സ്വർണ്ണത്തിന് ഡിമാൻഡ് ഉയരുന്നു; ക്രെഡിറ്റ് കാർഡ് ഉപയോഗിച്ച് വാങ്ങാമോ?

ആഗോള തലത്തിലെ രാഷ്ട്രീയ അനിശ്ചിതത്വങ്ങൾ സ്വർണ്ണ വിലയിൽ പ്രതിഫലിക്കുന്നത് തുടരുന്ന സാഹചര്യമാണുള്ളത്. സർവ്വകാല റെക്കോർഡു തകർത്ത് മുന്നേറുന്ന സ്വർണ്ണ വില കൂടുതൽ ആളുകളെ സ്വർണ്ണത്തിൽ നിക്ഷേപിക്കാൻ പ്രേരിപ്പിക്കുന്നുമുണ്ട്. ഇതിനായി പലരും ക്രെഡിറ്റ് കാർഡുകളും ഉപയോഗിക്കുന്നു. എന്നാൽ ഇത് ബുദ്ധിപരമായ സാമ്പത്തിക നീക്കമാണോ? ആഭരണങ്ങൾക്ക് ഇന്ത്യയിൽ വൈകാരികവും സാമ്പത്തികവുമായ മൂല്യമുണ്ട്. ഇവിടെയുള്ള കുടുംബങ്ങൾ പലപ്പോഴും സ്വർണം, വജ്രം, മറ്റ് വിലയേറിയ ലോഹങ്ങൾ എന്നിവ നിക്ഷേപമായി കാണുന്നു. എളുപ്പത്തിൽ പണം ലഭ്യമാകുന്നതിനാൽ പലരും ക്രെഡിറ്റ് കാർഡുകൾ ഉപയോഗിക്കാൻ ഇഷ്ടപ്പെടുന്നു. എന്നിരുന്നാലും, ആർബിഐയിൽ നിന്നുള്ള ചില നിയന്ത്രണങ്ങളോടെ, നിങ്ങളുടെ ക്രെഡിറ്റ് കാർഡ് ഉപയോഗിച്ച് ആഭരണങ്ങൾ വാങ്ങുന്നത് ശരിയാണോയെന്ന് പരിശോധിക്കാം.

2013-ൽ, സ്വർണ്ണ ഇറക്കുമതിയും ചില്ലറ ഉപഭോഗവും തടയാൻ ആർബിഐ നടപടികൾ സ്വീകരിച്ചിരുന്നു. ക്രെഡിറ്റ് കാർഡ് വഴിയുള്ള സ്വർണം വാങ്ങുന്നത് തുല്യമായ പ്രതിമാസ തവണകളായി (ഇഎംഐ) മാറ്റരുതെന്ന് ബാങ്കുകൾക്ക് നിർദേശം നൽകി. കൂടാതെ, സ്വർണ്ണ നാണയങ്ങൾ വാങ്ങുന്നതിന് ക്രെഡിറ്റ് കാർഡുകൾ സ്വീകരിക്കില്ല. പല ബാങ്കുകളും, പ്രത്യേകിച്ച് ക്രെഡിറ്റ് കാർഡ് മേഖലയിലെ സജീവമായവ, സ്വർണ്ണാഭരണങ്ങൾ ഉൾപ്പെടെയുള്ള ഉയർന്ന മൂല്യമുള്ള ഇടപാടുകൾക്ക് മുമ്പ് ഇഎംഐ സൗകര്യങ്ങൾ വാഗ്ദാനം ചെയ്തിരുന്നു. സാധാരണഗതിയിൽ, 5000 രൂപയ്ക്ക് മുകളിലുള്ള വാങ്ങലുകൾ ഇഎംഐകളിലേക്ക് പരിവർത്തനം ചെയ്യപ്പെടുന്നതിന് യോഗ്യമായിരുന്നു. പ്രോസസ്സിംഗ് ഫീ ഇളവുകളും കുറഞ്ഞ പലിശ നിരക്കുകളും വാഗ്ദാനം ചെയ്യുന്നതിനായി ചില ബാങ്കുകൾ വ്യാപാരികളുമായി സഹകരിക്കുന്നു.

ക്രെഡിറ്റ് കാർഡ് ഉപയോഗിച്ച് ആഭരണങ്ങൾ വാങ്ങുന്നതിന്റെ പ്രയോജനങ്ങൾ

1. സൗകര്യപ്രദം - ക്രെഡിറ്റ് കാർഡുകൾ തൽക്ഷണ വാങ്ങലുകൾ നടത്താൻ നിങ്ങളെ അനുവദിക്കുന്നു. വലിയ തുക കൊണ്ടുപോകാതെ തന്നെ സ്വർണ്ണം വാങ്ങാൻ സാധിക്കുന്നു. ഇത് സുരക്ഷിതവും കൂടുതൽ സൗകര്യപ്രദവുമാണ്.

2. റിവാർഡ് പോയിന്റുകളും ക്യാഷ്ബാക്കും - പല ക്രെഡിറ്റ് കാർഡുകളും റിവാർഡ് പോയിറുകൾ, ക്യാഷ്ബാക്ക് അല്ലെങ്കിൽ ആഭരണങ്ങൾ വാങ്ങുമ്പോൾ കിഴിവുകൾ എന്നിവ വാഗ്ദാനം ചെയ്യുന്നു. ചില ബാങ്കുകൾ ജ്വല്ലറികളുമായി സഹകരിച്ച് എക്സ്ക്ലൂസീവ് ഡീലുകൾ നൽകുന്നു. ഈ ആനുകൂല്യങ്ങൾ മൊത്തത്തിലുള്ള ചെലവ് കുറയ്ക്കാൻ സഹായിക്കും.

3. പലിശ രഹിത കാലയളവ് - മിക്ക ക്രെഡിറ്റ് കാർഡുകളും 45-50 ദിവസം വരെ പലിശ രഹിത കാലയളവ് വാഗ്ദാനം ചെയ്യുന്നു. നിശ്ചിത തീയതിക്ക് മുമ്പ് നിങ്ങൾ മുഴുവൻ തുകയും അടച്ചാൽ, നിങ്ങൾക്ക് പലിശ നിരക്കുകൾ ഒഴിവാക്കാം.

ക്രെഡിറ്റ് കാർഡ് ഉപയോഗിച്ച് ആഭരണങ്ങൾ വാങ്ങുമ്പോഴുള്ള അപകട സാധ്യതകൾ

1. ഉയർന്ന പലിശ നിരക്കുകൾ - നിങ്ങൾ മുഴുവൻ തുകയും കൃത്യസമയത്ത് അടച്ചില്ലെങ്കിൽ, ക്രെഡിറ്റ് കാർഡുകളുടെ പലിശ നിരക്ക് പ്രതിവർഷം 40 ശതമാനം വരെ ഉയർന്നേക്കാം. ഇത് നിങ്ങളുടെ ആഭരണങ്ങൾ വാങ്ങുന്നത് കൂടുതൽ ചെലവേറിയതാക്കും.

2. കടഭാരം - തിരിച്ചടവ് പദ്ധതിയില്ലാതെ ക്രെഡിറ്റ് കാർഡ് ഉപയോഗിക്കുന്നത് കടത്തിലേക്ക് നയിച്ചേക്കാം.