പി.പി.എഫ് vs സുകന്യ സമൃദ്ധി യോജന: 1.5 ലക്ഷം നിക്ഷേപിച്ചാൽ ഏത് സ്കീമിലൂടെ ഉയർന്ന ലാഭം കിട്ടും?

സുരക്ഷിതമായ സാമ്പത്തിക ഭാവി ആ​ഗ്രഹിക്കുന്നവർ നിങ്ങളുടെ സ്കീം തിരഞ്ഞെടുക്കുമ്പോൾ ശ്രദ്ധിക്കേണ്ടതുണ്ട്. എവിടെ നിക്ഷേപിക്കണമെന്ന ആശയക്കുഴപ്പം ഇപ്പോഴും ഉണ്ടോ? സുരക്ഷിതമായി നിക്ഷേപിക്കാവുന്ന മികച്ച രണ്ട് സ്കീമുകളാണ് സുകന്യ സമൃദ്ധി യോജന (SSY), പബ്ലിക് പ്രൊവിഡൻ്റ് ഫണ്ട് (PPF) എന്നിവ. ഇവ രണ്ടും ഇന്ത്യയിലെ ഏറ്റവും ജനപ്രിയവും വിശ്വസനീയവുമായ നിക്ഷേപ ഓപ്ഷനുകളിൽ ഒന്നാണ്. മാത്രമല്ല ഇതിലൂടെ നിങ്ങൾക്ക് ആകർഷകമാണ് പലിശ നിരക്കും ഉറപ്പാക്കാം.

മികച്ച പലിശക്കൊപ്പം നികുതി ആനുകൂല്യങ്ങളും വാഗ്ദാനം ചെയ്യുന്നു. ഈ രണ്ട് നിക്ഷേപങ്ങളും ദീർഘകാല നിക്ഷേപങ്ങളാണ്. അതിനാൽ കാലാവധി പൂർത്തിയാവുമ്പോൾ വമ്പൻ നേട്ടം ഉറപ്പാണ്. 15 വർഷത്തേക്ക് ഈ രണ്ട് സ്കീമിലും 1.5 ലക്ഷം രൂപ നിക്ഷേപിച്ചാൽ വലിയ കോർപ്പസ് സൃഷ്ടിക്കുന്നത് ഏത് സ്കീമായിരിക്കും?

സുകന്യ സമൃദ്ധി യോജന (SSY)

പെൺകുട്ടികൾക്കു വേണ്ടി ആരംഭിച്ച സ്കീമാണിത്. ഏറ്റവും കുറഞ്ഞത് 250 രൂപയും പരമാവധി 1.5 ലക്ഷം രൂപയുമാണ് ഇവിടെ നിക്ഷേപിക്കാൻ അനുവദിക്കുന്നത്. 10 വയസുവരെയുള്ള പെൺകുട്ടികൾക്ക് മാത്രമേ ഇവിടെ അക്കൗണ്ട് തുറക്കാൻ സാധിക്കൂ. പ്രായപൂർത്തിയാകാത്തതിനാൽ കുട്ടിയുടെ മാതാപിതാക്കൾക്ക് കുട്ടിയുടെ പേരിൽ അക്കൗണ്ട് തുറക്കാം.

സെക്ഷൻ 80 സി പ്രകാരം സുകന്യ സമൃദ്ധി യോജനയിൽ നികുതി ആനുകൂല്യങ്ങൾ വാഗ്ദാനം ചെയ്യുന്നു. മാത്രമല്ല സെക്ഷൻ 10 പ്രകാരം പലിശയും നികുതി രഹിതമാണ്. അക്കൗണ്ടിന്റെ മെച്യൂരിറ്റി കാലയളവ് 21 വർഷമാണ്. എന്നാൽ നിക്ഷേപ കാലാവധി 15 വർഷമാണ്. 8.2% എന്ന നിരക്കിലാണ് പലിശ വാ​ഗ്ദാനം ചെയ്യുന്നത്.

