3 വർഷത്തിൽ 30 ശതമാനത്തിലധികം റിട്ടേൺസ്; നേട്ടം കൊയ്യാൻ അഞ്ച് എസ്ഐപി നിക്ഷേപങ്ങൾ

ദീർഘകാലത്തേക്കുള്ള ഏറ്റവും മികച്ച നിക്ഷേപ രീതിയായാണ് കൂടുതൽ ആളുകളും സിസ്റ്റമാറ്റിക് ഇൻവെസ്റ്റ്മെന്റ് പ്ലാൻസ് അഥവ എസ്ഐപികളെ കാണുന്നത്. എന്നാൽ ഹ്രസ്വകാല സാമ്പത്തിക ലക്ഷ്യങ്ങൾക്കും ശരിയായ തിരഞ്ഞെടുപ്പാണ് എസ്ഐപികൾ. 30 ശതമാനത്തിലധികം റിട്ടേൺസ് വാഗ്ദാനം ചെയ്യുന്ന അഞ്ച് സ്മോൾ ക്യാപ് ഫണ്ടുകളാണ് നിലവിൽ വിപണിയിലുള്ളത്.

മ്യൂച്വൽ ഫണ്ടിൽ മൂന്ന് വർഷം പൂർത്തിയാക്കിയ ഏകദേശം 27 സ്മോൾ ക്യാപ് സ്കീമുകളാണുള്ളത്. എസിഇ എംഫിന്റെ കണക്കനുസരിച്ച് മൂന്ന് വർഷത്തിനുള്ളിൽ 30 ശതമാനം റിട്ടേൺസ് നൽകിയ സ്മോൾക്യാപ് ഫണ്ടുകളും അവയുടെ വിശദാംശങ്ങളുമാണ് ഈ ലേഖനത്തിൽ ഉൾക്കൊള്ളിച്ചിരിക്കുന്നത്.

1. ക്വന്റ് സ്മോൾ ക്യാപ് ഫണ്ട്: പട്ടികയിൽ മുൻനിരയിലുള്ളത് ക്വന്റ് സ്മോൾ ക്യാപ് ഫണ്ടാണ്. കഴിഞ്ഞ മൂന്ന് വർഷത്തിൽ 38.67 ശതമാനം റിട്ടേൺസാണ് ക്വന്റിൽ നിക്ഷേപം നടത്തിയവർക്ക് ലഭിച്ചത്. അതായത്, 10,000 രൂപയുടെ പ്രതിമാസ നിക്ഷേപം മൂന്ന് വർഷംകൊണ്ട് 6.13 ലക്ഷം രൂപയാകും.

2. ബന്ധൻ സ്മോൾ ക്യാപ് ഫണ്ട്: പട്ടികയിൽ രണ്ടാം സ്ഥാനത്തുള്ള ബന്ധൻ സ്മോൾ ക്യാപ് ഫണ്ടും 30 ശതമാനത്തിന് മുകളിലാണ് റിട്ടേൺസ് വാഗ്ദാനം ചെയ്യുന്നത്. കഴിഞ്ഞ മൂന്ന് വർഷത്തിനിടയിൽ ബന്ധൻ സ്മോൾ ക്യാപ് ഫണ്ടിൽ നിക്ഷേപിച്ചവർക്ക് 32.68 ശതമാനം റിട്ടേൺസ് ലഭിച്ചു. അതായത്, 10,000 രൂപയുടെ പ്രതിമാസ നിക്ഷേപം മൂന്ന് വർഷംകൊണ്ട് 5.68 ലക്ഷം രൂപയായിട്ടുണ്ടാകും.

3. ഫ്രാങ്ക്ലിൻ ഇന്ത്യ സ്മോളർ കമ്പനീസ് ഫണ്ട്: ബന്ധൻ സ്മോൾ ക്യാപ് ഫണ്ടിന് സമാനമായ റിട്ടേൺസാണ് ഫ്രാങ്ക്ലിൻ ഇന്ത്യ സ്മോളർ കമ്പനീസ് ഫണ്ടിൽ നിന്നും നിക്ഷേപകർക്ക് ലഭിക്കുന്നത്. മൂന്ന് വർഷത്തെ എസ്ഐപി നിക്ഷേപത്തിൽ നിന്ന് 32.62 ശതമാനം റിട്ടേൺസ് നേടാൻ ഇതുവഴി സാധിക്കും. 10,000 രൂപയുടെ പ്രതിമാസ നിക്ഷേപം മൂന്ന് വർഷംകൊണ്ട് 5.68 ലക്ഷം രൂപയാക്കാൻ പറ്റുന്നു.

4. നിപ്പോൺ ഇന്ത്യ സ്മോൾ ക്യാപ് ഫണ്ട്: കൈകാര്യം ചെയ്യുന്ന ആസ്തികളെ അടിസ്ഥാനമാക്കിയുള്ള വിഭാഗത്തിലെ ഏറ്റവും വലിയ സ്കീമായ നിപ്പോൺ ഇന്ത്യ സ്മോൾ ക്യാപ് ഫണ്ടും 30 ശതമാനത്തിലധികം റിട്ടേൺസ് വാഗ്ദാനം ചെയ്യുന്നു. മൂന്ന് വർഷത്തിൽ 32.52 ശതമാനം റിട്ടേൺസാണ് നിക്ഷേപകർക്ക് ലഭിച്ചത്. മൂന്ന് വർഷം മുമ്പ് ഒരു നിക്ഷേപകൻ 10,000 രൂപ പ്രതിമാസ എസ്ഐപി നടത്തിയാൽ, നിക്ഷേപത്തിന്റെ നിലവിലെ വിപണി മൂല്യം 5.67 ലക്ഷം രൂപയായിരിക്കും.

5. ഐടിഐ സ്മോൾ ക്യാപ് ഫണ്ട്: ഈ സ്മോൾക്യാപ് ഫണ്ട് കഴിഞ്ഞ മൂന്ന് വർഷങ്ങളിൽ SIP നിക്ഷേപങ്ങളിൽ 30.77 ശതമാനം റിട്ടേൺ നൽകി. മൂന്ന് വർഷം മുമ്പ് ഉണ്ടാക്കിയ 10,000 രൂപയുടെ പ്രതിമാസ എസ്ഐപി ഇപ്പോൾ 5.54 ലക്ഷം രൂപയാകുമായിരുന്നു.

ഈ ഫണ്ടുകൾ പരിഗണിക്കുന്ന നിക്ഷേപകർ അവരുടെ നിക്ഷേപ ലക്ഷ്യങ്ങൾ, അപകടസാധ്യത, ഓരോ ഫണ്ടും ഉപയോഗിക്കുന്ന പ്രത്യേക അളവ് രീതികൾ എന്നിവ ശ്രദ്ധാപൂർവ്വം വിലയിരുത്തണം.