5000 രൂപയുണ്ടോ? എങ്കിൽ നേടാം 26 ലക്ഷം രൂപ വരെ... സുരക്ഷിതമായ വഴി ഇതാ

ലഘു സമ്പാദ്യ ശീലം നല്ലതാണ്. ഭാവിജീവിതം ലളിതമാക്കാനും സാമ്പത്തിക അടിത്തറ ഉണ്ടാക്കാനും സമ്പാദ്യ ശീലം സഹായകരമാകും. ജനങ്ങളുടെ ലഘുസമ്പാദ്യശീലം പ്രോത്സാഹിപ്പിക്കുന്നതിന് വേണ്ടിയാണ് കേന്ദ്രസര്‍ക്കാര്‍ പബ്ലിക് പ്രോവിഡന്റ് ഫണ്ട് പദ്ധതി ആരംഭിച്ചത്. ഇത് നിക്ഷേപകരെ റിട്ടയർമെന്റിന് ശേഷമുള്ള കാലയളവിലേയ്ക്ക് ഒരു നിശ്ചിത തുക സമ്പാദിക്കാൻ സഹായിക്കുന്നു. ഇതില്‍ നിക്ഷേപിക്കുന്നവര്‍ക്ക് നികുതി ഇളവ് ലഭിക്കുമെന്നതിനാല്‍ ഈ ഉദ്ദേശത്തോടെ നിക്ഷേപം നടത്തുന്നവരും കുറവല്ല.

പിപിഎഫ് പദ്ധതിയുടെ കാലാവധി 15 വർഷമാണ്. എന്നാൽ കാലാവധി പൂർത്തിയായതിന് ശേഷവും നിരവധി ആനുകൂല്യങ്ങൾ നേടാം. മെച്യൂരിറ്റിക്ക് ശേഷം പിപിഎഫ് അക്കൗണ്ടിൽ പണം നിക്ഷേപിക്കുന്നത് നിർത്തിയാൽ പോലും പലിശ ലഭിക്കും എന്നതാണ് പദ്ധതിയുടെ ഏറ്റവും വലിയ നേട്ടങ്ങളിലൊന്ന്. അതായത് 15 വർഷത്തിന് ശേഷവും അക്കൗണ്ട് ക്ലോസ് ചെയ്യാൻ താൽപ്പര്യമില്ലെങ്കിൽ തുടർന്നുള്ള വർഷങ്ങളിൽ നിക്ഷേപം നടത്താതെ തന്നെ അക്കൌണ്ട് സജീവമായി നിലനിർത്താം. ഈ സാഹചര്യത്തിൽ, അക്കൗണ്ട് ക്ലോസ് ചെയ്യുന്നതു വരെ നിക്ഷേപത്തിന്റെ പലിശ ലഭിക്കുകയും ചെയ്യും. 15 വർഷത്തെ മെച്യൂരിറ്റി കാലയളവിന് ശേഷം പണം പിൻവലിക്കുന്നതിനും നിലനിർത്തുന്നതിനോ മൂന്ന് രീതികൾ ഉണ്ട്. അവ ഏതൊക്കെ എന്ന് നോക്കാം.

1.കാലാവധി പൂർത്തിയാകുമ്പോൾ പിപിഎഫ് പിൻവലിക്കൽ

കാലാവധി പൂർത്തിയാകുമ്പോൾ പിപിഎഫ് അക്കൗണ്ടിൽ നിക്ഷേപിച്ച തുകയും അതിന് ലഭിച്ച പലിശയും പിൻവലിക്കുക. അക്കൗണ്ട് ക്ലോസ് ചെയ്യുകയാണെങ്കിൽ, മുഴുവൻ പണവും ബാങ്ക് അക്കൗണ്ടിലേക്ക് ട്രാൻസ്ഫർ ചെയ്യാം. പിൻവലിച്ച പണവും ലഭിക്കുന്ന പലിശയും പൂർണമായും നികുതി രഹിതമാണ്.

2. 15 വർഷത്തിനു ശേഷവും നിക്ഷേപം തുടരുക

അക്കൗണ്ട് ഉടമയ്ക്ക് നിക്ഷേപ കാലാവധി പൂർത്തിയായാൽ അക്കൗണ്ട് സജീവമായി നിലനിർത്താൻ താൽപ്പര്യമുണ്ടെങ്കിൽ, അഞ്ച് വർഷത്തേയ്ക്ക് നിക്ഷേപം വിപുലീകരിക്കാം. പക്ഷേ, പിപിഎഫ് അക്കൗണ്ട് കാലാവധി പൂർത്തിയാകുന്നതിന് 1 വർഷം മുമ്പ് വിപുലീകരണത്തിന് അപേക്ഷിക്കണം.

