സ്ഥിര വരുമാനമുള്ള ജോലിക്കാർക്ക് മാത്രമാണോ ഇൻസ്റ്റൻ്റ് വ്യക്തി​ഗത വായ്പകൾ ലഭിക്കുന്നത്? കാരണം ഇതാണ്

സ്വയം തൊഴിൽ ചെയ്യുന്നവരേക്കാൾ എളുപ്പത്തിൽ പ്രതിമാസ വരുമാനം വാങ്ങുന്നവർക്ക് വ്യക്തി​ഗത വായ്പകൾ ലഭിക്കുന്നുണ്ട്. വായ്പ നൽകുന്ന സ്ഥാപനങ്ങൾക്കു പോലും സ്ഥിര വരുമാനമുള്ള ജോലിക്കാരെ പരി​ഗണിക്കാൻ താത്പര്യം കൂടുതലാണ്. നിക്ഷേപകൻ്റെ സാലറി സ്ലിപ്പും, ബാങ്ക് സ്റ്റേറ്റ്മെൻ്റും മാത്രം നൽകിയാൽ വായ്പ ഉറപ്പാക്കാനും സാധിക്കും. ബാങ്കുകളും എൻ‌ബി‌എഫ്‌സികളും ശമ്പളക്കാരായ ജോലിക്കാരുടെ ക്രെഡിറ്റ് യോ​ഗ്യത എളുപ്പത്തിൽ മനസിലാക്കുന്നു.

വായ്പാ അപേക്ഷ വേ​ഗത്തിൽ അം​ഗീകരിക്കും

സാലറി സ്ലിപ്പ്, ഫോം 16, അല്ലെങ്കിൽ ബാങ്ക് സ്റ്റേറ്റ്‌മെന്റുകൾ എന്നിവയിലൂടെ വരുമാന തെളിവ് സമർപ്പിക്കാൻ കഴിയും. ഈ രേഖകൾ സമർപ്പിച്ചാൽ വായ്പ നൽകുന്നവർക്ക് പെട്ടെന്ന് തന്നെ നിങ്ങളുടെ ക്രെഡിറ്റ് യോ​ഗ്യത പരിശോധിക്കാനും, അത് അം​ഗീകരിക്കാനും സാധിക്കും. എന്നാൽ നിങ്ങളൊരു സ്വയം തൊഴിൽ ചെയ്യുന്ന വ്യക്തിയാണെങ്കിൽ ഓഡിറ്റ് ചെയ്ത അക്കൗണ്ടുകൾ, ജിഎസ്ടി റിട്ടേണുകൾ, നികുതി റിട്ടേണുകൾ എന്നിവ സമർപ്പിക്കേണ്ടതുണ്ട്. ഈ രേഖകളെല്ലാം പരിശോധിക്കാൻ സമയമെടുക്കും. അതിനാലാണ് ശമ്പളക്കാരായ ആളുകൾക്ക് വായ്പാ അം​ഗീകാരം പെട്ടെന്ന് പൂർത്തിയാവുന്നത്.

ക്രെഡിറ്റ് സ്കോർ മനസിലാക്കാൻ സാധിക്കും

ശമ്പളം വാങ്ങുന്ന വ്യക്തികൾ പല തരത്തിലുള്ള ബാങ്ക് ഇടപാടുകൾ നടത്തുന്നുണ്ട്. അവർ ക്രെഡിറ്റ് കാർഡ് ഉപയോ​ഗിച്ച് പർച്ചേസ് ചെയ്യുകയും, അവ ഇഎംഐ മാർ​ഗത്തിലൂടെ തിരിച്ചടക്കുകയും ചെയ്യാൻ സാധ്യതയുണ്ട്. അതിനു കാരണം എല്ലാമാസവും സ്ഥിരമായ വരുമാനം ലഭിക്കുന്നതു കൊണ്ടാണ്. നിങ്ങളുടെ സാമ്പത്തിക ഇടപാടുകൾ കൃത്യമായി നടത്തിയാൽ അത് മികച്ച ക്രെഡിറ്റ് സ്കോർ ലഭിക്കാൻ കാരണമാവും. വായ്പക്ക് അപേക്ഷിക്കുമ്പോൾ ഈ ഉയർന്ന ക്രെഡിറ്റ് സ്കോർ വായ്പാദാതാവിന് കാണാൻ സാധിക്കും. ഇതും നിങ്ങളുടെ വായ്പാ അം​ഗീകാരം എളുപ്പത്തിൽ നടക്കാൻ കാരണമാവും.

