നിക്ഷേപ കാലാവധിയെത്തും മുമ്പ് പിപിഎഫ് അക്കൗണ്ട് അവസാനിപ്പിക്കുമ്പോള്‍

പബ്ലിക് പ്രൊവിഡന്റ് ഫണ്ട് അഥവാ പിപിഎഫ് ഏറ്റവും ഉയര്‍ന്ന ആദായം നല്‍കുന്ന സര്‍ക്കാറിന്റെ ചെറുകിട നിക്ഷേപ പദ്ധതികളിലൊന്നാണ്. നിവില്‍ പിപിഎഫിന്റെ പലിശ നിരക്ക് ശതമാനമാണ്. 15 വര്‍ഷമാണ് പിപിഎഫിന്റെ നിക്ഷേപ കാലയളവ്. എന്നാല്‍ ചില സാഹചര്യങ്ങളില്‍ അക്കൗണ്ട് ഉടമയ്ക്ക് മെച്വൂരിറ്റി കാലാവധി എത്തും മുമ്പ് തന്നെ പിപിഎഫ് അക്കൗണ്ട് അവസാനിപ്പിക്കാം.

ചില നിബന്ധനകള്‍ക്ക് അനുസൃതമായി പിപിഎഫ് അക്കൗണ്ട് ഉടമയ്ക്ക് അക്കൗണ്ട് അവസാനിപ്പിക്കാമെന്ന് പിപിഎഫ് പിന്‍വലിക്കല്‍ നിയമം പറയുന്നു. എന്നാല്‍ അക്കൗണ്ട് ആരംഭിച്ച് 5 സാമ്പത്തിക വര്‍ഷങ്ങള്‍ പൂര്‍ത്തിയാകണം എന്ന കര്‍ശന നിബന്ധനയുണ്ട്.

അക്കൗണ്ട് ഉടമയുടെ പങ്കാളിയോ, മാതാപിതാക്കളോ, കുട്ടികളോ ഗുരുതര രോഗ ബാധിതരായി ചികിത്സ ആവശ്യമുണ്ട് എങ്കില്‍ അക്കൗണ്ട് ഉടമയ്ക്ക് മുഴുവന്‍ തുകയും പിന്‍വലിക്കാവുന്നതാണ്. അക്കൗണ്ട് ഉടമയ്‌ക്കോ കുട്ടികള്‍ക്കോ ഉന്നത വിദ്യാഭ്യാസത്തിനായി പണം ആവശ്യമെങ്കിലും പിപിഎഫില്‍ നിന്നും തുക പിന്‍വലിക്കാവുന്നതാണ്. കൂടാതെ താമസ സ്ഥലം മാറുമ്പോഴും അക്കൗണ്ട് അവസാനിപ്പിക്കാവുന്നതാണ്.

പിപിഎഫ് അക്കൗണ്ട് ഉടമയുടെ മരണം സംഭവിച്ചാല്‍ നോമിനിയ്ക്ക് മുഴുവന്‍ തുകയും പിന്‍വലിക്കുവാന്‍ സാധിക്കും. അക്കൗണ്ട് ആരംഭിച്ച് 5 വര്‍ഷം പൂര്‍ത്തിയായില്ലെങ്കിലും ഈ തുക പിന്‍വലിക്കുവാന്‍ സാധിക്കും.

കാലാവധി എത്തും മുമ്പ് പിപിഎഫ് അക്കൗണ്ട് പിന്‍വലിച്ചാല്‍ 1 ശതമാനം കുറഞ്ഞ പലിശ നിരക്ക് മാത്രമേ നിക്ഷേപകന് ലഭിക്കുകയുള്ളൂ. കൂടാതെ 5 വര്‍ഷം പൂര്‍ത്തിയാകാതെ നിക്ഷേപം പിന്‍വലിക്കുവാനും സാധിക്കുകയില്ല. ഉദാഹരണത്തിന് 2020 ജൂണ്‍ 1ന് പിപിഎഫ് അക്കൗണ്ട് ആരംഭിച്ചു എന്ന് കരുതുക. നിക്ഷേപ കാലാവധി എത്തും മുമ്പുള്ള പിന്‍വലിക്കല്‍ സാധ്യമാകുക 2026 ഏപ്രില്‍ 1 മുതലായിരിക്കും.

മെച്വൂരിറ്റി കാലയളവിന് മുമ്പ് പിപിഎഫ് അക്കൗണ്ട് അവസാനിപ്പിക്കുമ്പോള്‍ നാല് നിബന്ധനകളാണുള്ളത്

1. പിപിഎഫ് അക്കൗണ്ട് ഉടമയുടെ മരണം
2. പിപിഎഫ് അക്കൗണ്ട് ഉടമയുടെ താമസം മാറുന്നത്
3. പിപിഎഫ് അക്കൗണ്ട് ഉടമയുടെ പങ്കാളിയ്‌ക്കോ കുട്ടികള്‍ക്കോ മാതാപിതാക്കള്‍ക്കോ ഉള്ള ഗുരുതരമായ രോഗബാധ
4. പിപിഎഫ് അക്കൗണ്ട് ഉടമയുടേയോ കുട്ടികളുടേയോ ഉന്നത പഠനം

ഇതില്‍ ആദ്യത്തെ നിബന്ധന ഒഴികെ ബാക്കി 3 നിബന്ധനകളില്‍ പണം പിന്‍വലിക്കണമെങ്കില്‍ പിപിഎഫ് അക്കൗണ്ട് 5 സാമ്പത്തിക വര്‍ഷങ്ങള്‍ പൂര്‍ത്തിയാക്കേണ്ടതുണ്ട്.