കയ്യിൽ 500 രൂപയുണ്ടോ, നേടാം 41 ലക്ഷം രൂപ വരെ...

നിങ്ങളുടെ കയ്യിൽ അധിക പണം ഉണ്ടെങ്കിൽ വിവേകത്തോടെ നിക്ഷേപിക്കണം. അതുവഴി നിങ്ങൾക്ക് ഭാവിജീവിതം സുരക്ഷിതമാക്കാം. വ്യത്യസ്ത നിക്ഷേപങ്ങൾ വഴി നിങ്ങൾക്ക് പണപ്പെരുപ്പത്തിൽ നിന്ന് രക്ഷപ്പെടാനും വരുമാനം വർദ്ധിപ്പിക്കാനും സാധിക്കും. കയ്യിലുള്ള അധിക പണം എങ്ങനെ നിക്ഷേപിക്കണമെന്ന് നിങ്ങൾക്ക് സംശയം ഉണ്ടോ .....എങ്കിൽ ചില ജനപ്രിയ നിക്ഷേപ മാർഗങ്ങൾ പരിചയപ്പെടാം.

1.പബ്ലിക് പ്രൊവിഡന്റ് ഫണ്ട്

ഗ്യാരണ്ടീഡ് റിട്ടേൺ പ്രദാനം ചെയ്യുന്നതും വിപണിയിലെ ചാഞ്ചാട്ടങ്ങളെ സ്വാധീനിക്കാത്തതുമായ സർക്കാർ പിന്തുണയുള്ള ദീർഘകാല നിക്ഷേപ മാർഗമാണ് പബ്ലിക് പ്രൊവിഡന്റ് ഫണ്ട് അഥവാ പിപിഎഫ്. 100% ഗ്യാരണ്ടിയുള്ള ചെറുകിട സമ്പാദ്യ പദ്ധതി കൂടിയാണ് പബ്ലിക് പ്രൊവിഡന്റ് ഫണ്ട്. PPF അക്കൗണ്ടിന്റെ നിലവിലെ പലിശ നിരക്ക് 7.1% ആണ്, ഇന്ത്യയിലെ മറ്റേതൊരു സേവിംഗ്സ് സ്കീമിനും ലഭിക്കുന്ന പലിശയേക്കാൾ കൂടുതലാണ്. ഉയർന്ന നികുതി സ്ലാബിന് 10 ശതമാനത്തിലധികം നികുതി റിട്ടേൺ നൽകുന്നു.

പിപിഎഫ് നിക്ഷേപ പദ്ധതിയിൽ നിക്ഷേപിക്കുന്നതിന്റെ മറ്റൊരു പ്രധാന നേട്ടം അത് വാഗ്ദാനം ചെയ്യുന്ന നികുതി ആനുകൂല്യങ്ങളാണ്.പിപിഎഫ് വരിക്കാരന് 100 രൂപ വരെ ക്ലെയിം ചെയ്യാം.1961ലെ ആദായനികുതി നിയമത്തിലെ സെക്ഷൻ 80C പ്രകാരം ഒരു സാമ്പത്തിക വർഷത്തിൽ നടത്തിയ നിക്ഷേപങ്ങൾക്ക് 1.5 ലക്ഷം നികുതിയിളവ് ആനുകൂല്യങ്ങൾ ലഭിക്കും.കൂടാതെ, വരിക്കാരൻ നേടുന്ന പലിശയും നികുതിയിൽ നിന്ന് ഒഴിവാക്കിയിട്ടുണ്ട്.

നിങ്ങൾ ഓരോ വർഷവും 1.5 ലക്ഷം രൂപ നിക്ഷേപിക്കുന്നതിലൂടെ 15 വർഷത്തിനുള്ളിൽ 40.68 ലക്ഷം രൂപ സമ്പാദിക്കാം. അതായത് പലിശ നിരക്ക് 7.1 ശതമാനം.

പി പി എഫിൽ നിക്ഷേപിക്കുന്നതിന്റെ മറ്റൊരു ഗുണം 15 വർഷത്തിനു ശേഷവും നിങ്ങൾക്ക് അക്കൗണ്ട് കൈകാര്യം ചെയ്യാം എന്നുള്ളതാണ് .

