പ്രതിമാസം 2000 രൂപ നിക്ഷേപിക്കാനുണ്ടോ? 40,000 രൂപ പെൻഷനുള്ള വഴി പറഞ്ഞുതരാം...

സാമ്പത്തിക ഭദ്രത എന്നത് വലിയ ശമ്പളം ഉള്ളവർക്ക് മാത്രം അവകാശപ്പെട്ട ഒന്നാണോ? ഒരിക്കലുമല്ല. നിക്ഷേപത്തിന്റെ കാര്യത്തിൽ പണത്തേക്കാൾ പ്രാധാന്യം നിങ്ങൾ നൽകുന്ന സമയത്തിനും അച്ചടക്കത്തിനുമാണ്. 25-ാം വയസ്സിൽ ചെറിയൊരു തുക നിക്ഷേപിച്ചു തുടങ്ങിയാൽ, റിട്ടയർമെന്റ് കാലത്ത് വലിയൊരു തുക സമ്പാദിക്കാനും മാന്യമായ മാസവരുമാനം ഉറപ്പാക്കാനും സാധിക്കും.

ബാങ്കിലെ ആർ.ഡി പോലെ ഓരോ മാസവും നിശ്ചിത തുക (ഉദാഹരണത്തിന് 500 മുതൽ) മ്യൂച്വൽ ഫണ്ടുകളിൽ നിക്ഷേപിക്കുന്ന രീതിയാണിത്. വിപണിയിലെ ഏറ്റക്കുറച്ചിലുകൾ കണക്കിലെടുക്കാതെ കൃത്യമായ ഇടവേളകളിൽ നിക്ഷേപം തുടരാൻ ഇത് സഹായിക്കുന്നു. ഓരോ മാസവും കൃത്യമായ തുക മാറ്റിവെക്കുന്നതിലൂടെ സമ്പാദ്യശീലം വളരുന്നു. നിങ്ങളുടെ ബാങ്ക് അക്കൗണ്ടിൽ നിന്ന് പണം ഓട്ടോമാറ്റിക്കായി നിക്ഷേപിക്കാനുള്ള സൗകര്യം ഇതിലുണ്ട്.

നിങ്ങൾ 25-ാം വയസ്സിൽ ജോലിയിൽ പ്രവേശിക്കുമ്പോൾ മാസം വെറും 2,000 രൂപ എസ്ഐപിയിൽ നിക്ഷേപിക്കാൻ തീരുമാനിക്കുന്നു എന്ന് കരുതുക. 50 വയസ്സ് തികയുന്നത് വരെ, അതായത് തുടർച്ചയായി 25 വർഷം ഈ നിക്ഷേപം തുടരണം. അങ്ങനെയെങ്കിൽ 25 വർഷം കൊണ്ടുള്ള നിങ്ങളുടെ ആകെ നിക്ഷേപ തുക 6 ലക്ഷമാണ്.

ഇക്വിറ്റി മ്യൂച്വൽ ഫണ്ടുകൾ ദീർഘകാലാടിസ്ഥാനത്തിൽ ശരാശരി 15% വാർഷിക റിട്ടേൺ നൽകാറുണ്ട്. ഈ നിരക്കിൽ കണക്കാക്കിയാൽ, 25 വർഷം കഴിയുമ്പോഴുള്ള ഏകദേശ വരുമാനം ഏകദേശം 49.12 ലക്ഷം ആയിരിക്കാം. 50 വയസ്സാകുമ്പോഴേക്കും മൊത്തം ഫണ്ട് ഏകദേശം 55.12 ലക്ഷം രൂപയാകാം. വെറും 6 ലക്ഷം രൂപയുടെ നിക്ഷേപം 55 ലക്ഷമായി മാറുന്നത് കോമ്പൗണ്ടിംഗിന്റെ മാജിക്കാണ്, 25 വർഷത്തെ കാലയളവ് ഇവിടെ ഏറ്റവും വലിയ പങ്ക് വഹിക്കുന്നു.

50-ാം വയസ്സിൽ നിങ്ങളുടെ കൈവശമുള്ള ഈ 55.12 ലക്ഷം രൂപ ഉപയോഗിച്ച് ഒരു എസ്ഡബ്ല്യുപി ആരംഭിക്കാം. സമ്പാദിച്ച തുകയിൽ നിന്ന് കൃത്യമായ ഇടവേളകളിൽ പണം പിൻവലിക്കുന്ന രീതിയാണിത്. ഈ തുക 7.5% വാർഷിക പലിശ നൽകുന്ന ഒരു സുരക്ഷിത നിക്ഷേപത്തിലേക്ക് മാറ്റിയാൽ, അടുത്ത 25 വർഷത്തേക്ക് (അതായത് നിങ്ങളുടെ 75 വയസ്സ് വരെ) നിങ്ങൾക്ക് മാസം 40,000 രൂപ വീതം പിൻവലിക്കാൻ സാധിക്കും.

40,000 × 12 × 25 എന്ന നിരക്കിൽ, മൊത്തം പിൻവലിക്കൽ 1.20 കോടി ആയിരിക്കും. 25 വർഷത്തെ പിൻവലിക്കലിന് ശേഷവും ഏകദേശം 4.3 ലക്ഷം നിങ്ങളുടെ അക്കൗണ്ടിൽ ബാക്കിയുണ്ടാകും. ഫണ്ട് കാലാവധിയിലുടനീളം സ്ഥിരമായ വരുമാനം നൽകുകയും, കൂടാതെ ഒരു തുക അവസാനം അവശേഷിക്കുകയും ചെയ്യുന്നുവെന്നതാണ് സവിശേഷത.

എസ്ഐപി  തുടങ്ങുമ്പോൾ ശ്രദ്ധിക്കേണ്ട കാര്യങ്ങൾ

ലക്ഷ്യം നിശ്ചയിക്കുക: വീട് വാങ്ങുക, കുട്ടികളുടെ വിദ്യാഭ്യാസം, അല്ലെങ്കിൽ റിട്ടയർമെന്റ് എന്നിങ്ങനെ ഒരു ലക്ഷ്യം മുൻനിർത്തി നിക്ഷേപിക്കുക.

റിസ്ക് എടുക്കാനുള്ള ശേഷി: നിങ്ങളുടെ പ്രായവും സാമ്പത്തിക സ്ഥിതിയും അനുസരിച്ച് വേണം ഫണ്ടുകൾ തിരഞ്ഞെടുക്കാൻ.

ദീർഘകാല നിക്ഷേപം: കുറഞ്ഞത് 5 മുതൽ 10 വർഷം വരെയെങ്കിലും നിക്ഷേപം തുടരുന്നത് മികച്ച ലാഭം നൽകും.

കെ.വൈ.സി: മ്യൂച്വൽ ഫണ്ട് നിക്ഷേപത്തിന് കെ.വൈ.സി നടപടികൾ പൂർത്തിയാക്കേണ്ടത് നിർബന്ധമാണ്.

മ്യൂച്വൽ ഫണ്ട് നിക്ഷേപങ്ങൾ വിപണിയിലെ ലാഭനഷ്ടങ്ങൾക്ക് വിധേയമാണ്. നിക്ഷേപിക്കുന്നതിന് മുൻപ് ഒരു സാമ്പത്തിക വിദഗ്ധന്റെ ഉപദേശം തേടുന്നത് നന്നായിരിക്കും.