15 വർഷത്തേക്ക് നിക്ഷേപിച്ചാൽ എത്ര രൂപ കോർപ്പസ്?

21 വർഷമാണ് സുകന്യ സമൃദ്ധി യോജനയുടെ മെച്യൂരിറ്റി കാലാവധി. എന്നാൽ 15 വർഷത്തേക്ക് പ്രതിവർഷം 1.5 ലക്ഷം രൂപ നിക്ഷേപിച്ചാൽ;

21 വർഷത്തെ കാലാവധിയുടെ മൂല്യം: 69,27,578 രൂപ
മൊത്തം നിക്ഷേപം: 22,50,000 രൂപ
മൊത്തം പലിശ: 46,77,578 രൂപ

പബ്ലിക് പ്രൊവിഡൻ്റ് ഫണ്ട് (പി.പി.എഫ്)

പബ്ലിക് പ്രൊവിഡൻ്റ് ഫണ്ട് ഒരു മികച്ച റിട്ടയർമെൻ്റ് ഫണ്ടാണ്. നിക്ഷേപകർക്ക് ഒറ്റത്തവണയായോ മാസത്തവണകളായോ നിക്ഷേപിക്കാൻ സാധിക്കും. ഏറ്റവും കുറഞ്ഞ നിക്ഷേപം 500 രൂപയാണ്. ഇവിടെ ജോയിന്റ് അക്കൗണ്ടുകൾ ആരംഭിക്കാൻ സാധിക്കില്ല. 15 വർഷം വരെയാണ് ഈ സ്കീമിന്റെ കാലാവധി. ആവശ്യമെങ്കിൽ 5 വർഷത്തേക്ക് കൂടെ നീട്ടാൻ സാധിക്കും. പി.പി.എഫും നികുതി ആനുകൂല്യങ്ങൾ വാഗ്ദാനം ചെയ്യുന്നു. 7.1% എന്ന നിരക്കിലാണ് പി.പി.എഫിൽ പലിശ വാ​ഗ്ദാനം ചെയ്യുന്നത്.

15 വർഷത്തിനുള്ളിൽ മെച്യൂരിറ്റി തുക

15 വർഷത്തേക്ക് പ്രതിവർഷം 1.5 ലക്ഷം രൂപ നിക്ഷേപിച്ചാൽ മൊത്തം നിക്ഷേപ തുക 22,50,000 രൂപയാവും. എങ്കിൽ കാലാവധി പൂർത്തിയാവുമ്പോൾ ലഭിക്കുന്ന മൊത്തം തുക 40,68,209 രൂപയാകും. അതായത് നിങ്ങൾക്ക് ലഭിക്കുന്ന പലിശ 18,18,209 രൂപ ലഭിക്കും.

സുകന്യ സമൃദ്ധി യോജനയും, പബ്ലിക് പ്രൊവിഡൻ്റ് ഫണ്ടും മികച്ച ദീർഘകാല നിക്ഷേപങ്ങളാണ്. എന്നാൽ കണക്ക് പ്രകാരം 15 വർഷത്തിനുള്ളിൽ 1.5 ലക്ഷം രൂപയുടെ വാർഷിക നിക്ഷേപത്തിലൂടെ കുറച്ചധികം കോർപ്പസ് വരുന്നത് സുകന്യ സമൃദ്ധി യോജനക്കാണ്. ഇതിനു കാരണം പലിശ നിരക്കിലെ വ്യത്യാസമാണ്. സുകന്യ സമൃദ്ധി യോജനക്കാണ് പി.പി.എഫിനേക്കാൾ പലിശ കൂടുതൽ. എന്നാൽ രണ്ട് സ്കീമുകളും വ്യത്യസ്ത സ്വഭാവമുള്ള നിക്ഷേപങ്ങളാണ് എന്ന കാര്യം മറക്കാതിരിക്കുക.