എസ്ബിഐ റെക്കറിംഗ് നിക്ഷേപങ്ങളും പോസ്റ്റ് ഓഫീസ് നിക്ഷേപങ്ങളും; പലിശ നിരക്കുകള്‍ താരതമ്യം ചെയ്താലോ?

ബാങ്കുകളിലും പോസ്റ്റ് ഓഫീസിലും റെക്കറിംഗ് നിക്ഷേപങ്ങള്‍ ആരംഭിക്കാവുന്നതാണ്. ഇന്ത്യയിലെ മുന്‍നിര പൊതുമേഖലാ ബാങ്കായ എസ്ബിഐയിലേയും പോസ്റ്റ് ഓഫീസിലെയും റെക്കറിംഗ് നിക്ഷേപങ്ങളുടെ പലിശ നിരക്കുകള്‍ നമുക്കിവിടെയൊന്ന് താരതമ്യം ചെയ്ത് നോക്കാം.

സാധാരണ പൊതു ജനങ്ങള്‍ക്ക് എസ്ബിഐ റെക്കറിംഗ് നിക്ഷേപത്തിന്മേല്‍ ലഭിക്കുന്ന പലിശ നിരക്ക് 5 മുതല്‍ 5.4 ശതമാനം വരെയാണ്. മുതിര്‍ന്ന പൗരന്മാര്‍ക്ക് 50 ബേസിസ് പോയിന്റെ അധിക പലിശ നിരക്ക് ലഭിക്കും. 2021 ജനുവരി 8 മുതല്‍ ഈ നിരക്കാണ് നിലവിലുള്ളത്.

1 വര്‍ഷം മുതല്‍ 10 വര്‍ഷം വരെയുള്ള കാലയളവുകളാണ് എസ്ബിഐ റെക്കറിംഗ് നിക്ഷേപങ്ങളുടെ മെച്യൂരിറ്റി കാലാവധി. നിക്ഷേപകര്‍ ചുരുങ്ങിയത് 100 രൂപ എങ്കിലും എസ്ബിഐ റെക്കറിംഗ് നിക്ഷേപത്തില്‍ ഓരോ മാസവും നിക്ഷേപം നടത്തേണ്ടതുണ്ട്. 10 രൂപയുടെ ഗുണിതങ്ങളാണ് നിക്ഷേപിക്കുവാന്‍ സാധിക്കും. എന്നാല്‍ ഒരു വ്യക്തിയ്ക്ക് എസ്ബിഐ റെക്കറിംഗ് നിക്ഷേപത്തില്‍ പരമാവധി നിക്ഷേപം നടത്താവുന്ന തുകയ്ക്ക് പരിധിയില്ല.

എസ്ബിഐ റെക്കറിംഗ് നിക്ഷേപത്തില്‍ 2021 ജനുവരി 8 മുതല്‍ പ്രാബല്യത്തിലുള്ള പലിശ നിരക്കുകള്‍ താഴെ പറയും പ്രകാരമാണ്.

1 വര്‍ഷം മുതല്‍ 2 വര്‍ഷം വരെയുള്ള നിക്ഷേപങ്ങള്‍ക്ക് - 4.9 ശതമാനം

2 വര്‍ഷം മുതല്‍ 3 വര്‍ഷം വരെയുള്ള നിക്ഷേപങ്ങള്‍ക്ക് - 5.1 ശതമാനം

3 വര്‍ഷം മുതല്‍ 5 വര്‍ഷം വരെയുള്ള നിക്ഷേപങ്ങള്‍ക്ക് - 5.3 ശതമാനം

5 വര്‍ഷം മുതല്‍ 10 വര്‍ഷം വരെയുള്ള നിക്ഷേപങ്ങള്‍ക്ക് - 5.4 ശതമാനം

പോസ്റ്റ് ഓഫീസ് റെക്കറിംഗ് നിക്ഷേപങ്ങള്‍ 5.8 ശതമാനം വാര്‍ഷിക നിരക്കിലാണ് നിക്ഷേപകര്‍ക്ക് പലിശ വാഗ്ദാനം ചെയ്യുന്നത്. 5 വര്‍ഷമാണ് പോസ്റ്റ് ഓഫീസ് റെക്കറിംഗ് നിക്ഷേപങ്ങളുടെ നിക്ഷേപ കാലാവധി. പോസ്റ്റ് ഓഫീസ് റെക്കറിംഗ് നിക്ഷേപം ആരംഭിക്കുവാന്‍ ആവശ്യമായ ഏറ്റവും കുറഞ്ഞ തുക പ്രതിമാസം 10 രൂപയാണ്. 5 രൂപയുടെ ഗുണിതങ്ങളായ തുകയാണ് നിക്ഷേപിക്കുാവാന്‍ സാധിക്കുക. നിക്ഷേപിക്കുന്ന പരമാവധി തുകയ്ക്ക് പോസ്റ്റ് ഓഫീസ് റെക്കറിംഗ് നിക്ഷേപത്തിലും പരിധിയില്ല.

5 വര്‍ഷത്തേക്കുള്ള പോസ്റ്റ് ഓഫീസ് റെക്കറിംഗ് നിക്ഷേപങ്ങള്‍ക്ക് 2021 ഏപ്രില്‍ 1 മുതല്‍ പ്രാബല്യത്തിലുള്ള പലിശ നിരക്ക് 5.8 ശതമാനമാണ്.