ഒരു വർഷത്തെ എഫ്ഡിയ്ക്ക് 7% പലിശ വാഗ്ദാനം ചെയ്യുന്ന സ്വകാര്യ ബാങ്കുകൾ

നിരവധി നിക്ഷേപകർ ഹ്രസ്വകാല ലക്ഷ്യങ്ങൾക്കായി സ്ഥിര നിക്ഷേപങ്ങളാണ് (എഫ്ഡി) ഇഷ്ടപ്പെടുന്നത്. കാരണം അവ സുരക്ഷിതവും വരുമാനം ഉറപ്പുനൽകുകയും ചെയ്യുന്നു. എന്നാൽ, എഫ്ഡിയുടെ പലിശ നിരക്ക് കഴിഞ്ഞ ഒരു വർഷത്തിനിടെ കുത്തനെ കുറഞ്ഞു. കഴിഞ്ഞ ഒരു വർഷമായി റിസർവ് ബാങ്ക് (ആർ‌ബി‌ഐ) റിപ്പോ നിരക്കുകൾ ക്രമാനുഗതമായി വെട്ടിക്കുറച്ചതാണ് ഇതിന് കാരണം. ബാങ്കുകളും ഇതേ പാത പിന്തുടരുകയും സ്ഥിര നിക്ഷേപത്തിന്റെ പലിശനിരക്ക് കാലാവധിയികളിലുടനീളം കുറയ്ക്കുകയും ചെയ്തു.

ബാങ്കുകൾ

എന്നിരുന്നാലും, ബാങ്ക്ബസാർ സമാഹരിച്ച കണക്കുകൾ പ്രകാരം ഒരു വർഷത്തെ എഫ്ഡിയിൽ 7 ശതമാനം വരെ പലിശനിരക്ക് വാഗ്ദാനം ചെയ്യുന്ന ചില ബാങ്കുകൾ ഇപ്പോഴും ഉണ്ട്. അവ ഏതൊക്കെയാണെന്ന് നോക്കാം.

• ഇൻഡസിൻഡ് ബാങ്ക് - 7%
• ആർബിഎൽ ബാങ്ക് - 7%
• ഐഡിഎഫ്സി ബാങ്ക് - 6.75%
• യെസ് ബാങ്ക് - 6.75%
• ഡിസിബി ബാങ്ക് - 6.5%
• ഉജ്ജീവൻ സ്മോൾ ഫിനാൻസ് ബാങ്ക് - 6.5%
• സ്റ്റാൻഡേർഡ് ചാർട്ടേഡ് - 6.30%
• എയു സ്മോൾ ഫിനാൻസ് ബാങ്ക് - 6%

ഉയർന്ന പലിശ നിരക്ക്

അഞ്ച് സ്വകാര്യമേഖല ബാങ്കുകളും രണ്ട് ചെറുകിട ധനകാര്യ ബാങ്കുകളുമാണ് ഒരു വർഷത്തെ കാലാവധിക്ക് ആറ് ശതമാനമോ അതിൽ കൂടുതലോ നിരക്കിൽ പലിശ വാഗ്ദാനം ചെയ്യുന്നത്. ഇൻഡസ് ഇൻ‌ഡ് ബാങ്ക്, ആർ‌ബി‌എൽ ബാങ്ക്, ഐ‌ഡി‌എഫ്‌സി ഫസ്റ്റ് ബാങ്ക്, യെസ് ബാങ്ക്, ഡി‌സി‌ബി ബാങ്ക് എന്നിവ അവരുടെ ഒരു വർഷത്തെ എഫ്ഡിക്ക് 6.5-7 ശതമാനം പലിശ വാഗ്ദാനം ചെയ്യുന്നു. ചെറുകിട ധനകാര്യ ബാങ്കുകളായ ഉജ്ജിവൻ സ്മോൾ ഫിനാൻസ് ബാങ്ക്, എ‌യു സ്‌മോൾ ഫിനാൻസ് ബാങ്ക് യഥാക്രമം 6.5 ശതമാനവും 6 ശതമാനവും ഉയർന്ന നിരക്കാണ് വാഗ്ദാനം ചെയ്യുന്നത്.

മറ്റ് ബാങ്കുകൾ

ആക്സിസ് ബാങ്ക്, എച്ച്ഡിഎഫ്സി ബാങ്ക്, ഐസിഐസിഐ ബാങ്ക് എന്നിവ യഥാക്രമം 5.45 ശതമാനം, 5.10 ശതമാനം, അഞ്ച് ശതമാനം എന്നിങ്ങനെയാണ് പലിശ വാഗ്ദാനം ചെയ്യുന്നത്. ഒസ്റ്റേറ്റ് ബാങ്ക് ഓഫ് ഇന്ത്യ (എസ്‌ബി‌ഐ), ബാങ്ക് ഓഫ് ബറോഡ (ബോബ്) എന്നിവയാണ് ഏറ്റവും മികച്ച പലിശ നൽകുന്ന രണ്ട് പൊതുമേഖലാ ബാങ്കുകൾ. ഇവ 5.10 ശതമാനം പലിശ നൽകുന്നു.

നിക്ഷേപ തുക

റിസർവ് ബാങ്കിന്റെ അനുബന്ധ സ്ഥാപനമായ ഡെപ്പോസിറ്റ് ഇൻഷുറൻസ് ആൻഡ് ക്രെഡിറ്റ് ഗ്യാരണ്ടി കോർപ്പറേഷൻ (ഡിഐസിജിസി) 5 ലക്ഷം രൂപ വരെ സ്ഥിര നിക്ഷേപത്തിൽ നിക്ഷേപം ഉറപ്പ് നൽകുന്നു. ഏറ്റവും കുറഞ്ഞ നിക്ഷേപ തുക ബാങ്കുകളിലുടനീളം വ്യത്യാസപ്പെടുന്നു. ഒരു വർഷത്തെ എഫ്ഡിയുടെ കുറഞ്ഞ നിക്ഷേപ തുക 100 രൂപ മുതൽ 10,000 രൂപ വരെയാണ്.