സ്ഥിരമായ വരുമാനം വ്യക്തി​ഗത വായ്പ ഉറപ്പാക്കുന്നു

നിങ്ങളൊരു സർക്കാർ ജീവനക്കാരനോ അല്ലെങ്കിൽ മറ്റേതെങ്കിലും പ്രൈവറ്റ് കമ്പനിയിൽ ജോലി ചെയ്യുന്നയാളോ, അല്ലെങ്കിൽ എല്ലാ മാസവും സ്ഥിരമായി വരുമാനം ലഭിക്കുന്ന ജോലിക്കാരനോ ആണെങ്കിൽ വ്യക്തി​ഗത വായ്പകൾ നിരസിക്കാനുള്ള സാധ്യത വളരെ കുറവാണ്. സ്ഥിരമായി വരുമാനം ലഭിക്കുന്നവരായതിനാൽ ഇഎംഐകൾ കൃത്യസമയത്ത് തന്നെ തിരിച്ചടക്കാനുള്ള കഴിവ് നിങ്ങൾക്കുണ്ടെന്ന് വായ്പാദാതാക്കൾക്ക് മനസിലാവുന്നു. അതും വായ്പ പെട്ടെന്ന് അം​ഗീകരിക്കാൻ കാരണമാവുന്നു.

ഇക്കാരണത്താൽ മിക്ക ഡിജിറ്റൽ ലെൻഡിംഗ് ആപ്പുകളും ഫിൻടെക്കുകളും ശമ്പളക്കാരായ ഉപഭോക്താക്കൾക്കാണ് ഇൻസ്റ്റൻ്റ് വായ്പകൾ വാഗ്ദാനം ചെയ്യുന്നത്. ഫ്രീലാൻസർമാരോ, മറ്റ് സ്ഥിരമായി ഒരേ വരുമാനം ലഭിക്കാത്ത വ്യക്തികൾക്കോ ഇത്തരം വായ്പാ അപേക്ഷകൾ നിരസിക്കാനുള്ള സാധ്യത കൂടുതലാണ്.

പൊതുവേ വ്യക്തി​ഗത വായ്പകൾ നിങ്ങളുടെ ക്രെഡിറ്റ് യോ​ഗ്യതയും തിരിച്ചടവ് ശേഷിയും മനസിലാക്കിയ ശേഷമാണ് അനുവദിക്കുന്നത്. എന്നാൽ കണക്കുകൾ പ്രകാരം സ്ഥിരമായ വരുമാനം ലഭിക്കുന്നവർക്ക് ഈ വായ്പകളുടെ തിരിച്ചടവുകൾ മുടക്കമില്ലാതെ തിരിച്ചടക്കാൻ സാധിക്കുമെന്നാണ് വായ്പാദാതാക്കൾ മനസിലാക്കുന്നത്. അതിനാലാണ് ശമ്പളക്കാരായ വ്യക്തികൾക്ക് ഇത്തരം വായ്പകൾ ഇൻസ്റ്റൻ്റായി ലഭിക്കുന്നത്.

എന്നാൽ അതിനർത്ഥം സ്വയം തൊഴിൽ ചെയ്യുന്നവർക്കും, സ്ഥിരമായ വരുമാനമില്ലാത്തവർക്കും വായ്പ ലഭിക്കില്ല എന്നല്ല. ഇത്തരം ആളുകൾക്ക് ചിലപ്പോൾ ഉയർന്ന പലിശ നിരക്കിലായിരിക്കും വായ്പ ലഭിക്കാനുള്ള സാധ്യത. അതിനാൽ നിങ്ങൾ സ്ഥിരമായി ശമ്പളം വാങ്ങിക്കുന്ന വ്യക്തിയാണെങ്കിൽ സധൈര്യം വ്യക്തി​ഗത വായ്പകൾക്ക് അപേക്ഷിക്കാം.

അറിയിപ്പ്:
മുകളില്‍ കൊടുത്തിരിക്കുന്ന ലേഖനം പഠനാവശ്യത്തിന് നൽകുന്നതാണ്. ഇതുമായി ബന്ധപ്പെട്ട് നിക്ഷേപ തീരുമാനങ്ങള്‍ എടുക്കും മുന്‍പ് സാമ്പത്തിക വിദഗ്ധന്റെ നിര്‍ദേശം തേടാം. ഓഹരി വിപണിയിലെ നിക്ഷേപം നഷ്ട സാധ്യതകള്‍ക്ക് വിധേയമാണ്. സ്വന്തം റിസ്‌കില്‍ മാത്രം നിക്ഷേപ തീരുമാനം കൈക്കൊള്ളുക. ലേഖനം വായിച്ചിട്ട് എടുക്കുന്ന തീരുമാനത്തിന്റെ അടിസ്ഥാനത്തില്‍ സംഭവിക്കുന്ന ലാഭനഷ്ടങ്ങള്‍ക്ക് ഗുഡ്റിട്ടേൺസ് മലയാളവും ലേഖകനും ഉത്തരവാദികളല്ല.