15 വർഷത്തെ മാർക്കിൽ എത്തിക്കഴിഞ്ഞാൽ, മെച്യൂരിറ്റി വാല്യു കൂടുതൽ വിപുലീകരണമില്ലാതെ സംരക്ഷിക്കപ്പെടും, എന്നാൽ അക്കൗണ്ടിലേക്ക് അധിക നിക്ഷേപം അനുവദിക്കില്ല. നിങ്ങൾ ഇത് 5 വർഷത്തേക്ക് കൂടി നീട്ടാൻ ആഗ്രഹിക്കുന്നുവെങ്കിൽ, കാലാവധി പൂർത്തിയാകുമ്പോൾ ഒരു വർഷത്തിനുള്ളിൽ നിങ്ങൾ ഒരു പുതുക്കൽ അഭ്യർത്ഥന സമർപ്പിക്കണം.

പിപിഎഫ് അക്കൗണ്ടുകൾ എടുക്കുമ്പോൾ ചില കാര്യങ്ങൾ പ്രത്യേകം ശ്രദ്ധിക്കണം. നിങ്ങൾക്ക് പിപിഎഫ് വഴി ഒന്നര ലക്ഷം രൂപ മാത്രമേ ലാഭിക്കാൻ കഴിയൂ. ഉയർന്ന തുക സമ്പാദിക്കണം എങ്കിൽ മറ്റ് സ്ഥിര വരുമാന മാർഗ്ഗങ്ങൾ കണ്ടെത്തണം. 5 രൂപ ഉപയോഗിച്ച് നിങ്ങൾക്ക് ഒരു അക്കൗണ്ട് തുറക്കാൻ കഴിയുമെങ്കിലും, അക്കൗണ്ട് സജീവമായി നിലനിർത്താൻ ഓരോ സാമ്പത്തിക വർഷത്തിലും നിങ്ങൾ കുറഞ്ഞത് 500 രൂപ നിക്ഷേപിക്കണം. അക്കൗണ്ട് തുറന്നതിന് ശേഷം 7-ാം വർഷം മുതൽ എല്ലാ വർഷവും പിൻവലിക്കലുകൾ അനുവദിക്കുന്ന ലിക്വിഡിറ്റി ഓപ്ഷനുകളും അക്കൗണ്ട് വാഗ്ദാനം ചെയ്യുന്നു. കൂടാതെ, മൂന്നാം വർഷം മുതൽ വായ്പാ സൗകര്യം നിങ്ങൾക്ക് ലഭിക്കും.

2. വോളണ്ടറി പ്രൊവിഡന്റ് ഫണ്ട്

വോളണ്ടറി പ്രൊവിഡന്റ് ഫണ്ട് അഥവാ വി.പി.എഫ് ഒരു ദീർഘകാല നിക്ഷേപ പദ്യതിയാണ്. കുറഞ്ഞ അപകടസാധ്യതയുള്ള മികച്ച പദ്ധതി. വോളണ്ടറി പ്രൊവിഡന്റ് ഫണ്ട് പ്രോഗ്രാമിന് കീഴിൽ ജീവനക്കാർക്ക് അവരുടെ പ്രൊവിഡന്റ് ഫണ്ട് അക്കൗണ്ടിലേക്ക് സ്വമേധയാ പണം നൽകാൻ അനുവാദമുണ്ട്. അതായത് ഓരോ മാസവും, നിങ്ങളുടെ തൊഴിലുടമ നിങ്ങളുടെ അടിസ്ഥാന ശമ്പളത്തിൽ നിന്ന് ക്ഷാമബത്ത ഉൾപ്പെടെ നിർബന്ധമായും 12 ശതമാനം കുറയ്ക്കുകയും അത് എംപ്ലോയീസ് പ്രൊവിഡന്റ് ഫണ്ടിലേക്ക് (ഇപിഎഫ്) നൽകുകയും ചെയ്യുന്നു. എന്നാൽ ഇതിൽ കൂടുതൽ തുക നിങ്ങൾക്ക് നൽകാം.

