പിപിഎഫ് നിക്ഷേപം: ജൂൺ 30ന് മുമ്പ് നിങ്ങൾ ചെയ്യേണ്ടത് എന്ത്? പുതിയ മാറ്റങ്ങൾ അറിയാം

കൊറോണ വൈറസ് മഹാമാരി കാരണം, 2019-20 സാമ്പത്തിക വർഷത്തിൽ 2020 ജൂൺ 30 വരെ നിക്ഷേപം നടത്താൻ പബ്ലിക് പ്രൊവിഡന്റ് ഫണ്ട് (പിപിഎഫ്), സുകന്യ സമൃദ്ധി അക്കൗണ്ട് (എസ്എസ്എ) ഉടമകൾക്ക് മൂന്ന് മാസത്തേയ്ക്ക് കാലാവധി നീട്ടി നൽകിയിരുന്നു. ഇത് പരമാവധി നിക്ഷേപ പരിധിക്ക് വിധേയമാണ്. 2019-20 സാമ്പത്തിക വർഷത്തിൽ അക്കൗണ്ടുകളിലേക്ക് നിക്ഷേപം നടത്തുമ്പോൾ പദ്ധതികൾക്കായി ഏർപ്പെടുത്തിയിരിക്കുന്ന 1.5 ലക്ഷം രൂപ വരെ വാർഷിക പരിധി ലംഘിക്കില്ലെന്ന് നിക്ഷേപകർ ഉറപ്പു വരുത്തണം.

തീയതി നീട്ടി

2020 മാർച്ച് 30 വരെയാണ് നിക്ഷേപത്തിനായി പലിശ നൽകുന്നതിന് പരിഗണിക്കുക. 2019-20 വർഷത്തേക്കുള്ള വരുമാന നികുതി കിഴിവ് ക്ലെയിം ചെയ്യുന്നതിനായി വിവിധ നിക്ഷേപങ്ങളും പേയ്‌മെന്റുകളും നടത്തുന്നതിനുള്ള തീയതിയും സർക്കാർ നീട്ടിയിട്ടുണ്ട്. ഇതിൽ സെക്ഷൻ 80 സി (പിപിഎഫിലെ നിക്ഷേപവും ഉൾപ്പെടുന്നു), 80 ഡി (ആരോഗ്യ ഇൻഷുറൻസ്), 80 ജി (സംഭാവനകൾ) എന്നിവ ഉൾപ്പെടുന്നു.

പിഴ ഇല്ല

കൂടാതെ, 2019-20 വർഷത്തേക്കുള്ള പിപിഎഫ് അക്കൗണ്ടിൽ നിർബന്ധിത മിനിമം ഡിപ്പോസിറ്റ് നിക്ഷേപിക്കാത്തതിന് പിഴ ഈടാക്കില്ല. പി‌പി‌എഫ് അക്കൌണ്ട് ഉടമകൾക്ക് ജൂൺ 30 വരെ നിക്ഷേപം നടത്താം. പിഴയോ/പുനരുജ്ജീവന ഫീസ് ഈടാക്കില്ല. മറ്റ് ചെറുകിട സമ്പാദ്യ പദ്ധതികൾക്കും ഇത് ബാധകമാകും. ഈ ഇളവ് 2020 സാമ്പത്തിക വർഷത്തിലേയ്ക്ക് മാത്രമായാണ് പരിമിതപ്പെടുത്തിയിരിക്കുന്നത്. മുൻ വർഷങ്ങളിൽ അക്കൗണ്ട് പ്രവർത്തനരഹിതമായിരുന്നെങ്കിൽ അധിക നിരക്ക് ഈടാക്കും. പിൻവലിക്കൽ പരിധി അല്ലെങ്കിൽ വായ്പ തീരുമാനിക്കുന്നതിന് മാർച്ച് 31 വരെയുള്ള പിപിഎഫ്, എസ്എസ്എ എന്നിവയിലെ ബാലൻസാണ് കണക്കിലെടുക്കുക.

നിയമങ്ങളിലെ മാറ്റം

പിപിഎഫ് അക്കൗണ്ട് ഉടമകളുടെ പ്രയോജനത്തിനായി കഴിഞ്ഞ സാമ്പത്തിക വർഷവും സർക്കാർ ചില നിയമങ്ങളിൽ മാറ്റം വരുത്തിയിരുന്നു. ഒരു അക്കൌണ്ട് ഉടമയ്ക്ക് ഒരു സാമ്പത്തിക വർഷത്തിൽ എത്ര തവണ വേണമെങ്കിലും 50 രൂപയുടെ ഗുണിതങ്ങളിൽ നിക്ഷേപിക്കാം, പരമാവധി സംയുക്ത നിക്ഷേപം പ്രതിവർഷം 1.5 ലക്ഷം രൂപയായിരിക്കും തുടങ്ങിയവയാണ് മാറ്റം വരുത്തിയ നിയമങ്ങൾ. നേരത്തെ, ഒരു പിപിഎഫ് അക്കൗണ്ടിൽ ഒരു വർഷത്തിനുള്ളിൽ പരമാവധി 12 നിക്ഷേപങ്ങൾ മാത്രമേ അനുവദിച്ചിരുന്നുള്ളൂ. പിപിഎഫ് ബാലൻസിൽ നിന്ന് എടുക്കുന്ന വായ്പയുടെ പലിശ നിരക്ക് നിലവിലുള്ള പിപിഎഫ് നിരക്കിന്റെ പലിശയേക്കാൾ 1 ശതമാനം കുറച്ചിരുന്നു.