റ്റ് ഓഫീസ് ടൈം ഡെപ്പോസിറ്റുകൾ ഉറപ്പുള്ള വരുമാനവും ഉയർന്ന നേട്ടവും നൽകുന്നു. എന്നാൽ പോസ്റ്റ് ഓഫീസ് എഫ്ഡി മുതിർന്ന പൗരന്മാർക്ക് പ്രത്യേക നിരക്കുകൾ നൽകുന്നില്ല. കൂടാതെ പലിശ വർഷം തോറും നൽകുന്നു.

മൂന്ന് വർഷത്തെ ബാങ്ക് എഫ്ഡികളിലെ ഏറ്റവും ഉയർന്ന പലിശ നിരക്ക്

നിരവധി സ്വകാര്യ ബാങ്കുകൾ സ്ഥിര നിക്ഷേപങ്ങൾക്ക് ഉയർന്ന പലിശ നിരക്ക് വാഗ്ദാനം ചെയ്യുന്നു. ഡിസിബി ബാങ്ക്, ആർബിഎൽ ബാങ്ക്, യെസ് ബാങ്ക് എന്നിവ 7.50% വാർഷിക പലിശ വാഗ്ദാനം ചെയ്യുന്നു. തൊട്ടു പിന്നിൽ ബന്ധൻ ബാങ്ക്, ഇൻഡസ്ഇൻഡ് ബാങ്ക് എന്നിവ 7.25% വാർഷിക പലിശയും, കാനറ ബാങ്ക് 7.20% വാർഷിക പലിശയും വാഗ്ദാനം ചെയ്യുന്നു. ബാങ്ക് ഓഫ് ബറോഡ 7.15% വാർഷിക പലിശ നിരക്ക് നൽകുന്നു.

ആക്സിസ് ബാങ്ക്, എച്ച്ഡിഎഫ്സി ബാങ്ക്, ഐസിഐസിഐ ബാങ്ക്, കൊട്ടക് മഹീന്ദ്ര ബാങ്ക് എന്നിവയുൾപ്പെടെ നിരവധി പ്രമുഖ ബാങ്കുകൾ സാധാരണ പൗരന്മാർക്ക് 3 വർഷത്തെ എഫ്ഡികൾക്ക് പ്രതിവർഷം 6.90% പലിശ വാഗ്ദാനം ചെയ്യുന്നു. അതായത് പോസ്റ്റ് ഓഫീസ് എഫ്ഡി വാഗ്ദാനം ചെയ്യുന്ന പലിശ നിരക്കിനേക്കാൾ ഇത് 20 ബേസിസ് പോയിന്റ് കുറവാണ്.

എസ്‌ബി‌ഐ, യൂണിയൻ ബാങ്ക്, പി‌എൻ‌ബി, ഇന്ത്യൻ ബാങ്ക് തുടങ്ങിയ പൊതുമേഖലാ ബാങ്കുകളും സാധാരണ നിക്ഷേപകർക്ക് 6.25% മുതൽ 6.75% വരെയാണ് പലിശ നൽകുന്നത്. ഇത് പോസ്റ്റ് ഓഫീസ് എഫ്ഡിയേക്കാൾ വളരെ കുറവാണ്.

5 ലക്ഷം നിക്ഷേപിച്ചാൽ എത്ര സമ്പാദിക്കാം?

പോസ്റ്റ് ഓഫീസ് എഫ്‌ഡിയിൽ പ്രതിവർഷം 7.10% (കോമ്പൗണ്ടഡ് ത്രൈമാസിക) പലിശ കണക്കാക്കിയാൽ 5 ലക്ഷം രൂപയുടെ നിക്ഷേപം 3 വർഷത്തെ കാലാവധി പൂർത്തിയാകുമ്പോൾ തുക ഏകദേശം 6,17,538 രൂപയായിരിക്കും. നിങ്ങൾക്ക് ലഭിക്കുന്ന ആകെ പലിശ 1,17,538 രൂപയായിരിക്കും.