3. നിക്ഷേപമില്ലാതെ അക്കൗണ്ട് പ്രവർത്തനക്ഷമമാക്കുക

പിവിഎഫ് അക്കൗണ്ടിന്റെ ഏറ്റവും വലിയ നേട്ടം, മുകളിൽ പറഞ്ഞ രണ്ട് ഓപ്ഷനുകളിൽ ഒന്ന് തിരഞ്ഞെടുത്തില്ലെങ്കിലും, കാലാവധി പൂർത്തിയാകുമ്പോൾ അക്കൗണ്ട് തുടർന്നും പ്രവർത്തിക്കും എന്നതാണ്. പണം നിക്ഷേപിച്ചില്ലെങ്കിലും, മെച്യൂരിറ്റി സ്വയമേവ 5 വർഷം നീട്ടും, കൂടാതെ അതിൽ പലിശയും ലഭിക്കുന്നു.

അക്കൗണ്ട് തുടങ്ങുന്നത് എങ്ങനെ?

ഏതൊരു ഇന്ത്യൻ പൗരനും നിക്ഷേപം നടത്താൻ സാധിക്കുന്ന പദ്ധതിയാണ് പബ്ലിക് പ്രൊവിഡന്റ് ഫണ്ട് (പി പി എഫ്). പ്രധാനപ്പെട്ട ഒരു ബാങ്കിലോ പോസ്റ്റ് ഓഫീസിലോ അക്കൗണ്ട് തുടങ്ങുന്നതിലൂടെ നിങ്ങൾക്ക് ഈ പദ്ധതിയുടെ ഭാഗമായി പണം നിക്ഷേപിക്കാൻ കഴിയും. ഓണ്‍ലൈനായും പി പി എഫ് അക്കൗണ്ട് തുറക്കാം. ഇതിനായി ബാങ്കിന്റെ നെറ്റ് ബാങ്കിംഗ് പ്ലാറ്റ്‌ഫോമിൽ ലോഗ് ഇന്‍ ചെയ്ത് പി പി എഫ് അക്കൗണ്ട് ആരംഭിക്കുവാനുള്ള ഓപ്ഷന്‍ തെരഞ്ഞെടുക്കാം.

പലിശ നിരക്ക്

വിപണിയുടെ സ്ഥിതിഗതികൾ വിലയിരുത്തി ഓരോ പാദത്തിലും പബ്ലിക് പ്രൊവിഡന്റ് ഫണ്ടിലേക്കുള്ള പലിശ എത്രയെന്ന് കേന്ദ്ര സർക്കാർ തീരുമാനിക്കും. നിലവിൽ 7.1 ശതമാനമാണ് പലിശ നിരക്ക്.  പി പി എഫ് അക്കൗണ്ട് ഉടമയ്ക്ക് പ്രതിവർഷം ഒറ്റത്തവണയായോ അല്ലെങ്കിൽ പരമാവധി പന്ത്രണ്ട് തവണകളായോ പണം നിക്ഷേപിക്കാൻ കഴിയും.

പിപിഎഫ് കാൽക്കുലേറ്റർ

പ്രതിമാസം 1000 രൂപ പ്രോവിഡന്റ് ഫണ്ട് അക്കൗണ്ടിൽ നിക്ഷേപിച്ചാൽ 15 വർഷം കൊണ്ട് 3.35 ലക്ഷം രൂപ ലാഭം നേടാം. അത് 20 വർഷമാണെങ്കിൽ 5.32 ലക്ഷം രൂപയാകും.

പ്രതിമാസം 2000 രൂപ പ്രോവിഡന്റ് ഫണ്ട് അക്കൗണ്ടിൽ നിക്ഷേപിച്ചാൽ 15 വർഷം കൊണ്ട് 6.5 ലക്ഷം രൂപ ലാഭം നേടാം. അത് 20 വർഷമാണെങ്കിൽ 10.65 ലക്ഷം രൂപയാകും.

പ്രതിമാസം 5000 രൂപ പ്രോവിഡന്റ് ഫണ്ട് അക്കൗണ്ടിൽ നിക്ഷേപിച്ചാൽ 15 വർഷം കൊണ്ട് 16.27 ലക്ഷം രൂപ ലാഭം നേടാം. അത് 20 വർഷമാണെങ്കിൽ 26.63 ലക്ഷം രൂപയാകും.