പിപിഎഫ് നിക്ഷേപം: വെറും 12,500 നിക്ഷേപിച്ചാൽ ജീവിതകാലം മുഴുവൻ 60,000 രൂപ പെൻഷൻ കിട്ടും, എങ്ങനെ?

ജോലിയിൽ നിന്നും വിരമിക്കുമ്പോൾ സാമ്പത്തിക സുരക്ഷ ഉണ്ടായിരിക്കണം. ആരോ​ഗ്യ സംരക്ഷണത്തിനു പോലും പണം അത്യാവശ്യമാണ്. മറ്റുള്ളവരെ ആശ്രയിക്കാതെ ജീവിക്കാൻ ആ​ഗ്രഹിക്കുന്നവർക്ക് പബ്ലിക് പ്രൊവിഡന്റ് ഫണ്ടിൽ (പിപിഎഫ്) നിക്ഷേപിച്ച് തുടങ്ങാം. വലിയ തുക സമ്പാദിക്കാൻ ആ​ഗ്രഹിക്കുന്നവർക്കും ഇതൊരു മികച്ച മാർ​ഗമാണ്. പിപിഎഫിലൂടെ നിക്ഷേപകന് ദീർഘകാലടിസ്ഥാനത്തിൽ ശക്തമായ ഒരു വിരമിക്കൽ ഫണ്ട് സൃഷ്ടിക്കാം.

എന്താണ് പിപിഎഫ്?

അപകട സാധ്യതയുള്ള നിരവധി നിക്ഷേപ പദ്ധതികളിൽ നിന്നും വ്യത്യസ്തമായി സർക്കാർ പിന്തുണയുള്ള ഒരു ദീർഘകാല നിക്ഷേപ പദ്ധതിയാണ് പിപിഎഫ്. പ്രതിവർഷം പരമാവധി 1.5 ലക്ഷം രൂപ വരെ ഈ സ്കീം പ്രകാരം നിക്ഷേപിക്കാം. നിലവിൽ 7.1% വാർഷിക പലിശയാണ് നിക്ഷേപകന് ലഭിക്കുന്നത്. ഇത് കൂട്ടു പലിശയിലൂടെ എല്ലാ വർഷവും വർദ്ധിച്ചുകൊണ്ടിരിക്കുന്നു.

നികുതി രഹിതമായ നേട്ടം...

നികുതി രഹിതമായ പലിശ ലഭിക്കുന്നതിനാൽ ബാങ്ക് നിക്ഷേപങ്ങളെക്കാൾ പിപിഎഫ് ആകർഷകമാകുന്നു. ആദായനികുതി നിയമത്തിലെ സെക്ഷൻ 80C പ്രകാരമാണ് നികുതിയിളവ് ലഭിക്കുന്നത്.

വിരമിക്കൽ ആസൂത്രണം...

ജോലിയിൽ നിന്നും വിരമിക്കുമ്പോൾ സുരക്ഷിതമായ ഒരു സമ്പാദ്യ മാർ​ഗം ആ​ഗ്രഹിക്കുന്നവർക്ക് പിപിഎഫ് ഒരു മികച്ച തിരഞ്ഞെടുപ്പാവുന്നു. ശരിയായ രീതിയിൽ ആസൂത്രണം ചെയ്ത് അച്ചടക്കത്തോടെ നിക്ഷേപിച്ചാൽ പ്രതീക്ഷിക്കുന്നതിലും വലിയ തുക പിപിഎഫിലൂടെ സ്വന്തമാക്കാം. അപകടസാധ്യത ഒഴിവാക്കി സുരക്ഷിതമായ ഭാവി ആഗ്രഹിക്കുന്നവർക്ക് പിപിഎഫ് ഒരു വഴിത്തിരിവാകും.

പണം ഉടൻ തന്നെ പിൻവലിക്കരുത്...

പിപിഎഫിൻ്റെ കാലാവധി 15 വർഷമാണ്. എന്നാൽ ഈ കാലാവധിക്കു ശേഷം നിക്ഷേപം പിൻവലിക്കാതെ വീണ്ടും നിക്ഷേപിക്കുന്നത് സമ്പാദ്യം വർദ്ധിപ്പിക്കും. 15 വർഷത്തെ ലോക്ക്-ഇൻ കാലാവധി അവസാനിച്ചാൽ നിക്ഷേപ കാലാവധി നിങ്ങളുടെ ഇഷ്ടാനുസരണം നീട്ടാൻ സാധിക്കും. ഇവിടെ 5 വർഷത്തെ ബ്ലോക്കുകളായി കാലാവധി നീട്ടാൻ സധിക്കും.

15 വർഷത്തിനു ശേഷം നിങ്ങൾ 10 വർഷത്തേക്ക് കൂടെ നിക്ഷേപം തുടർന്നാൽ സമ്പാദ്യം പ്രതീക്ഷിക്കുന്നതിനേക്കാൾ ഉയരും. അതായത് പിപിഎഫ് കാലാവധി മൊത്തം 25 വർഷത്തേക്ക് എത്തും. നിക്ഷേപത്തിലൂടെ നിങ്ങൾക്ക് പ്രതിമാസം വരുമാനം ആ​ഗ്രഹിക്കുന്നുണ്ടെങ്കിലും വലിയ നേട്ടം ഉറപ്പാക്കാം. അതിനായി നിക്ഷേപം പിൻവലിക്കാതെ അക്കൗണ്ടിൽ തന്നെ സൂക്ഷിക്കാം... കൂടുതൽ അറിയാം...