വോളണ്ടറി പ്രൊവിഡന്റ് ഫണ്ട് നിയമങ്ങൾ അനുസരിച്ച്, ഒരു വ്യക്തിക്ക് വരുമാനത്തിന്റെ 100% ഒരു ഇപിഎഫ് അക്കൗണ്ടിലേക്ക് ഒരു വോളണ്ടറി പ്രൊവിഡന്റ് ഫണ്ടായി സംഭാവന ചെയ്യാൻ തിരഞ്ഞെടുക്കാം. എന്നിരുന്നാലും, വോളണ്ടറി പ്രൊവിഡന്റ് ഫണ്ടിന്‍റെ കാര്യത്തിൽ, ഒരു തൊഴിലുടമ നിർബന്ധമായും അധിക തുക സംഭാവന ചെയ്യാൻ ബാധ്യസ്ഥനല്ല. പക്ഷേ, ഒരു തൊഴിലുടമയ്ക്ക് കൂടുതൽ സംഭാവനകൾ നൽകാൻ തിരഞ്ഞെടുക്കാo

3. നാഷണൽ പെൻഷൻ സിസ്റ്റം

ഇന്ത്യയിലെ എല്ലാ പൗരന്മാർക്കും വിരമിക്കൽ ആനുകൂല്യങ്ങൾ നൽകുകയെന്ന ലക്ഷ്യത്തോടെ ഇന്ത്യാ ഗവൺമെന്റ് ഏറ്റെടുത്തിട്ടുള്ള ഒരു സംരംഭമാണ് നാഷണൽ പെൻഷൻ സിസ്റ്റം. എൻപിഎസ് പൗരന്മാർക്കിടയിൽ റിട്ടയർമെന്റിനായി സമ്പാദിക്കുന്ന ശീലം വളർത്തിയെടുക്കാൻ ശ്രമിക്കുന്നു.

18നും 70-നും ഇടയില്‍ പ്രായമുള്ള ഏതൊരു ഇന്ത്യന്‍ പൗരനും എന്‍.ആര്‍.ഐകൾക്കും എന്‍പിഎസില്‍ അക്കൗണ്ട് തുറക്കാന്‍ അര്‍ഹതയുണ്ട്. എന്‍പിഎസ് അക്കൗണ്ട് തുറക്കുന്ന ഒരു വ്യക്തിക്ക് ഒരു പെര്‍മനന്റ് റിട്ടയര്‍മെന്റ് അക്കൗണ്ട് നമ്പര്‍ (PRAN) ലഭിക്കും. തങ്ങളുടെ പിആര്‍എഎന്‍ ഉപയോഗിച്ച്, ഉപഭോക്താക്കള്‍ക്ക് ഒരു ടിയര്‍-I അക്കൗണ്ട് തിരഞ്ഞെടുക്കാവുന്നതാണ്.

ടിയര്‍-1 അക്കൗണ്ട് പിന്‍വലിക്കാന്‍ കഴിയാത്ത സ്ഥിരമായ റിട്ടയര്‍മെന്റ് അക്കൗണ്ടാണ്. തിരഞ്ഞെടുത്ത ഫണ്ട് മാനേജരെ അടിസ്ഥാനമാക്കി ഉപഭോക്താവിന്റെ സംഭാവനകള്‍ ക്രെഡിറ്റ് ചെയ്യപ്പെടുന്നു. അക്കൗണ്ട് തുറക്കുന്നതിനുള്ള ഏറ്റവും കുറഞ്ഞ നിക്ഷേപ തുക 500 രൂപയാണ്.

സജീവമായിട്ടുള്ള ഒരു ടിയര്‍-I അക്കൗണ്ട് ഉണ്ടെങ്കില്‍ മാത്രമേ ടിയര്‍-II അക്കൗണ്ട് എടുക്കാന്‍ സാധിക്കു. അതേസമയം, ടിയര്‍-II അക്കൗണ്ട് ഉടമയുടെ ആവശ്യങ്ങള്‍ക്കനുസരിച്ച് പിന്‍വലിക്കലുകള്‍ അനുവദിക്കുന്നുണ്ട്. ഇതില്‍ അക്കൗണ്ട് തുറക്കുന്നതിനായുളള ഏറ്റവും കുറഞ്ഞ തുക 1,000 രൂപയാണ്.