എന്നാൽ എസ്‌ബി‌ഐ, എച്ച്‌ഡി‌എഫ്‌സി, ഐ‌സി‌ഐ‌സി‌ഐ, ആക്സിസ്, കൊട്ടക് തുടങ്ങിയ കുറഞ്ഞ നിരക്കുകൾ വാഗ്ദാനം ചെയ്യുന്ന ബാങ്കുകളിൽ ഇതേ 5 ലക്ഷം 3 വർഷത്തേക്ക് നിക്ഷേപിക്കുകയാണെങ്കിൽ മെച്യൂരിറ്റി തുക ഏകദേശം 6,14,598 രൂപയായിരിക്കും, അതായത് പലിശ മാത്രം ലഭിക്കുന്നത് 1,14,598 രൂപ. പോസ്റ്റ് ഓഫീസ് എഫ്‌ഡിയെക്കാൾ ഏകദേശം 2,940 രൂപ കുറവുണ്ടായിരിക്കും. ഇവിടെ പലിശ ഏകദേശം 6.9% ആയിരിക്കും.

എന്നാൽ മറ്റു സ്വകാര്യ ബാങ്കുകളായ ഡിസിബി, ആർ‌ബി‌എൽ, യെസ് ബാങ്ക് തുടങ്ങിയ 7.50% നിരക്കിൽ ഉയർന്ന പലിശ വാഗ്ദാനം ചെയ്യുന്നതിനാൽ മെച്യൂരിറ്റി തുക ഏകദേശം 6,24,487 രൂപയായിരിക്കും. ഇത് പോസ്റ്റ് ഓഫീസ് എഫ്‌ഡിയെക്കാൾ 6,949 രൂപ കൂടുതലായിരിക്കും. 7.20% പലിശ നിരക്കിൽ കാനറ ബാങ്കിൽ ഇതേ കാലായളവിൽ 5 ലക്ഷം നിക്ഷേപിച്ചാൽ ലഭിക്കുന്നത് ഏകദേശം 6,19,911 രൂപ‌യായിരിക്കും. ഇതും പോസ്റ്റ് ഓഫീസ് വരുമാനത്തേക്കാൾ കൂടുതലാണ്.

ഉയർന്ന പലിശ നിരക്കുള്ള സ്വകാര്യ ബാങ്കുകളിൽ ശരിയായ രീതിയിൽ നിക്ഷേപിച്ചാൽ വലിയ തുക സമ്പാദിക്കാം. മാത്രമല്ല കൂടുതൽ സുരക്ഷയോടെ നിക്ഷേപിക്കാൻ ആ​ഗ്രഹിക്കുന്നവർക്ക് പോസ്റ്റ് ഓഫീസ് സമ്പാദ്യ പദ്ധതികളെയും സമീപിക്കാം.

അറിയിപ്പ്:
മുകളില്‍ കൊടുത്തിരിക്കുന്ന ലേഖനം പഠനാവശ്യത്തിന് നൽകുന്നതാണ്. ഇതുമായി ബന്ധപ്പെട്ട് നിക്ഷേപ തീരുമാനങ്ങള്‍ എടുക്കും മുന്‍പ് സാമ്പത്തിക വിദഗ്ധന്റെ നിര്‍ദേശം തേടാം. ഓഹരി വിപണിയിലെ നിക്ഷേപം നഷ്ട സാധ്യതകള്‍ക്ക് വിധേയമാണ്. സ്വന്തം റിസ്‌കില്‍ മാത്രം നിക്ഷേപ തീരുമാനം കൈക്കൊള്ളുക. ലേഖനം വായിച്ചിട്ട് എടുക്കുന്ന തീരുമാനത്തിന്റെ അടിസ്ഥാനത്തില്‍ സംഭവിക്കുന്ന ലാഭനഷ്ടങ്ങള്‍ക്ക് ഗ്രേനിയം ഇന്‍ഫര്‍മേഷന്‍ ടെക്നോളജീസും ലേഖകനും ഉത്തരവാദികളല്ല.