ഒരു കോടി രൂപ സമ്പാദിക്കാം....

പിപിഎഫിൽ നിങ്ങൾ 25 വർഷം തുടർച്ചയായി ഓരോ മാസവും 12,500 രൂപ നിക്ഷേപിച്ചാൽ, അതായത് പ്രതിവർഷം 1.5 ലക്ഷം രൂപ നിക്ഷേപിക്കുന്നു എന്നർത്ഥം. 25 വർഷത്തെ ആകെ നിക്ഷേപ തുക 37,50,000 രൂപയായിരിക്കും. ഇവിടെ നിങ്ങൾക്ക് ലഭിക്കുന്ന മൊത്തം പലിശ മാത്രം 65,58,015 രൂപയായിരിക്കും. അതായത് മൊത്തം നിക്ഷേപം 1,03,08,015 രൂപയായി വളരുന്നു.

പ്രതിമാസം 60,000 രൂപയിൽ കൂടുതൽ പെൻഷൻ നേടാം...

25 വർഷം കൊണ്ട് ലഭിക്കുന്ന 1.03 കോടി രൂപ പിൻവലിക്കാതെ മുഴുവൻ അക്കൗണ്ടിൽ സൂക്ഷിക്കുകയാണെങ്കിൽ, അടുത്ത വർഷം നിങ്ങൾക്ക് 7,31,869 രൂപ പലിശ ലഭിക്കും. അതായത് ഓരോ മാസവും ഏകദേശം 60,989 രൂപ ലഭിക്കും. ഇതൊരു സർക്കാർ സംവിധാനത്തിൽ പ്രവർത്തിക്കുന്ന പദ്ധതിയായതിനാൽ പണം സുരക്ഷിതമായി അക്കൗണ്ടിലുണ്ടാവും. ഒരു സാധാരണ പെൻഷൻ തുക ലഭിക്കുന്നതു പോലെ എല്ലാ മാസവും നിശ്ചിത തുക നിങ്ങൾക്ക് ഉറപ്പാക്കാനും സാധിക്കുന്നു.

കാലാവധി എങ്ങനെ നീട്ടാം..?

15 വർഷത്തിനു ശേഷം വീണ്ടും നിക്ഷേപിക്കാൻ പദ്ധതിയുണ്ടെങ്കിൽ ഓരോ 5 വർഷത്തെ ബ്ലോക്കുകളായി കാലാവധി നീട്ടാം. എന്നാൽ ഓരോ 5 വർഷത്തിലും അത് പുതുക്കേണ്ടത് ആവശ്യമാണ്. ഇതിനായി, ബാങ്കിലോ പോസ്റ്റ് ഓഫീസിലോ ഒരു അപേക്ഷ നൽകണം. മാത്രമല്ല കാലാവധി പൂർത്തിയാകുന്നതിന്റെ ഒരു വർഷത്തിനുള്ളിൽ ഇത് പുതുക്കേണ്ടതുണ്ട്.

അറിയിപ്പ്:
മുകളില്‍ കൊടുത്തിരിക്കുന്ന ലേഖനം പഠനാവശ്യത്തിന് നൽകുന്നതാണ്. ഇതുമായി ബന്ധപ്പെട്ട് നിക്ഷേപ തീരുമാനങ്ങള്‍ എടുക്കും മുന്‍പ് സാമ്പത്തിക വിദഗ്ധന്റെ നിര്‍ദേശം തേടാം. ഓഹരി വിപണിയിലെ നിക്ഷേപം നഷ്ട സാധ്യതകള്‍ക്ക് വിധേയമാണ്. സ്വന്തം റിസ്‌കില്‍ മാത്രം നിക്ഷേപ തീരുമാനം കൈക്കൊള്ളുക. ലേഖനം വായിച്ചിട്ട് എടുക്കുന്ന തീരുമാനത്തിന്റെ അടിസ്ഥാനത്തില്‍ സംഭവിക്കുന്ന ലാഭനഷ്ടങ്ങള്‍ക്ക് ഗുഡ്റിട്ടേൺസ് മലയാളവും ലേഖകനും ഉത്തരവാദികളല്ല.

FAQs

എന്താണ് പബ്ലിക് പ്രൊവിഡന്റ് ഫണ്ട് (പിപിഎഫ്)?

പബ്ലിക് പ്രൊവിഡന്റ് ഫണ്ട് എന്നത് സർക്കാർ പിന്തുണയുള്ള ഒരു ദീർഘകാല നിക്ഷേപ പദ്ധതിയാണ്. ഇത് സുരക്ഷിതമായ വരുമാനം വാഗ്ദാനം ചെയ്യുന്നു.

പിപിഎഫിൽ ഒരാൾക്ക് പ്രതിവർഷം നിക്ഷേപിക്കാൻ കഴിയുന്ന പരമാവധി തുക എത്രയാണ്?

പബ്ലിക് പ്രൊവിഡന്റ് ഫണ്ടിൽ പ്രതിവർഷം പരമാവധി 1.5 ലക്ഷം രൂപ വരെ നിക്ഷേപിക്കാം.

25 വർഷത്തിനു ശേഷവും പിപിഎഫിൽ നിന്ന് പണം പിൻവലിച്ചില്ലെങ്കിൽ എന്ത് സംഭവിക്കും?

നിങ്ങൾക്ക് എല്ലാ വർഷവും അതിൽ നിന്നും പലിശ ലഭിക്കുന്നത് തുടരും, അത് പ്രതിമാസ വരുമാനമായി ഉപയോഗിക്കാം.