റിട്ടയർമെന്റിനുശേഷം നല്ലൊരു വരുമാനം ആഗ്രഹിക്കുന്നുവോ? ഈ പോസ്റ്റ് ഓഫീസ് പദ്ധതിയിൽ നിക്ഷേപിക്കൂ

വിരമിക്കൽ ജീവിതം സുരക്ഷിതമാക്കാൻ എല്ലാവരും മുൻപേ തന്നെ പ്ലാൻ ചെയ്യണം. മികച്ച നിക്ഷേപ പദ്ധതികളിൽ ചേരുന്നത് നല്ലൊരു മാർഗമാണ്. റിട്ടയർമെന്റ് ജീവിതത്തിൽ സാമ്പത്തിക ആവശ്യങ്ങൾ നിറവേറ്റുന്നതിന് ഈ നിക്ഷേപങ്ങൾ സഹായകരമാകും. പ്രായമാകുമ്പോൾ സാമ്പത്തിക ചെലവുകൾ കൂടിവന്നേക്കാം. എന്നാൽ, അതിന് അനുസരിച്ച് സ്ഥിര വരുമാനം ഇല്ലെങ്കിൽ പല ബുദ്ധിമുട്ടുകളും നേരിടേണ്ടതായി വരും. അതിനാൽതന്ന, പ്രതിമാസ വരുമാനം നൽകുന്ന നിക്ഷേപ പദ്ധതികൾ തിരഞ്ഞെടുക്കാൻ ശ്രദ്ധിക്കണം.

മുതിർന്ന പൗരന്മാർക്കുവേണ്ടി നിരവധി നിക്ഷേപ പദ്ധതികൾ ബാങ്കുകൾ വാഗ്‌ദാനം ചെയ്യുന്നുണ്ട്. പോസ്റ്റ് ഓഫീസും ഇത്തരം നിക്ഷേപ പദ്ധതികൾ നൽകുന്നുണ്ട്. ഒറ്റത്തവണ നിക്ഷേപത്തിലൂടെ ത്രൈമാസ വരുമാനം നൽകുന്ന സീനിയർ സിറ്റിസൺസ് സേവിങ് സ്കീം അക്കൗണ്ട് പോസ്റ്റ് ഓഫീസിന്റെ അത്തരം പദ്ധതികളിലൊന്നാണ്. മുതിർന്ന പൗരന്മാർക്ക് എസ്‌സിഎസ്എസ് അക്കൗണ്ട് തുറക്കുന്ന സമയത്ത് ഒരു തുക നിക്ഷേപിച്ച് മൂന്നു മാസത്തിലൊരിക്കൽ വരുമാനം നേടാനും കഴിയും.

പ്രതിവർഷം 8.2 ശതമാനമാണ് പോസ്റ്റ് ഓഫീസ് സീനിയർ സിറ്റിസൺ സ്കീം നൽകുന്ന പലിശ നിരക്ക്. ഒറ്റത്തവണയായിട്ടാണ് ഈ പദ്ധതിയിൽ നിക്ഷേപം നടത്താൻ കഴിയുക. പരമാവധി നിക്ഷേപം 30 ലക്ഷത്തിൽ കൂടാൻ പാടില്ല. 5 വർഷമാണ് പദ്ധതിയുടെ ലോക്ക് ഇൻ കാലയളവ്. അക്കൗണ്ട് ഉടമയ്ക്ക് ആവശ്യമെങ്കിൽ അക്കൗണ്ട് കാലാവധി നീട്ടാവുന്നതാണ്.

60 വയസിനു മുകളിലുള്ള ഒരു വ്യക്തി, 55 വയസിന് മുകളിലും 60 വയസിന് താഴെയുമുള്ള വിരമിച്ച സിവിലിയൻ ജീവനക്കാരൻ, 50 വയസിന് മുകളിലും 60 വയസിന് താഴെയുമുള്ള വിരമിച്ച പ്രതിരോധ ജീവനക്കാരൻ എന്നിവർക്ക് എസ്‌സിഎസ്എസ് അക്കൗണ്ടിന് അപേക്ഷിക്കാം. 1.50 ലക്ഷം വരെയുള്ള നിക്ഷേപങ്ങൾക്ക് നികുതി ഇളവ് ലഭിക്കും.

5 ലക്ഷം, 10 ലക്ഷം, 20 ലക്ഷം നിക്ഷേപിച്ചാൽ എത്ര കിട്ടും?

ഈ പദ്ധതിയിൽ 5 ലക്ഷം നിക്ഷേപിച്ചാൽ ത്രൈമാസത്തിലൊരിക്കൽ നിങ്ങൾക്ക് പലിശയായി കിട്ടുന്നത് 10,250 രൂപയാണ്. 5 വർഷം കഴിയുമ്പോൾ നിങ്ങളുടെ മെച്യൂരിറ്റി തുക 7,05,000 രൂപയാണ്. ഒരാൾ 10 ലക്ഷം നിക്ഷേപിക്കുകയാണെങ്കിൽ മൂന്നു മാസത്തിലൊരിക്കൽ പലിശ ഇനത്തിൽ 20,500 രൂപ കിട്ടും. 5 വർഷ കാലാവധി പൂർത്തിയാകുമ്പോൾ കയ്യിൽ കിട്ടുന്നത് 14,10,000 രൂപയാണ്. ഈ സ്കീമിൽ ഒരാൾ 20 ലക്ഷം നിക്ഷേപിച്ചാൽ നല്ലൊരു തുക പലിശ ഇനത്തിൽ നേടാം. മൂന്നു മാസം കൂടുമ്പോൾ 41,000 രൂപ പലിശയായി കിട്ടും. 5 വർഷം കാലാവധി പൂർത്തിയാകുമ്പോൾ 28,20,000 രൂപ ലഭിക്കും.